മക്ക: സൗദി അറേബ്യയില് പുതിയ ഉംറ സീസണ് ആരംഭിച്ച ശേഷം വിദേശ തീര്ഥാടകര്ക്ക് നല്കിയ വിസകളുടെ എണ്ണം 40 ലക്ഷത്തിലധികം കവിഞ്ഞതായി റിപ്പോര്ട്ട്. മുന് സീസണുകളെ അപേക്ഷിച്ച് ഈ വര്ഷത്തെ സീസണ് തുടങ്ങിയ ശേഷമുള്ള വെറും അഞ്ച് മാസത്തിനുള്ളിലാണ് വിദേശങ്ങളില് നിന്നുള്ള ഉംറ തീര്ഥാടകരുടെ എണ്ണം ഈ റെക്കോര്ഡ് കൈവരിച്ചത്.
ഏറ്റവും കൂടുതല് ഉംറ വിസകള് നല്കപ്പെട്ട രാജ്യങ്ങള് പാകിസ്ഥാന്, ഇന്തോനേഷ്യ, ഇന്ത്യ, ഇറാഖ്, ഈജിപ്ത് എന്നിവയാണ്. സൗദിക്ക് പുറത്തുനിന്നുള്ള തീര്ഥാടകര്ക്ക് സര്ക്കാര് സേവനങ്ങള് നല്കുന്നതിനുള്ള ഏകീകൃത ഡിജിറ്റല് പ്ലാറ്റ്ഫോമായ നുസുക് (Nusuk) ആപ്പ് വഴി തീര്ഥാടകര്ക്ക് എളുപ്പത്തില് പെര്മിറ്റുകള് ബുക്ക് ചെയ്യാനും വിവിധ ആവശ്യങ്ങള്ക്ക് ഉപയോഗിക്കാനും കഴിയും. തീര്ഥാടക അനുഭവത്തെ പിന്തുണയ്ക്കുന്ന വൈവിധ്യമാര്ന്ന ഡിജിറ്റല് സേവനങ്ങളും ആപ്പ് വാഗ്ദാനം ചെയ്യുന്നുണ്ട്.
പുതിയ സീസണിനായി സാങ്കേതികവും പ്രവര്ത്തനപരവുമായ തയ്യാറെടുപ്പുകള് ബന്ധപ്പെട്ട അധികാരികളുമായി സഹകരിച്ച് നേരത്തെ ആരംഭിച്ചതായി ഹജ്ജ് ഉംറ മന്ത്രാലയം സൂചിപ്പിച്ചു. സുഗമമായ നടപടിക്രമങ്ങളും സുസ്ഥിരമായ പുരോഗതിയും ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.
തീര്ഥാടകര്ക്ക് മെച്ചപ്പെട്ട സൗകര്യങ്ങള് ഒരുക്കുന്നതിനും നടപടിക്രമങ്ങള് ലളിതമാക്കുന്നതിനും സൗദി ഭരണകൂടം സ്വീകരിക്കുന്ന നടപടികളുടെ ഭാഗമായാണ് ഈ റെക്കോര്ഡ് നേട്ടവും ഡിജിറ്റല് സേവനങ്ങളുടെ വിപുലീകരണവുമെന്നാണ് വിലയിരുത്തപ്പെടുന്നത്.
Related News
