റിയാദ്: ഈ വര്ഷത്തെ സൗദി ദേശീയ വനവത്കരണ സീസണിന് ഇന്നു തുടക്കം കുറിക്കും. 'ദേശീയ വനവത്കരണ പരിപാടി'യുടെ ആഭിമുഖ്യത്തില് 'ഒരു കൈ നടുന്നു, ഒരു നാട് തളിര്ക്കുന്നു' മുദ്രാവാക്യത്തിലാണ് ഈ വര്ഷത്തെ സീസണ് രാജ്യവ്യാപകമായി സംഘടിപ്പിക്കുന്നത്. രാജ്യമൊട്ടാകെ മരംനടല് സംസ്കാരം പ്രോത്സാഹിപ്പിക്കുക, സൗദി ഗ്രീന് ഇനിഷ്യേറ്റീവിന്റെ ലക്ഷ്യങ്ങള് നേടുന്നതിന് സംഭാവന നല്കുക, സസ്യജാലങ്ങളുടെ വളര്ച്ച ഉറപ്പാക്കുക, മണ്ണിന്റെ ശോഷണം കുറയ്ക്കുക, എന്നിവയാണ് കാമ്പയിനിലൂടെ ലക്ഷ്യമിടുന്നത്.
കഴിഞ്ഞ വര്ഷം നടന്ന ആദ്യ ദേശീയ മരം നടല് സീസണ് രാജ്യത്തുടനീളം വലിയ നേട്ടങ്ങള് കൈവരിച്ചതായി ദേശീയ വനവത്കരണ പരിപാടി വെളിപ്പെടുത്തി. നട്ടുപിടിപ്പിച്ച മരങ്ങളുടെ എണ്ണം വര്ധിപ്പിക്കുക, നശിച്ച ഭൂമിയെ പുനഃസ്ഥാപിക്കുക, സാമൂഹിക പങ്കാളിത്തത്തിന്റെ വ്യാപ്തി വികസിപ്പിക്കുക, സമൂഹത്തിലെ എല്ലാ വിഭാഗങ്ങള്ക്കിടയിലും പാരിസ്ഥിതിക അവബോധം വളര്ത്തുക എന്നിവക്കു വനവല്ക്കരണ പരിപാടി സഹായകരമായി. സുസ്ഥിരത എന്ന ആശയം ഏകീകരിക്കുകയും സസ്യജാലങ്ങളെ സംരക്ഷിക്കുന്നതിലും വികസിപ്പിക്കുന്നതിലും എല്ലാ മേഖലകളുടെയും സമൂഹത്തിലെ അംഗങ്ങളുടെയും പങ്ക് ഉള്ക്കൊള്ളുകയും ചെയ്യുന്ന ഒരു പാരിസ്ഥിതിക, സാമൂഹിക മുന്നേറ്റമാണ് ദേശീയ മരം നടല് സീസണ്. ഇത് വിഷന് 2030-ന്റെ ലക്ഷ്യങ്ങള് കൈവരിക്കുന്നതിന് വേണ്ടിയുള്ള ശ്രമങ്ങളുടെ ഭാഗം കൂടിയാണ്.
Related News
