ജിദ്ദ: മുന് പ്രധാനമന്ത്രി ഇന്ദിരാ ഗാന്ധി, സര്ദാര് വല്ലഭായി പട്ടേല്, മുന് മുഖ്യമന്ത്രി ഉമ്മന് ചാണ്ടി എന്നിവരുടെ ഓര്മ്മകള്ക്ക് മുന്പില് ആദരം അര്പ്പിച്ച് ഒഐസിസി വെസ്റ്റേണ് റീജിയണല് കമ്മിറ്റി. ഇന്ദിരാ പ്രിയദര്ശിനിയുടെ 41-ാമത് രക്തസാക്ഷിത്വ ദിനവും, ഇന്ത്യയുടെ ഉരുക്കുമനുഷ്യന് സര്ദാര് പട്ടേല്, അതുല്യനായ നേതാവ് ഉമ്മന് ചാണ്ടി എന്നിവരുടെ ജന്മദിനവും ഒഐസിസി ആദരപൂര്വ്വം ആചരിച്ചു. ഒഐസിസി വെസ്റ്റേണ് റീജിയണല് കമ്മിറ്റി ഓഫീസില് പ്രസിഡന്റ് ഇന് ചാര്ജ് സഹീര് മാഞ്ഞാലിയുടെ അധ്യക്ഷതയിലാണ് യോഗം ചേര്ന്നത്.
ഇന്ദിരാ ഗാന്ധി ത്യാഗത്തിന്റെ അഗ്നിജ്വാലയായിരുന്നു എന്ന് ഒഐസിസി വെസ്റ്റേണ് റീജിയണല് ജനറല് സെക്രട്ടറി മനോജ് മാത്യു അടൂര് അനുസ്മരിച്ചു. സമാനതകളില്ലാത്ത പ്രതിസന്ധികളിലൂടെ രാജ്യത്തെയും പാര്ട്ടിയെയും വിജയത്തിലെത്തിച്ച കരുത്തയായ നേതാവായിരുന്നു അവര്.
സ്വാതന്ത്ര്യസമര കാലത്ത് കോണ്ഗ്രസിനെ ഗാന്ധിജിയോടൊപ്പം ഒറ്റക്കെട്ടായി നിലനിര്ത്താനും, സ്വാതന്ത്ര്യാനന്തരം രാജ്യത്തെ ഒറ്റക്കെട്ടായി നിലനിര്ത്താന് നെഹ്റുവിനോടൊപ്പം പ്രവര്ത്തിക്കാനും സാധിച്ച ദീര്ഘദര്ശിയായ നേതാവാണ് പട്ടേല് എന്ന് ഒഐസിസി നാഷണല് കമ്മിറ്റി സെക്രട്ടറി അനില്കുമാര് പത്തനംതിട്ട അഭിപ്രായപ്പെട്ടു.
ഭരണാധികാരികളുടെ ഇടയില് കാരുണ്യത്തിന്റെ ഉറവ വറ്റാത്ത വ്യക്തിത്വമായിരുന്നു മുന് മുഖ്യമന്ത്രി ഉമ്മന് ചാണ്ടി എന്ന് ഒഐസിസി റീജിയണല് ജനറല് സെക്രട്ടറി അസ്ഹബ് വര്ക്കല അനുസ്മരിച്ചു. ഏതൊരു സാധാരണ വ്യക്തിക്കും സമീപിക്കാനും പ്രശ്നങ്ങള് പറയാനും സാധിക്കുന്ന നേതാവെന്ന നിലയില് അദ്ദേഹത്തിന്റെ സ്മരണ മരണത്തിനും അപ്പുറം ദീപ്തമായി നിലനില്ക്കുകയാണ്.
യോഗത്തില് പങ്കെടുത്ത നേതാക്കള് ത്രിമൂര്ത്തികളുടെ ഛായാചിത്രങ്ങളില് പുഷ്പാര്ച്ചന നടത്തി ആദരം അര്പ്പിച്ചു. രാധാകൃഷ്ണന് കാവുമ്പായി, ആസാദ് പോരൂര്, സിമി അബ്ദുല് ഖാദര് എന്നിവര് യോഗത്തില് സംസാരിച്ചു.
Related News
