റിയാദ്: 'വിഷന്‍ 2030' ആരംഭിച്ചതിന് ശേഷം ആഗോള പ്രതിസന്ധികളെയെല്ലാം അതിജീവിച്ച് സൗദി സമ്പദ്വ്യവസ്ഥ മൊത്തത്തില്‍ 80 ശതമാനം വളര്‍ച്ച കൈവരിച്ചതായി സൗദി നിക്ഷേപ മന്ത്രി ഖാലിദ് അല്‍-ഫാലിഹ് അറിയിച്ചു. കോവിഡ്-19 മഹാമാരി പോലുള്ള വെല്ലുവിളികള്‍ക്കിടയിലും ഈ വളര്‍ച്ച നിലനിര്‍ത്താന്‍ സൗദിക്ക് കഴിഞ്ഞു.

സ്വകാര്യമേഖല പ്രതിനിധികളുമായി നടന്ന കൂടിക്കാഴ്ചയില്‍ സംസാരിക്കുകയായിരുന്നു അദ്ദേഹം. സൗദി സമ്പദ്വ്യവസ്ഥയുടെ വികാസം തുടരുകയാണെന്നും, മൊത്ത ആഭ്യന്തര ഉത്പാദനത്തിലേക്കുള്ള (ജി.ഡി.പി) സ്വകാര്യമേഖലയുടെ സംഭാവന 2016-ലെ 40 ശതമാനത്തില്‍ നിന്ന് നിലവില്‍ 51 ശതമാനമായി വര്‍ദ്ധിച്ചെന്നും മന്ത്രി വിശദീകരിച്ചു. 2030-ഓടെ ഇത് 65 ശതമാനത്തില്‍ എത്തിക്കാനാണ് രാജ്യം ലക്ഷ്യമിടുന്നത്.


സ്വകാര്യമേഖലയുടെ ജി.ഡി.പി.യിലേക്കുള്ള സംഭാവന നിലവിലെ 2.3 ട്രില്യണ്‍ റിയാലില്‍ നിന്ന് 2.5 ട്രില്യണ്‍ റിയാലായി വര്‍ധിപ്പിക്കേണ്ട വെല്ലുവിളിയാണ് സൗദി അറേബ്യ നേരിടുന്നതെന്നും അദ്ദേഹം ഊന്നിപ്പറഞ്ഞു.

സ്വകാര്യമേഖലയുടെ നിക്ഷേപങ്ങള്‍ വര്‍ഷങ്ങളായി വര്‍ധിക്കുകയും മൊത്തം നിക്ഷേപത്തിന്റെ 30 ശതമാനത്തിന് തുല്യമായ 1.3 ട്രില്യണ്‍ റിയാലില്‍ എത്തുകയും ചെയ്തു. കോടിക്കണക്കിന് റിയാലുകളുടെ സര്‍ക്കാര്‍ ബജറ്റുകള്‍ മാത്രമല്ല, സ്വകാര്യമേഖലയില്‍നിന്നാണ് സൗദി സമ്പദ്വ്യവസ്ഥയിലെ മിക്ക നിക്ഷേപങ്ങളും വരുന്നതെന്നും അല്‍-ഫാലിഹ് പറഞ്ഞു.

രാജ്യത്തെ നിക്ഷേപത്തിന്റെ അളവ് ഇരട്ടിയാക്കുന്നതിന് പിന്നില്‍ ട്രില്യണ്‍ ഡോളര്‍ ബജറ്റുകളും പബ്ലിക് ഇന്‍വെസ്റ്റ്മെന്റ് ഫണ്ടിന്റെ (പി.ഐ.എഫ്) നിക്ഷേപങ്ങളുമാണ് കാരണമെന്ന് എല്ലാവരും കരുതുന്നു. എന്നാല്‍ ഈ കാലയളവിലെ ഏറ്റവും വലിയ സംഭാവന ഇരട്ടിയായി വളര്‍ന്ന സ്വകാര്യമേഖലയില്‍ നിന്നാണ്. സൗദിയിലെ മൊത്തം നിക്ഷേപങ്ങളിലെ സ്വകാര്യമേഖലയുടെ സംഭാവന 60 ശതമാനത്തില്‍നിന്ന് നിലവില്‍ 76 ശതമാനമായി വര്‍ധിച്ചതായും അദ്ദേഹം കൂട്ടിച്ചേര്‍ത്തു.

ഫെഡറേഷന്‍ ഓഫ് ചേംബേഴ്സുമായി സഹകരിച്ചുകൊണ്ട് സംയുക്ത കൗണ്‍സിലുകളുടെ പങ്ക് കൂടുതല്‍ സജീവമാക്കാന്‍ സൗദി അറേബ്യ ശ്രമിക്കുന്നു. വെല്ലുവിളികളെ നേരിടുന്നതില്‍ സമ്പദ്വ്യവസ്ഥയും സ്വകാര്യമേഖലയും ഒരേ നാണയത്തിന്റെ ഇരുവശങ്ങളാണെന്ന് മന്ത്രി ഊന്നിപ്പറഞ്ഞു.

വിദേശ രാജ്യങ്ങളുമായി കൂടുതല്‍ നിക്ഷേപ സംരക്ഷണ കരാറുകളില്‍ ഒപ്പിടാന്‍ മന്ത്രാലയം പ്രവര്‍ത്തിക്കുന്നു. ഇത് വിപണി തുറക്കുകയും, സൗദി കമ്പനികള്‍ നേരിടുന്ന വെല്ലുവിളികള്‍ നീക്കുകയും ചെയ്യും. പ്രാദേശിക വിപണിയില്‍ മാത്രം ഒതുങ്ങാതെ ആഗോള വിപണിയിലേക്ക് വളരാന്‍ ഈ നീക്കം കമ്പനികളെ സഹായിക്കും.

പത്ത് വര്‍ഷം മുമ്പ് ആരംഭിച്ച സാമ്പത്തിക പരിവര്‍ത്തനം അനുദിനം വേഗത്തിലായിക്കൊണ്ടിരിക്കുകയാണ്. ദേശീയ സമ്പദ്വ്യവസ്ഥയുടെ ജീവനാഡിയായ സ്വകാര്യമേഖലയുടെ വളരുന്ന പങ്കാണ് ഇതിന് പിന്നില്‍.

'സൗദി വിപണി ഇനി പ്രാദേശികമല്ല, മറിച്ച് നിക്ഷേപത്തിനും അവസരങ്ങള്‍ക്കുമായി തുറന്നുകൊടുത്ത ആഗോള വിപണിയാണ്. 10 വര്‍ഷം മുമ്പ് സംരംഭങ്ങള്‍ തുടങ്ങിയവര്‍ ഇന്ന് പ്രാദേശിക, ആഗോള വിപണികളിലേക്ക് വികസിപ്പിക്കുന്നതിനെക്കുറിച്ചാണ് സംസാരിക്കുന്നത്,' അല്‍-ഫാലിഹ് പറഞ്ഞു.

പുനരുപയോഗ ഊര്‍ജ്ജം, ശുദ്ധജല സംഭരണം, ഗ്രീന്‍ ഹൈഡ്രജന്‍ എന്നീ മേഖലകളില്‍ ലോകത്തിലെ അതിവേഗം വളരുന്ന കമ്പനികളിലൊന്നായ അക്വാ പവറിനെയും നിലവില്‍ സ്‌പെയിന്‍, ഇന്ത്യ, അല്‍ബേനിയ, ദക്ഷിണ അമേരിക്ക തുടങ്ങിയ വൈവിധ്യമാര്‍ന്ന വിപണികളില്‍ സജീവമായ അല്‍ഫനാറിനെയും മന്ത്രി എടുത്തു പറഞ്ഞു. പ്രാദേശിക വിപണിയെ മറികടന്ന് ഉല്‍പ്പന്നങ്ങള്‍ക്കും നിക്ഷേപങ്ങള്‍ക്കുമായി ലോകത്തെ തുറന്ന വിപണിയായി കാണുന്ന പ്രധാന ദേശീയ കമ്പനികളുടെ ഉദാഹരണങ്ങളാണ് ഇവയെന്നും അദ്ദേഹം കൂട്ടിച്ചേര്‍ത്തു.