ജിദ്ദ: ഇന്ത്യയുടെ മതേതരത്വം ഇന്ന് അത്യന്തം അപകടകരമായ ഒരു ഘട്ടത്തിലൂടെയാണ് കടന്നുപോകുന്നതെന്ന് കെപിസിസി ജനറല് സെക്രട്ടറി പഴകുളം മധു അഭിപ്രായപ്പെട്ടു. ബിജെപി സര്ക്കാരിനൊപ്പം മതേതരത്വം നടിക്കുന്ന ഇടതുപക്ഷവും ഹിന്ദുവത്വ അജണ്ടകള്ക്ക് വഴങ്ങുകയാണെന്ന അദ്ദേഹത്തിന്റെ വാക്കുകള് ശ്രദ്ധേയമായി. ജിദ്ദയിലെ ഒഐസിസി പത്തനംതിട്ട ജില്ലാ കമ്മറ്റിയുടെ 33-ാമത് വാര്ഷിക സമ്മേളനത്തോടനുബന്ധിച്ച് നല്കിയ സ്വീകരണത്തില് സംസാരിക്കുകയായിരുന്നു അദ്ദേഹം.
രാജ്യത്തെ ബിജെപി സര്ക്കാരിനെ കൂടാതെ, മതേതരത്വത്തിന്റെ പേര് പറഞ്ഞിരുന്ന ഇടതുപക്ഷവും ഇന്ന് ഹിന്ദുവത്വ അജണ്ടകള് നടപ്പാക്കുന്നതില് മുന്നിട്ട് നില്ക്കുന്നു എന്ന ആശങ്കയും പഴകുളം മധു പങ്കുവെച്ചു. കേരള സര്ക്കാര് NEP നടപ്പാക്കുന്നതിനായി പിഎം ശ്രീയില് ഒപ്പുവെച്ചത് വഴി, കേരളത്തിലെ വിദ്യാഭ്യാസ രംഗവും ആര്എസ്എസ് അജണ്ടകള്ക്ക് കീഴ്പ്പെട്ടിരിക്കുകയാണ്. അഴിമതിയും കെടുകാര്യസ്ഥതയും മുഖമുദ്രയായ കേരള സര്ക്കാര്, ഇനിയൊരു ഭരണം ലഭിക്കില്ല എന്ന തിരിച്ചറിവില് ആരാധനാലയങ്ങളെ വരെ കൊള്ളയടിക്കുകയാണെന്നും അദ്ദേഹം ആരോപിച്ചു.
രാജ്യത്തെ ജനങ്ങളെ ഒന്നിപ്പിച്ച് മതേതരത്വം കാത്തുരക്ഷിക്കാന് രാഹുല് ഗാന്ധി നടത്തുന്ന ശ്രമങ്ങള് വിജയം കാണുക തന്നെ ചെയ്യുമെന്നും അദ്ദേഹം പറഞ്ഞു. ഇലക്ഷന് കമ്മീഷന് ഉള്പ്പെടെയുള്ള സ്ഥാപനങ്ങള് സംശയത്തിന്റെ നിഴലില് നില്ക്കുമ്പോഴും ഇതിനെയെല്ലാം അതിജീവിച്ച് കോണ്ഗ്രസ് അധികാരത്തില് തിരിച്ചെത്തും. വരാനിരിക്കുന്ന പഞ്ചായത്ത് തിരഞ്ഞെടുപ്പില് യുഡിഎഫ് അതിശക്തമായ വിജയം നേടും. 2026-ലെ നിയമസഭാ തിരഞ്ഞെടുപ്പില് കോണ്ഗ്രസ് നേതൃത്വം നല്കുന്ന യുഡിഎഫ് അധികാരത്തിലെത്തുമെന്നും അദ്ദേഹം പ്രത്യാശ പ്രകടിപ്പിച്ചു. പ്രവാസലോകത്തെ ഒഐസിസിയുടെ നിസ്വാര്ത്ഥ പ്രവര്ത്തനങ്ങളെ അദ്ദേഹം പ്രശംസിച്ചു. പത്തനംതിട്ട ജില്ലാ കമ്മറ്റി നാട്ടില് നടത്തിയ സഹായ പ്രവര്ത്തനങ്ങള് കോണ്ഗ്രസിന് കരുത്തുപകരുന്നതാണെന്നും അദ്ദേഹം എടുത്തുപറഞ്ഞു.
ജില്ലാ പ്രസിഡന്റ് അയൂബ്ഖാന് പന്തളത്തിന്റെ അധ്യക്ഷതയില് നടന്ന പൊതുസമ്മേളനം ഒഐസിസി നാഷണല് കമ്മറ്റി പ്രസിഡന്റ് ബിജു കല്ലുമല ഉദ്ഘാടനം ചെയ്തു. ഒഐസിസി റീജിയണല് കമ്മറ്റി പ്രസിഡന്റ് ഹക്കിം പാറയ്ക്കല് മുഖ്യപ്രഭാഷണം നടത്തി. അലി തെക്കു തോട്, അനില് കുമാര് പത്തനംതിട്ട, മനോജ് മാത്യു അടൂര്, അഷറഫ് അഞ്ചാലന്, അസാബ് വര്ക്കല, ഷെരീഫ് അറയ്ക്കല്, ഷെറഫ് പത്തനംതിട്ട തുടങ്ങിയവര് സംസാരിച്ചു. സുജു കെ രാജു ആയിരുന്നു പരിപാടികളുടെ അവതാരകന്. ചടങ്ങില് അലി തേക്കുതോട്, ചാക്കോ കുരുവിള എന്നിവരെ ആദരിച്ചു. വിലാസ് അടൂര്,
സിയാദ് അബ്ദുള്ള, എബി കെ ചെറിയാന്, സൈമണ് വര്ഗീസ്, ജോബി ടി ബേബി, സാബു ഇടിക്കുള,ലിജു ഏനാത് ഷിജോയ്, ഷാനവാസ്, നവാസ് ചിറ്റാര്, എബി ജോര്ജ്ജ്,അബ്ദുല് മുനീര് എന്നിവര് നേതൃത്വം കൊടുത്തു.
തുടര്ന്ന് നടന്ന കലാസന്ധ്യയും നൃത്തങ്ങളും ആഘോഷ രാവിന് മാറ്റ് കൂട്ടി. ജിദ്ദയുടെ കലാകാരന്മാരായ മിര്സ ഷെരീഫ്, ഡോ. മുഹമ്മദ് ഹാരിസ്, ബൈജു ദാസ്, വിജേഷ് ചന്ദ്രു, ജോബി ടി ബേബി, മുംതാസ് അബ്ദുറഹ്മാന്, സോഫിയ സുനില്, നാണി, വിവേക്, ഷറഫ് എന്നിവര് ഉള്പ്പെട്ട സംഘം ഗാനങ്ങള് ആലപിച്ചു. നര്ത്തകി ശ്രീധ ടീച്ചറും സംഘവും അവതരിപ്പിച്ച നൃത്തവും ശ്രദ്ധേയമായി.
Related News
