ന്യൂയോര്‍ക്ക്: ഇ-കൊമേഴ്സ് ഭീമനായ ആമസോണ്‍ വന്‍തോതിലുള്ള ഓട്ടോമേഷന്‍ വികസന പദ്ധതികള്‍ക്ക് ശ്രമം തുടങ്ങിയതായി 'ദി ന്യൂയോര്‍ക്ക് ടൈംസ്' റിപ്പോര്‍ട്ട് ചെയ്തു. ഈ നീക്കം അമേരിക്കയിലെ പതിനായിരക്കണക്കിന് ജോലിക്കാരെ ഒഴിവാക്കാന്‍ ലക്ഷ്യമിട്ടുള്ളതാണെന്ന് പറയുന്നു. കമ്പനിയുടെ റോബോട്ടിക്സ് വിഭാഗം, പ്രവര്‍ത്തനങ്ങള്‍ പൂര്‍ണ്ണമായും ഓട്ടോമേറ്റ് ചെയ്യാനുള്ള ലക്ഷ്യത്തോടെയാണ് മുന്നോട്ട് പോകുന്നത്.

ഇതിന്റെ ഭാഗമായി 1.6 ലക്ഷം തൊഴിലാളികളെ ഒഴിവാക്കും. 2027-ഓടെ ഏകദേശം 1.6 ലക്ഷം പുതിയ തൊഴിലാളികളെ നിയമിക്കേണ്ട ആവശ്യം ആമസോണിന് ഇല്ലാതാകുമെന്നാണ് റിപ്പോര്‍ട്ട്. 2025 മുതല്‍ 2027 വരെയുള്ള കാലയളവില്‍ ഏകദേശം 12.6 ബില്യണ്‍ ഡോളര്‍ (ലക്ഷം കോടികള്‍) വരെ ചെലവ് ലാഭിക്കാന്‍ ഈ ഓട്ടോമേഷന്‍ വഴി സാധിക്കുമെന്നാണ് കണക്കാക്കുന്നത്.

2033-ഓടെ ഉല്‍പ്പന്ന വില്‍പ്പന ഇരട്ടിയാക്കാനും എന്നാല്‍ അതിനനുസരിച്ച് തൊഴിലാളികളുടെ എണ്ണം വര്‍ദ്ധിപ്പിക്കാതിരിക്കാനും കമ്പനി ലക്ഷ്യമിടുന്നു. തൊഴിലാളി യൂണിയനുകളുടെയും പൊതുജനങ്ങളുടെയും വിമര്‍ശനം ഒഴിവാക്കാന്‍ 'റോബോട്ടുകള്‍', 'ഓട്ടോമേഷന്‍' എന്നീ വാക്കുകള്‍ക്ക് പകരം 'അഡ്വാന്‍സ്ഡ് ടെക്നോളജി', 'കോബോട്ട്' (കോളാബറേറ്റീവ് റോബോട്ട്) തുടങ്ങിയ പദങ്ങള്‍ ഉപയോഗിക്കാന്‍ കമ്പനി ശ്രമിക്കുന്നതായും ന്യൂയോര്‍ക്ക് ടൈംസ് റിപ്പോര്‍ട്ടില്‍ പറയുന്നു.

അതേസമയം, റിപ്പോര്‍ട്ടിലെ ആരോപണങ്ങള്‍ ആമസോണ്‍ തള്ളിക്കളഞ്ഞു. കമ്പനിയുടെ വക്താവ് കെല്ലി നാന്റല്‍, രേഖകള്‍ അപൂര്‍ണ്ണമാണെന്നും അത് കമ്പനിയുടെ മൊത്തത്തിലുള്ള നിയമനതന്ത്രത്തെ പ്രതിനിധീകരിക്കുന്നില്ലെന്നും വിശദീകരിച്ചു. നിലവില്‍, അടുത്ത അവധിക്കാലത്തിനായി രണ്ടര ലക്ഷം തൊഴിലാളികളെ നിയമിക്കാന്‍ പദ്ധതിയുണ്ടെന്നും കമ്പനി അറിയിച്ചു. എന്നാല്‍, ഇവര്‍ എത്രപേര്‍ സ്ഥിരം തൊഴിലാളികളായിരിക്കും എന്നതിനെക്കുറിച്ച് വ്യക്തതയില്ല. 2018 മുതല്‍ അമേരിക്കയിലെ ആമസോണിന്റെ തൊഴിലാളികളുടെ എണ്ണം 12 ലക്ഷമായി വര്‍ധിച്ചിട്ടുണ്ട്. പുതിയ സാങ്കേതികവിദ്യ റോബോട്ട് പരിപാലനത്തിലും എഞ്ചിനീയറിംഗിലുമുള്ള പുതിയ ജോലികള്‍ സൃഷ്ടിക്കുമെന്നും കമ്പനി വാദിക്കുന്നു.