ജിദ്ദ : ജീവിതം സേവനം കൊണ്ട് അടയാളപ്പെടുത്തി കടന്നുപോയ പൊതുപ്രവര്ത്തകനാണ് തേങ്കോട് അബ്ദുല്കരീം മൗലവിയെന്ന് പ്രമുഖ പണ്ഡിതന് ഓണമ്പിള്ളി മുഹമ്മദ് ഫൈസി അഭിപ്രായപ്പെട്ടു. മുപ്പത്തിയഞ്ചു വര്ഷത്തെ മക്കയിലെ ജീവിതകാലം മുഴുവന് ഹാജ് സേവനത്തിനായി കാഴ്ചവെച്ച കരീം മൗലവിയുടെ ജീവിതം ധാന്യമാണ്. അത് നാഥന്റെ അടുക്കല് വലിയ സ്വീകാര്യതക്ക് കാരണമാകുമെന്ന് അദ്ദേഹം പറഞ്ഞു. ജിദ്ദ സീസണ്സ് ഓഡിറ്റോറിയത്തില് ജിദ്ദ കെഎംസിസി എറണാകുളം ജില്ലാ കമ്മിറ്റി സംഘടിപ്പിച്ച അനുസ്മരണ യോഗത്തില് മുഖ്യ പ്രഭാഷണം നടത്തുകയായിരുന്നു ഓണമ്പിള്ളി.
രാജ്യത്തിന്റെ ഭരണാധികാരികള്ക്കോ പ്രാര്ത്ഥനയും വൃതവും നിത്യചര്യയാക്കിയവര്ക്കോ ലഭിക്കാത്ത നേട്ടം കഷ്ട്ടപ്പെടുന്നവരെ സഹായിക്കുന്നവര്ക്ക് രക്ഷിതാവിന്റെ അടുക്കല് ഉണ്ടാകുമെന്ന സൂചനകള് പണ്ഡിതന്മാര് ഓര്മപ്പെടുത്തിയ കാര്യം അദ്ദേഹം ഊന്നി പറഞ്ഞു. മുപ്പത്തിയഞ്ചു വര്ഷകാലത്തെ പ്രവാസം മതിയാക്കി നാട്ടിലെത്തി രണ്ടാഴ്ച പിന്നിട്ടപ്പോഴാണ് കരീം മൗലവി മരണപ്പെട്ടത്.
ചടങ്ങില് എറണാകുളം ജില്ലാ പ്രസിഡണ്ട് റഷീദ് ചാമക്കാട്ട് അദ്ധ്യക്ഷത വഹിച്ചു. കെഎംസിസി നാഷണല് കമ്മിറ്റി സെക്രട്ടറി നാസര് എടവനക്കാട് ഉദ്ഘാടനം ചെയ്തു. ഷറഫുദ്ദീന് ബാഖവി ചുങ്കപ്പാറ പ്രാര്ത്ഥന നിര്വഹിച്ചു. സി കെ റസാഖ് മാസ്റ്റര്, വി പി മുസ്തഫ, ശിഹാബ് താമരക്കുളം, നസീര് വാവക്കുഞ്ഞു, അനസ് അരിമ്പ്രശ്ശേരി, ലത്തീഫ് മുസ്ലിയാരങ്ങാടി, മുസ്തഫ കോഴിശ്ശേരി ,സുബൈര് വട്ടോളി നൈസാം സാംബ്രിക്കല്, ഷബീര് അലി പല്ലാരിമംഗലം എന്നിവര് സംസാരിച്ചു. ജാബിര് മടിയൂര് സ്വാഗതവും അഷ്റഫ് മൗലവി പല്ലാരിമഗലം നന്ദിയും പറഞ്ഞു സുലൈമാന് അഹ്സനി മയ്യിത്ത് നമസ്കാരത്തിന് നേതൃത്വം നല്കി.
Related News
