റിയാദ്: സൗദി അടക്കമുള്ള ഫ് രാജ്യങ്ങളുടെയും അറബ് മേഖലയുടെയും ആകാശം ഇന്ന് രാത്രി അപൂര്വമായ ഒരു പ്രതിഭാസത്തിന് സാക്ഷ്യം വഹിക്കാന് ഒരുങ്ങുകയാണ്. ഒറിയോണിഡ് ഉല്ക്കാവര്ഷം അതിന്റെ ഉച്ചസ്ഥായിയില് എത്തുകയാണ്. കിഴക്ക്-തെക്ക് ദിശയില്, പ്രഭാതത്തിന് തൊട്ടുമുമ്പ് ഉല്ക്കാവര്ഷത്തിന്റെ പ്രഭവസ്ഥാനം ആകാശത്ത് ഉയര്ന്ന നിലയില് കാണപ്പെടുന്ന സമയത്ത് ഇത് വ്യക്തമായി നിരീക്ഷിക്കാന് കഴിയുമെന്നാണ് പ്രതീക്ഷിക്കുന്നത്.
ഇത്തവണ ഉല്ക്കാവര്ഷം നിരീക്ഷിക്കുന്നതിനുള്ള സാഹചര്യങ്ങള് അതീവ അനുയോജ്യമാണെന്ന് ജിദ്ദ അസ്ട്രോണമിക്കല് സൊസൈറ്റി തലവന് എഞ്ചിനീയര് മാജിദ് അബു സഹ്ര വിശദീകരിച്ചു. സൂര്യോദയത്തിന് മുന്പ് ചന്ദ്രന് അസ്തമിക്കുന്നതിനാല് ആകാശം ഇരുണ്ടതായിരിക്കും. ഇത് ഉല്ക്കകളെ വ്യക്തമായി കാണാന് സഹായിക്കും. ഒക്ടോബര് 2 മുതല് നവംബര് 7 വരെയാണ് സാധാരണയായി ഒറിയോണിഡ് ഉല്ക്കാവര്ഷം സജീവമാകുന്നത്.
ഒറിയോണിഡ് ഉല്ക്കാവര്ഷം ഇടത്തരം വലിപ്പമുള്ള ഉല്ക്കാവര്ഷമാണ്. നഗരവെളിച്ചത്തില് നിന്ന് അകന്ന സ്ഥലങ്ങളില്, മണിക്കൂറില് ഏകദേശം 20 ഉല്ക്കകള് വരെ കാണാന് സാധിക്കുമെന്ന് മാജിദ് അബു സഹ്ര അറിയിച്ചു.
ഈ ഉല്ക്കാവര്ഷത്തിന്റെ ഉറവിടം ഹാലിയുടെ ധൂമകേതുവാണ്. 2061 ജൂലൈയില് ഈ ധൂമകേതു വീണ്ടും സൂര്യനെ സമീപിക്കും. ചില ഉല്ക്കകള് കത്തിയെരിയുമ്പോള് തിളക്കമുള്ള വാലുകള് അവശേഷിപ്പിക്കാന് സാധ്യതയുണ്ട്. ഇത് നഗ്നനേത്രങ്ങള് കൊണ്ട് കാണാന് കഴിയും.
ഈ മനോഹരമായ കാഴ്ച കാണാന് ടെലസ്കോപ്പോ ബൈനോക്കുലറുകളോ ആവശ്യമില്ല. ഇരുട്ടുള്ളതും വിശാലമായ ആകാശമുള്ളതുമായ ഒരിടം തിരഞ്ഞെടുക്കുക. ആകാശ നിരീക്ഷണം ഇഷ്ടപ്പെടുന്നവര്ക്കും കുടുംബങ്ങള്ക്കും രാജ്യത്തിന്റെ ആകാശത്ത് ഈ അതുല്യമായ കാഴ്ച ആസ്വദിക്കാനുള്ള മികച്ച അവസരമാണിതെന്ന് അദ്ദേഹം പറഞ്ഞു
Related News
