ദുബായ്: വലിയ സ്വപ്നങ്ങളും നേട്ടങ്ങളുമായി പ്രവാസലോകത്ത് തിളങ്ങിനിന്ന ആലപ്പുഴ മാവേലിക്കര സ്വദേശി വൈഷ്ണവ് കൃഷ്ണകുമാര് (18) ദുബായില് അകാലത്തില് പൊലിഞ്ഞു. ഗോള്ഡന് വിസ ലഭിച്ച ഈ മിടുക്കനായ വിദ്യാര്ഥി, ചൊവ്വാഴ്ച രാത്രി ഇന്റര്നാഷനല് അക്കാദമിക് സിറ്റിയിലെ ദീപാവലി ആഘോഷങ്ങള്ക്കിടെ ഹൃദയാഘാതം മൂലം കുഴഞ്ഞുവീഴുകയായിരുന്നു. ഉടന്തന്നെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
ബി.ബി.എ. മാര്ക്കറ്റിങ് ഒന്നാം വര്ഷ വിദ്യാര്ഥിയായിരുന്ന വൈഷ്ണവിന്റെ ആകസ്മിക വിയോഗം കുടുംബാംഗങ്ങള്ക്കും സുഹൃത്തുക്കള്ക്കും അധ്യാപകര്ക്കും താങ്ങാനാവാത്ത ദുഃഖമായി. വി.ജി. കൃഷ്ണകുമാര്-വിധു കൃഷ്ണകുമാര് ദമ്പതികളുടെ മകനാണ്. മാതാവ് വിധു ഇതേ സ്കൂളിലെ അധ്യാപികയാണ്.
പഠനത്തിലും പാഠ്യേതര വിഷയങ്ങളിലും ഒരുപോലെ കഴിവുതെളിയിച്ച വൈഷ്ണവ് മറ്റുള്ളവര്ക്ക് പ്രചോദനമായിരുന്നു. 2024-ലെ സി.ബി.എസ്.ഇ. പ്ലസ് ടു പരീക്ഷയില് 97.4% മാര്ക്കും എല്ലാ വിഷയങ്ങള്ക്കും എ-വണ് ഗ്രേഡും നേടിയിരുന്നു. മാര്ക്കറ്റിങ്, എന്റര്പ്രണര്ഷിപ്പ് വിഷയങ്ങളില് നൂറില് നൂറ് മാര്ക്ക് കരസ്ഥമാക്കിയ ഈ നേട്ടമാണ് വൈഷ്ണവിന് യു.എ.ഇ. ഗോള്ഡന് വിസ നേടിക്കൊടുത്തത്. ജെംസ് ഔര് ഓണ് ഇന്ത്യന് സ്കൂളിലെ ഹെഡ് ഓഫ് സ്കൂള് കൗണ്സില്, മോഡല് യുണൈറ്റഡ് നേഷന്സ് ക്ലബ്ബിന്റെയും ഡിബേറ്റിങ് സൊസൈറ്റിയുടെയും പ്രസിഡന്റ് എന്നീ നിലകളിലും പ്രവര്ത്തിച്ചിട്ടുണ്ട്.
സംരംഭകനാകാന് ആഗ്രഹിച്ചിരുന്ന വൈഷ്ണവ്, സാമ്പത്തിക ഉപദേശങ്ങള്, ലൈഫ്സ്റ്റൈല് മോട്ടിവേഷന്, വ്യായാമ മുറകള് എന്നിവ സംബന്ധിച്ച് സമൂഹമാധ്യമങ്ങളിലും സജീവമായിരുന്നു. കൂടുതല് പരിശോധനകള്ക്കായി ദുബായ് പോലീസ് ഫൊറന്സിക് വിഭാഗം നടപടികള് സ്വീകരിച്ചു. നിയമനടപടികള് പൂര്ത്തിയാക്കിയ ശേഷം മൃതദേഹം നാട്ടിലേക്ക് കൊണ്ടുപേകും.
Related News
