ബ്രസ്സല്‍സ്: ഗള്‍ഫ് സഹകരണ കൗണ്‍സില്‍ രാജ്യങ്ങളിലെ പൗരന്മാര്‍ക്ക് അനുവദിച്ച ഷെന്‍കന്‍ വിസകളുടെ എണ്ണത്തില്‍ സൗദി പൗരന്മാര്‍ ഒന്നാം സ്ഥാനത്ത് എത്തിയതായി യൂറോപ്യന്‍ യൂണിയന്റെ ബ്രസ്സല്‍സിലെ പ്രസ് ഓഫീസില്‍ നിന്നുള്ള റിപ്പോര്‍ട്ട് വ്യക്തമാക്കുന്നു. കഴിഞ്ഞ വര്‍ഷം ആകെ 4,70,888 ഷെന്‍കന്‍ വിസകളാണ് സൗദി പൗരന്മാര്‍ക്ക് ലഭിച്ചത്.

ഏറ്റവും പുതിയ കണക്കുകള്‍ പ്രകാരം, കഴിഞ്ഞ വര്‍ഷം ഷെന്‍കന്‍ വിസ നേടിയ മൊത്തം ഗള്‍ഫ് പൗരന്മാരുടെ എണ്ണം 7,75,680 ആണ്. അനുവദിച്ച വിസകളില്‍ 60.7% വിസകളും സൗദി പൗരന്മാര്‍ക്കാണ് ലഭിച്ചത്. 29 രാജ്യങ്ങള്‍ ഉള്‍പ്പെടുന്ന ഷെന്‍കന്‍ മേഖലയില്‍ 45 കോടിയിലധികം ആളുകള്‍ക്ക് അതിര്‍ത്തി പരിശോധനകളില്ലാതെ സ്വതന്ത്രമായി സഞ്ചരിക്കാന്‍ സാധിക്കും. ഇതില്‍ 27 യൂറോപ്യന്‍ യൂണിയന്‍ അംഗരാജ്യങ്ങളും ഉള്‍പ്പെടുന്നു.

കഴിഞ്ഞ വര്‍ഷം ഏപ്രിലില്‍, യൂറോപ്യന്‍ കമ്മീഷന്‍ ജി.സി.സി രാജ്യങ്ങളിലെ പൗരന്മാര്‍ക്ക് അഞ്ച് വര്‍ഷത്തെ മള്‍ട്ടിപ്പിള്‍-എന്‍ട്രി ഷെന്‍കന്‍ വിസ അനുവദിച്ചുകൊണ്ട് ചരിത്രപരമായ തീരുമാനം എടുത്തിരുന്നു. ഇത് വിസ കാലാവധി ഒഴിവാക്കിയതിന് തുല്യമാണെന്ന് സൗദി അറേബ്യയിലെ യൂറോപ്യന്‍ യൂണിയന്‍ അംബാസഡര്‍ ക്രിസ്റ്റോഫ് ഫാര്‍നോ അഭിപ്രായപ്പെട്ടു. ഇത് യൂറോപ്പിലേക്കുള്ള യാത്ര കൂടുതല്‍ എളുപ്പവും സൗകര്യപ്രദവുമാക്കും.

'അഞ്ച് വര്‍ഷത്തെ മള്‍ട്ടിപ്പിള്‍ എന്‍ട്രി വിസ നടപ്പിലാക്കുന്നത് യൂറോപ്യന്‍ യൂണിയനും ഗള്‍ഫ് സഹകരണ കൗണ്‍സിലുമായിട്ടുള്ള ബന്ധം ശക്തിപ്പെടുത്തുന്നതിനുള്ള ഒരു സുപ്രധാന ചുവടുവെപ്പാണ്. ഇത് യൂറോപ്പിലുടനീളമുള്ള വിനോദസഞ്ചാര പ്രവാഹം വര്‍ദ്ധിപ്പിക്കുമെന്നും വരുമാനം കൂട്ടുമെന്നും പ്രതീക്ഷിക്കുന്നു. ഗള്‍ഫ് പങ്കാളികളുമായുള്ള സഹകരണം ശക്തിപ്പെടുത്താനുള്ള യൂറോപ്യന്‍ യൂണിയന്റെ പ്രതിബദ്ധതയാണ് ഇത് എടുത്തു കാണിക്കുന്നത്,' അദ്ദേഹം പറഞ്ഞു.

ഷെന്‍കന്‍ വിസ നേടിയ പൗരന്മാരുടെ എണ്ണത്തില്‍ 1,57,790 വിസകളുമായി കുവൈറ്റ് രണ്ടാം സ്ഥാനത്തെത്തി. 86,500 വിസകളോടെ ഖത്തര്‍ മൂന്നാം സ്ഥാനത്തും, 39,300 വിസകളുമായി ഒമാന്‍ നാലാം സ്ഥാനത്തുമാണ്. 21,170 ഷെന്‍കന്‍ വിസ നേടിയ ബഹ്റൈനാണ് അഞ്ചാം സ്ഥാനത്ത്. അതേസമയം, യുഎഇ പൗരന്മാര്‍ക്ക് വിസയില്ലാതെ 180 ദിവസം വരെ ഷെന്‍കന്‍ രാജ്യങ്ങള്‍ സന്ദര്‍ശിക്കാന്‍ അനുമതിയുണ്ട്.