റിയാദ്- സൗദി ആരോഗ്യമേഖലയുടെ ഭാവി നിര്‍ണയിക്കുന്ന ഗ്ലോബല്‍ ഹെല്‍ത്ത് എക്‌സിബിഷന്‍ ഒക്ടോബര്‍ 27 മുതല്‍ 30 വരെ റിയാദില്‍ നടക്കും. ആരോഗ്യ മന്ത്രാലയത്തിന്റെ സ്‌പോണ്‍സര്‍ഷിപ്പിലും, സൗദി വിഷന്‍ 2030-യുടെ ഭാഗമായ ഹെല്‍ത്ത് സെക്ടര്‍ ട്രാന്‍സ്‌ഫോര്‍മേഷന്‍ പ്രോഗ്രാമിന്റെ പിന്തുണയോടെയുമാണ് ഈ എട്ടാം പതിപ്പ് സംഘടിപ്പിക്കുന്നത്.

റിയാദിലെ മല്‍ഹം ഇന്റര്‍നാഷണല്‍ കണ്‍വെന്‍ഷന്‍ ആന്‍ഡ് എക്‌സിബിഷന്‍ സെന്ററാണ് നാല് ദിവസം നീണ്ടുനില്‍ക്കുന്ന ഫോറത്തിന് വേദിയാകുന്നത്.

ആരോഗ്യമേഖലയിലെ പ്രാദേശികവും അന്തര്‍ദേശീയവുമായ വിദഗ്ധരെയും, നിക്ഷേപകരെയും, നേതാക്കളെയും ഒരുമിപ്പിക്കുന്ന ഈ മേഖലയിലെ ഏറ്റവും പ്രധാനപ്പെട്ട പരിപാടിയാണിത്. 25-ല്‍ അധികം രാജ്യങ്ങളില്‍ നിന്നുള്ള 500-ല്‍ പരം അന്താരാഷ്ട്ര സ്പീക്കറുകളും വിദഗ്ധരും ഫോറത്തില്‍ അണിനിരക്കും.

ആരോഗ്യ സംരക്ഷണത്തിലെ ഏറ്റവും പുതിയ ട്രെന്‍ഡുകള്‍ അവലോകനം ചെയ്യുക, വൈദഗ്ധ്യം കൈമാറ്റം ചെയ്യുക, പ്രാദേശികവും അന്തര്‍ദേശീയവുമായ ആരോഗ്യമേഖലകളില്‍ കൂടുതല്‍ സംയോജനം ഉറപ്പാക്കുന്ന പങ്കാളിത്തങ്ങള്‍ സ്ഥാപിക്കുക എന്നിവയാണ് ഫോറത്തിന്റെ പ്രധാന ലക്ഷ്യങ്ങള്‍.

ആരോഗ്യ സാങ്കേതികവിദ്യകളിലും സേവനങ്ങളിലും ശ്രദ്ധ കേന്ദ്രീകരിക്കുന്ന 2,000-ത്തിലധികം ബ്രാന്‍ഡുകള്‍ പ്രദര്‍ശനത്തില്‍ പങ്കെടുക്കും. സൗദി ഹെല്‍ത്ത് ഹോള്‍ഡിംഗ് കമ്പനി, സൗദി കമ്മീഷന്‍ ഫോര്‍ ഹെല്‍ത്ത് സ്‌പെഷ്യലൈസേഷന്‍സ്, നാഷണല്‍ യൂണിഫൈഡ് പ്രൊക്യുര്‍മെന്റ് കമ്പനി, ദല്ല ഹെല്‍ത്ത്‌കെയര്‍ കമ്പനി, അല്‍ ഹയാത്ത് നാഷണല്‍ ഹോസ്പിറ്റല്‍സ്, ലീന്‍ ബിസിനസ് സര്‍വീസസ് കമ്പനി, സൗദി ടെലികോം കമ്പനി, അബീര്‍ മെഡിക്കല്‍ ഗ്രൂപ്പ് തുടങ്ങിയ പ്രമുഖ സ്ഥാപനങ്ങള്‍ പങ്കുചേരും.

ഫോറത്തിന്റെ ഭാഗമായി സമഗ്രമായ അക്കാദമിക പരിപാടി ക്രമീകരിച്ചിട്ടുണ്ട്. പ്രൈമറി കെയര്‍ മുതല്‍ ഡിജിറ്റല്‍ ട്രാന്‍സ്‌ഫോര്‍മേഷന്‍, മെഡിക്കല്‍ സാങ്കേതികവിദ്യകള്‍, ജീവിത നിലവാരം എന്നിവ വരെ ഉള്‍ക്കൊള്ളുന്ന 120-ല്‍ അധികം കണ്ടിന്യൂയിംഗ് മെഡിക്കല്‍ എജ്യുക്കേഷന്‍ അക്രഡിറ്റഡ് സെഷനുകളും പ്രത്യേക വര്‍ക്ക്ഷോപ്പുകളും ഇതില്‍ ഉള്‍പ്പെടും.

സൗദി ആരോഗ്യമേഖലയിലെ വേഗത്തിലുള്ള ഡിജിറ്റല്‍ പരിവര്‍ത്തനത്തിന് ഫോറം ഊന്നല്‍ നല്‍കുന്നു. മൈക്രോസോഫ്റ്റ് ഗ്ലോബല്‍ മെഡിക്കല്‍ ഡയറക്ടറും ഹെല്‍ത്ത്‌കെയര്‍ വൈസ് പ്രസിഡന്റുമായ ഡോ. ഡേവിഡ് റോവ് രാജ്യത്തിന്റെ ഈ രംഗത്തെ വളര്‍ച്ചയെ പ്രശംസിച്ചു.