ഗസ്സ: വെടിനിര്‍ത്തല്‍ പ്രഖ്യാപിച്ചതോടെ, അഞ്ചു ലക്ഷത്തിലധികം ഫലസ്തീനികള്‍ ഗസ്സയിലേക്ക് തിരികെയെത്തി. ഇസ്രായേല്‍ സൈന്യം പിന്‍വാങ്ങാന്‍ തുടങ്ങിയതോടെ ഗസ്സ നഗരം വീണ്ടും ശാന്തമാവുകയായിരുന്നു. ജനങ്ങള്‍ കൂട്ടത്തോടെ നഗരത്തിലേക്ക് മടങ്ങിയെത്തുന്നതായി സിവില്‍ ഡിഫന്‍സ് ഏജന്‍സി അറിയിച്ചു. സിവില്‍ ഡിഫന്‍സ് വക്താവ് മഹ്‌മൂദ് ബസാല്‍ ആണ് ഈ വിവരം സ്ഥിരീകരിച്ചത്.

കഴിഞ്ഞ മാസങ്ങളില്‍ ഇസ്രായേല്‍ ഗസ്സയില്‍ നടത്തിയ വംശഹത്യ യുദ്ധത്തില്‍ 67,000-ത്തിലധികം ഫലസ്തീനികളുടെ ജീവന്‍ നഷ്ടമായി. കൊല്ലപ്പെട്ടവരില്‍ ഭൂരിഭാഗവും സ്ത്രീകളും കുട്ടികളുമാണ്. ഗസ്സ നഗരത്തിലെ പ്രധാന മേഖലകള്‍ ആക്രമണത്തില്‍ പൂര്‍ണ്ണമായും തകര്‍ന്നു. സിവില്‍ ഡിഫന്‍സിന്റെ കണക്കനുസരിച്ച്, ഗസ്സയിലുടനീളം കെട്ടിടാവശിഷ്ടങ്ങള്‍ക്കിടയില്‍ 9,500 പേരെ ഇപ്പോഴും കണ്ടെത്താനായിട്ടില്ല. രക്ഷാപ്രവര്‍ത്തനങ്ങള്‍ തുടരുന്നതിനിടെ ഇതുവരെ 155 മൃതദേഹങ്ങള്‍ കണ്ടെടുത്തു.

ലക്ഷക്കണക്കിന് ഫലസ്തീനികള്‍ മടങ്ങിയെത്തുന്നത് തകര്‍ന്നടിഞ്ഞ തരിശുഭൂമിയിലേക്കാണ്. ശൈത്യകാലം അടുക്കുകയും മഴ പെയ്യുകയും ചെയ്യുന്ന ഈ കാലാവസ്ഥയില്‍, അവര്‍ക്ക് മുന്നിലുള്ളത് കടുത്ത ദുരിതങ്ങളാണ്. എന്നിട്ടും, സ്വന്തം ജന്മനാടിനോടുള്ള ആഴമായ ബന്ധമാണ് അവരെ തിരികെയെത്തിക്കുന്നത്. തകര്‍ന്ന കെട്ടിടങ്ങളുടെയും പഴയ പ്രദേശങ്ങളുടെയും അവശിഷ്ടങ്ങള്‍ക്കിടയില്‍ ആശ്വാസത്തിന്റെ ഒരു തുണ്ട് കണ്ടെത്താമെന്ന പ്രതീക്ഷയിലാണ് ഓരോ ഫലസ്തീനിയും സ്വന്തം മണ്ണിലേക്ക് വീണ്ടും കാലുകുത്തുന്നത്.