റിയാദ്: സൗദിയില്‍ വാണിജ്യ, വ്യവസായ രംഗത്ത് സംരംഭകരായ സ്ത്രീകളുടെ എണ്ണം വര്‍ധിക്കുന്നു. ഈ വര്‍ഷം മൂന്നാം പാദത്തിലെ അഥവാ ജൂലൈ മുതല്‍ സെപ്തംബര്‍ വരെയുള്ള കണക്കുകള്‍ വാണിജ്യ മന്ത്രാലയം പുറത്തു വിട്ടപ്പോഴാണ് ഇതു വ്യക്തമായത്. ഇക്കാലയളവില്‍ രജിസ്റ്റര്‍ ചെയ്ത വാണിജ്യ സ്ഥാപനങ്ങളുടെ എണ്ണം 1,28,000 ലേറെയാണ്. ഇതില്‍ നാല്‍പത്തി ഒമ്പത് ശതമാനം രജിസ്ട്രേഷനുകളും വനിതകളുടെ ഉടമസ്ഥതതയിലുള്ള സ്ഥാപനങ്ങളാണ്. 51% യുവാക്കളുടെ ഉടമസ്ഥതയിലുള്ള സ്ഥാപനങ്ങളാണെന്നും കണക്കിലുണ്ട്.

ഏറ്റവും കൂടുതല്‍ രജിസ്ട്രേഷനുകള്‍ നടന്നത് റിയാദിലാണ്. 50000 സ്ഥാപനങ്ങളാണ് തലസ്ഥാനത്ത് മാത്രം മൂന്നാം പാദത്തില്‍ ആരംഭിച്ചത്. കിഴക്കന്‍ പ്രവിശ്യ, മക്ക, ഖസീം അസീര്‍, എന്നിവിടങ്ങളാണ് തൊട്ട് പിറകില്‍.