ജിദ്ദ: ഈ വര്‍ഷത്തെ ചൈനീസ് പുതുവത്സര അവധിക്കാലമായ 'ഗോള്‍ഡന്‍ വീക്ക്' (ഒക്ടോബര്‍ 1 മുതല്‍ 8 വരെ) ആഘോഷങ്ങളുടെ ഭാഗമായി സൗദി അറേബ്യയിലേക്ക് എത്തിയ ചൈനീസ് യാത്രക്കാരുടെ എണ്ണത്തില്‍ വന്‍ വര്‍ധനവ് രേഖപ്പെടുത്തി. ഇത് ആഗോളതലത്തില്‍ ചൈനീസ് ടൂറിസം ഭൂപടം മിഡില്‍ ഈസ്റ്റിലേക്ക് മാറുന്നതിന്റെ വ്യക്തമായ സൂചനയായി.

മേഖലയിലെ സൗദി അറേബ്യ, യുഎഇ, ഈജിപ്ത്, ഖത്തര്‍, ഒമാന്‍ എന്നിവയാണ് ചൈനീസ് സഞ്ചാരികളെ ആകര്‍ഷിക്കുന്ന മിഡില്‍ ഈസ്റ്റിലെ പ്രധാന കേന്ദ്രങ്ങള്‍ എന്ന് സിഎന്‍ബിസി റിപ്പോര്‍ട്ട് ചെയ്തു.

ചൈനയില്‍ നിന്നുള്ള യാത്രാ ബുക്കിംഗുകളില്‍ മിഡില്‍ ഈസ്റ്റ് രാജ്യങ്ങള്‍ ശ്രദ്ധേയമായ മുന്നേറ്റമാണ് നടത്തിയത്. ട്രിപ്പ്.കോം പുറത്തുവിട്ട കണക്കുകള്‍ പ്രകാരം, കഴിഞ്ഞ വര്‍ഷത്തെ അപേക്ഷിച്ച് ചൈനയില്‍നിന്ന് ദോഹയിലേക്കുള്ള യാത്രാ ബുക്കിംഗുകളില്‍ 441% വര്‍ധനവുണ്ടായി. അബുദാബിയിലേക്ക് ഇത് 229% ആയി ഉയര്‍ന്നു. ദുബായ് 27% വളര്‍ച്ച രേഖപ്പെടുത്തി, ഇതോടെ ഏഷ്യക്ക് പുറത്തുള്ള പ്രധാന 10 ടൂറിസം കേന്ദ്രങ്ങളുടെ പട്ടികയില്‍ ദുബായിയും ഇടം നേടി. അന്താരാഷ്ട്ര യാത്രാ ഡാറ്റാ കമ്പനിയായ ഫോര്‍വേഡ്കീസ് നടത്തിയ വിശകലനത്തിലാണ് ഈ വിവരങ്ങള്‍.

ചൈനയിലെ രണ്ടാമത്തെ വലിയ ഓണ്‍ലൈന്‍ ബുക്കിംഗ് സൈറ്റായ ടോങ്ചെങ് ട്രാവല്‍ റിപ്പോര്‍ട്ട് ചെയ്തതനുസരിച്ച്, ഈ അവധിക്കാലത്ത് ഹോട്ടല്‍ ബുക്കിംഗുകളുടെ കാര്യത്തില്‍ അതിവേഗം വളരുന്ന ലക്ഷ്യസ്ഥാനങ്ങളില്‍ സൗദി അറേബ്യ, യുഎഇ, ഈജിപ്ത്, ന്യൂസിലന്‍ഡ്, കസാഖിസ്ഥാന്‍ എന്നീ രാജ്യങ്ങളാണ് മുന്നിലുള്ളത്.

വര്‍ഷാരംഭം മുതല്‍ ചൈനയില്‍ നിന്ന് മിഡില്‍ ഈസ്റ്റിലേക്കുള്ള വിമാന സര്‍വീസുകളില്‍ 25% വര്‍ധനവുണ്ടായതായി ട്രിപ്പ്.കോം സിംഗപ്പൂര്‍ ജനറല്‍ മാനേജര്‍ എഡ്മണ്ട് ഓങ് സ്ഥിരീകരിച്ചു. ഇത് കോവിഡ് മഹാമാരിക്ക് മുന്‍പുള്ള നിലവാരത്തേക്കാള്‍ 180% കൂടുതലാണ്. സുരക്ഷിതവും നൂതനവുമായ യാത്രാകേന്ദ്രമെന്ന നിലയില്‍ ഈ മേഖലയിലുള്ള വിശ്വാസം വര്‍ധിച്ചതിന്റെ പ്രതിഫലനമാണ് ഈ കുതിച്ചുചാട്ടമെന്നും അദ്ദേഹം ചൂണ്ടിക്കാട്ടി.

ചൈനീസ് നഗരങ്ങളെ മിഡില്‍ ഈസ്റ്റിലെ നഗരങ്ങളുമായി ബന്ധിപ്പിക്കുന്ന നേരിട്ടുള്ള വിമാന സര്‍വീസുകളുടെ വര്‍ദ്ധനവും വിസ നടപടികള്‍ ലഘൂകരിച്ചതുമാണ് ആവശ്യകത വര്‍ധിച്ചതിന് പിന്നിലെ പ്രധാന കാരണങ്ങളായി ടൂറിസം വിദഗ്ദ്ധര്‍ ചൂണ്ടിക്കാട്ടുന്നത്.

പ്രവേശനത്തിലുള്ള എളുപ്പവും, കുറഞ്ഞ യാത്രാച്ചെലവും, വിനോദ-സാംസ്‌കാരികപരമായ അനുഭവങ്ങളുടെ വൈവിധ്യവുമാണ് യുഎഇ, സൗദി അറേബ്യ തുടങ്ങിയ രാജ്യങ്ങളെ പ്രിയപ്പെട്ടതാക്കി മാറ്റുന്നതെന്ന് ഷാങ്ഹായിലെ ചൈന ഐ2ഐ ഗ്രൂപ്പ് സിഇഒ അലക്സാണ്ടര്‍ ഗ്ലോസ് അഭിപ്രായപ്പെട്ടു.

ഈ മേഖലയിലെ പ്രമുഖ എയര്‍ലൈനുകള്‍ ചൈനയിലേക്കുള്ള നേരിട്ടുള്ള വിമാന സര്‍വീസുകള്‍ പ്രോത്സാഹിപ്പിക്കുന്നതില്‍ മുന്‍പന്തിയിലാണെന്ന് എസ്ബിഎസ് അഫിനിറ്റി സിഇഒ പെഗ്ഗി ലീ വിശദീകരിച്ചു. വാണിജ്യപരമായ ആവശ്യങ്ങള്‍ക്കും സാംസ്‌കാരിക വിനിമയങ്ങള്‍ക്കും ചൈനീസ് ടൂറിസത്തില്‍ വര്‍ധിച്ചുവരുന്ന താത്പര്യത്തെ സൂചിപ്പിച്ചുകൊണ്ട് എമിറേറ്റ്സ് അടുത്തിടെ ഷെന്‍ജെനിലേക്കുള്ള സര്‍വീസുകള്‍ക്ക് പിന്നാലെ ഹാങ്ചൗവിലേക്കും പുതിയ റൂട്ട് ആരംഭിച്ചതായും അവര്‍ കൂട്ടിച്ചേര്‍ത്തു.

സൗദി അറേബ്യയിലെയും യുഎഇയിലെയും മരുഭൂ സഫാരികള്‍ പോലുള്ള സവിശേഷമായ വിനോദാനുഭവങ്ങള്‍, സ്റ്റഡി ടൂറുകള്‍, പൈതൃക പരിപാടികള്‍ എന്നിങ്ങനെയുള്ള തനതായ സാംസ്‌കാരിക പഠന അനുഭവങ്ങളില്‍ ചൈനീസ് സഞ്ചാരികള്‍ക്ക് താത്പര്യം വര്‍ദ്ധിച്ചുവരുന്നതായും റിപ്പോര്‍ട്ടുകള്‍ സൂചിപ്പിക്കുന്നു.