തിരുവനന്തപുരം: കേരളപ്പിറവി ദിനത്തില്‍ സംസ്ഥാനത്തെ അതിദാരിദ്ര്യമുക്തമായി പ്രഖ്യാപിച്ച് മുഖ്യമന്ത്രി പിണറായി വിജയന്‍. തിരുവനന്തപുരം സെന്‍ട്രല്‍ സ്റ്റേഡിയത്തില്‍ നടന്ന ചടങ്ങില്‍ നടന്‍ മമ്മൂട്ടി വിശിഷ്ടാതിഥിയായി പങ്കെടുത്തു. ഒന്‍പതു മാസത്തെ ഇടവേളക്കു ശേഷമാണ് മമ്മൂട്ടി പൊതുവേദിയില്‍ പ്രത്യക്ഷപ്പെട്ടത്. വിവിധ വകുപ്പ് മന്ത്രിമാരും ചടങ്ങില്‍ അണിനിരന്നു.

ഭൂപരിഷ്‌കരണം, സാര്‍വത്രിക വിദ്യാഭ്യാസം, ജനകീയാസൂത്രണം, സമ്പൂര്‍ണ സാക്ഷരത തുടങ്ങിയ രാജ്യം അത്ഭുതത്തോടെ നോക്കിക്കണ്ട കേരള മാതൃകകളുടെ പട്ടികയില്‍ ഇനി അതിദാരിദ്ര്യമുക്ത സംസ്ഥാനം എന്ന നേട്ടവും ഇടംപിടിക്കും.

കേരളത്തെ അതിദരിദ്രരില്ലാത്ത സംസ്ഥാനമായി മുഖ്യമന്ത്രി പിണറായി വിജയന്‍ ഇന്ന് രാവിലെ പ്രത്യേക നിയമസഭാ സമ്മേളനത്തില്‍ ചട്ടം 300 പ്രകാരം പ്രഖ്യാപിച്ചിരുന്നു. നിര്‍ഭാഗ്യകരമായ ഒരു സാങ്കേതിക പ്രശ്‌നം കാരണം സര്‍ക്കാരിന്റെ കണക്കുകളില്‍ ഒരു കുടുംബം മാത്രം ബാക്കിയായിരുന്നു. എന്നാല്‍, അവസാന മന്ത്രിസഭാ യോഗത്തില്‍ അതും പരിഹരിച്ചതോടെ 64,006 കുടുംബങ്ങളും അതിദാരിദ്ര്യ മുക്തമായി. ഇതൊരു തട്ടിപ്പല്ല, യാഥാര്‍ഥ്യമാണ് എന്ന് ഉള്‍ക്കൊള്ളാന്‍ വേണ്ടിയാണ് കണക്കുകള്‍ നിരത്തിയത്. പദ്ധതി നടപ്പാക്കാന്‍ കഴിഞ്ഞതിലൂടെ അസാധ്യം എന്നൊന്നില്ല എന്ന് തെളിയിക്കാനായി എന്നും മുഖ്യമന്ത്രി പറഞ്ഞു. ഇന്ത്യന്‍ ഭരണഘടന വിഭാവനം ചെയ്യുന്ന സാമ്പത്തിക സമത്വം എന്ന അടിസ്ഥാന അവകാശത്തിന്റെ പ്രായോഗികമായ സാക്ഷാത്കാരമാണിത്. ഇത് ആരുടെയും ഔദാര്യമല്ല, മറിച്ച് പാവപ്പെട്ടവന്റെ അവകാശമാണ് എന്നും മുഖ്യമന്ത്രി കൂട്ടിച്ചേര്‍ത്തു.

കേരളം തന്നെക്കാള്‍ ഇളയതും ചെറുപ്പവുമാണെന്ന് അതിദാരിദ്ര്യ മുക്ത സംസ്ഥാനമായി കേരളത്തെ പ്രഖ്യാപിക്കുന്ന ചടങ്ങില്‍ വിശിഷ്ടാതിഥി ആയി പങ്കെടുത്തുകൊണ്ട് മമ്മൂട്ടി പറഞ്ഞു. സാമൂഹ്യ സേവന രംഗത്ത് കേരളം ഒരുപാട് മുന്നിലാണ്. നമ്മുടെ ജനാധ്യപത്യ ബോധത്തിന്റെ ഫലമാണ് കേരളത്തിന്റെ ഈ നേട്ടങ്ങളെല്ലാം. അതിദാരിദ്ര്യം മാത്രമേ മുക്തമാകുന്നുള്ളൂ. ദാരിദ്ര്യം ഇനിയും നമ്മുടെ മുന്നില്‍ ബാക്കിയാണ്. സ്വാതന്ത്ര്യം കിട്ടിയ കാലത്തെക്കാള്‍ നമ്മുടെ ദാരിദ്ര്യ രേഖ ഇന്ന് കുറഞ്ഞു. മുഖ്യമന്ത്രി വലിയ ഉത്തരവാദിത്തമാണ് ഏറ്റെടുക്കുന്നതെന്നും മമ്മൂട്ടി പറഞ്ഞു.

സാഹോദര്യവും സമര്‍പ്പണവും ജനങ്ങളില്‍ നിന്നും ഉണ്ടാകണം. 9 മാസമായി ഒരു പൊതുവേദിയിലോ നാട്ടിലോ ഇറങ്ങാത്ത ആളാണ് താന്‍. എറണാകുളത്തുനിന്ന് യാത്ര ചെയ്താണ് താന്‍ തിരുവനന്തപുരത്തേക്ക് വന്നത്. ഇപ്പോള്‍ വന്നപ്പോള്‍ കണ്ണഞ്ചിപ്പിക്കുന്ന വികസനം ഉണ്ടായിട്ടുണ്ട്. രാജപാതകളും വലിയ കെട്ടിടങ്ങളും നിര്‍മിക്കുന്നതു കൊണ്ട് മാത്രം വികസനം കൈവരിക്കില്ല. സാമൂഹിക ജീവിതം വികസിക്കണമെങ്കില്‍ ദാരിദ്ര്യം സമ്പൂര്‍ണമായി തുടച്ചുനീക്കപ്പെടണം. വിശക്കുന്ന വയറിനു മുന്നില്‍ ഒരു വികസനത്തിനും വിലയില്ലെന്നും എല്ലാവര്‍ക്കും കേരളപ്പിറവി ദിനാശംസകള്‍ നേരുന്നതായും മമ്മൂട്ടി പറഞ്ഞു.