റിയാദ് - കമ്പനികളുടെ സാമ്പത്തിക പ്രതിസന്ധിയും പാപ്പരത്ത സാധ്യതകളും വര്ധിക്കുന്നതിന് മുന്പ് തന്നെ കണ്ടെത്താന് ലക്ഷ്യമിട്ടുള്ള 'ഏര്ളി വാണിംഗ്' (മുന്കൂര് മുന്നറിയിപ്പ്) ഇനിഷ്യേറ്റീവിന് സൗദി അറേബ്യയില് തുടക്കമായി. സാമ്പത്തിക അപകടസാധ്യതകള് വര്ധിക്കാന് കാത്തുനില്ക്കാതെ, കമ്പനികളെ കൂടുതല് ക്രിയാത്മകമായി പ്രശ്നങ്ങള് പരിഹരിക്കാന് പ്രാപ്തരാക്കുകയാണ് പുതിയ സംരംഭം വഴി ലക്ഷ്യമിടുന്നതെന്ന് വാണിജ്യ സഹമന്ത്രിയും 'ഇസ്സാര്' ചെയര്മാനുമായ അബ്ദുല് അസീസ് ബിന് ദാഹിം പ്രഖ്യാപിച്ചു.
റിയാദില് ആരംഭിച്ച ഇസ്സാര് 2025 സമ്മേളനത്തിന്റെ ഉദ്ഘാടന പ്രസംഗത്തിലാണ് അദ്ദേഹം ഈ പ്രഖ്യാപനം നടത്തിയത്. വാണിജ്യ മന്ത്രി മാജിദ് അല്-ഖസബിയുടെ രക്ഷാകര്തൃത്വത്തില് പാപ്പരത്ത കമ്മീഷന് (Bankruptcy Commission) സംഘടിപ്പിക്കുന്ന ഈ സമ്മേളനം 'ബിസിനസ് തുടര്ച്ചാ അവസരങ്ങളും സാമ്പത്തിക സുസ്ഥിരതയ്ക്കുള്ള പരിഹാരങ്ങളും' എന്ന പ്രമേയത്തിലാണ് നടക്കുന്നത്.
റിയാദിലെ ഫെയര്മോണ്ട് ഹോട്ടലില് നടക്കുന്ന സമ്മേളനത്തില് സൗദിക്ക് അകത്തും പുറത്തുമുള്ള 40 വിദഗ്ധര് പ്രഭാഷകരായി പങ്കെടുക്കുന്നുണ്ട്. റെഗുലേറ്ററി സ്ഥാപനങ്ങള്, ധനകാര്യ സ്ഥാപനങ്ങള്, നിയമ-സാമ്പത്തിക-കണ്സള്ട്ടിംഗ് മേഖലകളിലെ വിദഗ്ധര് ഉള്പ്പെടെ 800 ഓളം വിദഗ്ധരാണ് സമ്മേളനത്തില് പങ്കെടുക്കുന്നത്.
സൗദി സമ്പദ്വ്യവസ്ഥയുടെ പരിഷ്ക്കരണത്തിന്റെ പശ്ചാത്തലത്തിലാണ് സമ്മേളനം നടക്കുന്നത്. സാമ്പത്തിക സുസ്ഥിരതയ്ക്കും ബിസിനസ് തുടര്ച്ചാ പരിഹാരങ്ങള്ക്കുമുള്ള പ്രാദേശിക കേന്ദ്രമായി സൗദി അറേബ്യയെ മാറ്റാനും, സാമ്പത്തിക നിയന്ത്രണങ്ങള്ക്കും കടം പുനഃസംഘടിപ്പിക്കുന്നതിനും ഒരു പ്രാദേശിക ഹബ്ബായി രാജ്യത്തെ സ്ഥാപിക്കാനും ഈ നീക്കം സഹായിക്കും.
സാമ്പത്തിക പ്രതിരോധശേഷിയും ബിസിനസ് സുസ്ഥിരതയും വര്ദ്ധിപ്പിക്കുന്നതിനുള്ള മികച്ച രീതികള് പ്രദര്ശിപ്പിക്കുക എന്നതാണ് സമ്മേളനത്തിന്റെ പ്രധാന ലക്ഷ്യം. വെല്ലുവിളികളെ നേരിടാന് മുന്കൂര് മുന്നറിയിപ്പ് സംവിധാനങ്ങളും ക്രിയാത്മകമായ ആസൂത്രണവും എങ്ങനെ ഫലപ്രദമായ ഉപകരണങ്ങളായി ഉപയോഗിക്കാമെന്നും സമ്മേളനം ചര്ച്ച ചെയ്യുന്നു. നിക്ഷേപകരുടെ ആത്മവിശ്വാസം വര്ദ്ധിപ്പിക്കുന്നതിനും പ്രാദേശികവും അന്തര്ദ്ദേശീയവുമായ നിക്ഷേപങ്ങളെ പ്രോത്സാഹിപ്പിക്കുന്നതിനും സഹായകമായ കാര്യങ്ങളെക്കുറിച്ചും സമ്മേളനം വെളിച്ചം വീശും.
Related News
