റിയാദ്: റോഡ് സുരക്ഷ വര്‍ദ്ധിപ്പിക്കുന്നതിനും ഗതാഗത നിയമലംഘനങ്ങള്‍ കുറയ്ക്കുന്നതിനുമായി സൗദി അറേബ്യയിലെ ട്രാഫിക് വകുപ്പുകള്‍ നടത്തിയ ഫീല്‍ഡ് കാമ്പയിനില്‍ നിയമലംഘനം നടത്തിയ 6,043 മോട്ടോര്‍ സൈക്കിളുകള്‍ പിടിച്ചെടുത്തു. 2025 ഒക്ടോബര്‍ 12 ഞായറാഴ്ച മുതല്‍ ഒക്ടോബര്‍ 18 ശനിയാഴ്ച വരെയായിരുന്നു ഈ തീവ്രമായ പരിശോധന.

ട്രാഫിക് നിയമങ്ങള്‍ ലംഘിക്കുന്ന മോട്ടോര്‍ സൈക്കിളുകള്‍ കണ്ടുകെട്ടുക എന്ന ലക്ഷ്യത്തോടെ രാജ്യത്തുടനീളം ഈ കാമ്പയിന്‍ നടപ്പാക്കി.

ഏറ്റവും കൂടുതല്‍ മോട്ടോര്‍ സൈക്കിളുകള്‍ പിടിച്ചെടുത്തത് റിയാദില്‍ നിന്നാണ് 2,625 എണ്ണം. രണ്ടാം സ്ഥാനത്ത് ജിദ്ദയാണ് 1,932 എണ്ണം. കിഴക്കന്‍ പ്രവിശ്യയില്‍ 511 മോട്ടോര്‍ സൈക്കിളുകളാണ് പിടിച്ചെടുത്തത്.

മക്ക, മദീന, താഇഫ്, ഖസീം, അസീര്‍, തബൂക്ക് ഉള്‍പ്പെടെയുള്ള മറ്റ് പ്രദേശങ്ങളില്‍നിന്നും നിയമലംഘനം നടത്തിയ മോട്ടോര്‍ സൈക്കിളുകള്‍ പിടിച്ചെടുത്തിട്ടുണ്ട്.

അനധികൃതമായ ഗതാഗത രീതികള്‍ തടയുന്നതിനും നിയമലംഘകര്‍ക്കെതിരെ നടപടിയെടുക്കുന്നതിനും റോഡ് ഉപയോക്താക്കളുടെ സുരക്ഷ ഉറപ്പാക്കുന്നതിനുമാണ് ഇത്തരം കാമ്പയിനുകളെന്ന് ജനറല്‍ ട്രാഫിക് ഡിപ്പാര്‍ട്ട്മെന്റ് അറിയിച്ചു. ട്രാഫിക് നിയമങ്ങള്‍ ലംഘിക്കാനുള്ള സാധ്യതകള്‍ നിരന്തരം നിരീക്ഷിക്കുന്നുണ്ടെന്നും, എല്ലാവര്‍ക്കും സുരക്ഷിതമായ യാത്രാ അന്തരീക്ഷം ഉറപ്പാക്കാന്‍ നിയമങ്ങളും നിര്‍ദ്ദേശങ്ങളും കര്‍ശനമായി പാലിക്കണമെന്നും ട്രാഫിക് വിഭാഗം പൊതുജനങ്ങളോട് അഭ്യര്‍ഥിച്ചു.