റിയാദ് : റിയാദില് സംഘടിപ്പിച്ച ശ്രീലങ്കന് സംരംഭകരുടെയും നിക്ഷേപകരുടെയും ബിസിനസ് നെറ്റ്വര്ക്കിംഗ് സംഗമം വന് വിജയമായി. സൗദി അറേബ്യയും മറ്റ് ഗള്ഫ് രാജ്യങ്ങളുമായുള്ള വ്യാപാര ബന്ധം ശക്തിപ്പെടുത്തുന്നതിനുള്ള സുപ്രധാന ചുവടുവയ്പ്പായി ഈ പരിപാടി വിലയിരുത്തപ്പെടുന്നു.
ശ്രീലങ്കന് വ്യവസായ പ്രമുഖനായ മിസ്റ്റര് പാലിത രത്നപാലയുടെ ആശയമായിരുന്നു ഈ സംഗമത്തിന് പിന്നില്.
ശ്രീലങ്കയുടെയും സൗദി അറേബ്യയുടെയും ദേശീയ ഗാനങ്ങള് ആലപിച്ചുകൊണ്ട് തുടങ്ങിയ ചടങ്ങില്, മാലിദ്വീപ് റിപ്പബ്ലിക്കിന്റെ അംബാസഡറുടെ സാന്നിധ്യം ശ്രദ്ധേയമായി. റിയാദിലെ ശ്രീലങ്കന് സ്കൂള് പ്രിന്സിപ്പല് ഡോ. റുക്ഷന് റസാഖ് മുഖ്യപ്രഭാഷണം നടത്തി. രാജ്യങ്ങള് തമ്മിലുള്ള സഹകരണത്തിന്റെയും നൂതനത്വത്തിന്റെയും സമൂഹ നിര്മ്മാണത്തിന്റെയും പ്രാധാന്യം അദ്ദേഹം ഊന്നിപ്പറഞ്ഞു.
ലോജിസ്റ്റിക്സ്, റിയല് എസ്റ്റേറ്റ്, കാര്ഷികം, സാങ്കേതികവിദ്യ, കോസ്മെറ്റിക്സ് തുടങ്ങിയ വിവിധ മേഖലകളിലെ പ്രമുഖ ശ്രീലങ്കന് കമ്പനികള് തങ്ങളുടെ ആഗോള സാധ്യതകള് സംഗമത്തില് അവതരിപ്പിച്ചു.
പങ്കെടുക്കാനായി 100-ല് അധികം കമ്പനികള് അപേക്ഷിച്ചെങ്കിലും, വലിയ സാധ്യതകളും വാഗ്ദാനങ്ങളുമുള്ള സംരംഭകരെ മാത്രമാണ് തിരഞ്ഞെടുത്ത് അവതരിപ്പിച്ചത്. ഈ തിരഞ്ഞെടുപ്പ്, ഗള്ഫ് മേഖലയില് പോസിറ്റീവായ വ്യാപാര ഫലങ്ങള് നേടുന്നതിന് കാരണമായതായി സംഘാടകര് അറിയിച്ചു.
റിയല് എസ്റ്റേറ്റ്/നിര്മ്മാണ രംഗത്തെ ഹോം ലാന്ഡ്സ്, റോസെല്ല്, ആര്ട്ട് ഡെക്കോര്, ഭക്ഷ്യോത്പന്നങ്ങള്/കാര്ഷിക രംഗത്തെ പിലാവത്തെ ഡയറി, അമ്പിവെല്ല ഡയറി, സിനോമിയ എക്സ്പോര്ട്ട്, ഹാരിസ് ചന്ദ്ര , ആനോഡ്സ് കൊക്ക, ലോജിസ്റ്റിക്സ്/ഐ.ടി വിഭാഗത്തിലെ എന് ഡബ്യു സി ഹോള്ഡിങ്സ്, സ്കാന് വെല് ലോജിസ്റ്റിക്സ്, ബ്ലൂ ലോട്ടസ്. കൂടാതെ പിന്റന്ന ഊദ്, ബ്രട്ടീഷ് കോസ്മെറ്റിക്സ്, ജെംസ് ഫ്രം അജിത്, നെസ്റ്റെജിന് തുടങ്ങിയ കമ്പനികള് പരിപാടിയില് പങ്കെടുത്തു.
