ജിദ്ദ: സൗദിയ എയര്ലൈന്സ് തങ്ങളുടെ ആദ്യത്തെ പൂര്ണ്ണമായും ഇന്റര്നെറ്റ് സൗകര്യമുള്ള വിമാനം പുറത്തിറക്കി. ഈ സേവനം പരീക്ഷിച്ച് യാത്രക്കാരില് നിന്നും ഉപയോക്താക്കളില് നിന്നും അഭിപ്രായങ്ങള് ശേഖരിക്കുന്നതിനുള്ള പൈലറ്റ് ഘട്ടമായാണ് ഇത് ആരംഭിച്ചത്. യാത്രാനുഭവം മെച്ചപ്പെടുത്തുന്നതിനും സമഗ്രവും ഉയര്ന്ന കാര്യക്ഷമതയുമുള്ള ഡിജിറ്റല് കണക്റ്റിവിറ്റി നല്കുകയുമാണ് ലക്ഷ്യം.
ഔദ്യോഗികമായി ആരംഭിച്ചാല് ഈ സേവനം എല്ലാ യാത്രക്കാര്ക്കും സൗജന്യമായി ലഭ്യമാക്കും. ഈ സാങ്കേതികവിദ്യ, നിലവില് സെക്കന്ഡില് 300 മെഗാബിറ്റ് വരെ വേഗതയില് തടസ്സമില്ലാത്ത കണക്ഷന് നല്കുന്നു. ഭാവിയില് ഇത് സെക്കന്ഡില് 800 മെഗാബിറ്റ് വരെ വര്ദ്ധിപ്പിക്കാന് സാധ്യതയുണ്ട്. ഇതിലൂടെ യാത്രക്കാര്ക്ക് ഇന്റര്നെറ്റ് ബ്രൗസ് ചെയ്യാനും, ലൈവ് സ്ട്രീമുകള് കാണാനും, വിവിധ ആപ്ലിക്കേഷനുകള് വഴി തടസ്സമില്ലാതെ വെര്ച്വല് മീറ്റിംഗുകള് നടത്താനും സാധിക്കും. കൂടാതെ, ഒന്നിലധികം ഉപകരണങ്ങള് ഉപയോഗിക്കാനും അവയ്ക്കിടയില് എളുപ്പത്തില് മാറാനും ഇത് അനുവദിക്കും.
ട്രാന്സ്പോര്ട്ട്, ലോജിസ്റ്റിക് സേവന മന്ത്രിയും സൗദി അറേബ്യന് എയര്ലൈന്സ് കോര്പ്പറേഷന് ഡയറക്ടര് ബോര്ഡ് ചെയര്മാനുമായ സാലെഹ് അല്-ജാസ്സറും സൗദിയ ഗ്രൂപ്പ് ഡയറക്ടര് ജനറല് എഞ്ചിനീയര് ഇബ്രാഹിം ബിന് അബ്ദുള്റഹ്മാന് അല്-ഒമറും പരീക്ഷണ ഘട്ടത്തില്, 35,000 അടി ഉയരത്തില് വെച്ച് SV1044 വിമാനത്തില് സൗദി പ്രോ ലീഗ് മത്സരം തത്സമയം കണ്ടു. കൂടാതെ, മന്ത്രി അല്-ജാസ്സര് ഒരു വാര്ത്താ ചാനലുമായി തത്സമയ ടെലിവിഷന് അഭിമുഖം നടത്തുകയും, കമ്മ്യൂണിക്കേഷന്സ് ആന്ഡ് ഇന്ഫര്മേഷന് ടെക്നോളജി മന്ത്രി അബ്ദുല്ല അല്സ്വഹയുമായി വീഡിയോ കോള് ചെയ്യുകയും ചെയ്തു.
ഇന്റര്നെറ്റ് സേവനത്തെക്കുറിച്ച് മന്ത്രി അല്-ജാസ്സര് തന്റെ അഭിനന്ദനം രേഖപ്പെടുത്തി. ഇത് ഒരു സാങ്കേതിക ആഢംബരം മാത്രമല്ല, അത്യാവശ്യമായ ഒരു സേവനം കൂടിയാണെന്ന് അദ്ദേഹം അഭിപ്രായപ്പെട്ടു. രാജ്യത്തിന്റെ വ്യോമയാന, വ്യോമഗതാഗത മേഖലയുടെ പരിവര്ത്തന പരിപാടിയുടെ തന്ത്രപരമായ ഒരു ഘടകമായി ഇതിനെ സംയോജിപ്പിക്കേണ്ടതുണ്ടെന്നും അദ്ദേഹം കൂട്ടിച്ചേര്ത്തു. സൗദിയയുടെ മുഴുവന് വിമാനങ്ങളിലും ഈ സേവനം നടപ്പിലാക്കുന്നതിനുള്ള നടപടികള് വേഗത്തിലാക്കാന് അദ്ദേഹം പദ്ധതിയുടെ മേല്നോട്ടം വഹിക്കുന്നവരോട് ആവശ്യപ്പെട്ടു.
അതേസമയം, നൂതനമായ ഡിജിറ്റല് സേവനങ്ങളിലൂടെ യാത്രാനുഭവം മെച്ചപ്പെടുത്താനുള്ള സൗദിയയുടെ യാത്രയില് അഭിമാനമുണ്ടെന്ന് എന്ജിനീയര് അല്-ഒമര് പറഞ്ഞു. ഈ സേവനം ഉടന് തന്നെ എല്ലാ ക്ലാസുകളിലെയും യാത്രക്കാര്ക്ക് സൗജന്യമായി ലഭ്യമാക്കുമെന്നും, ഇത് പൂര്ണ്ണമായി സംയോജിപ്പിച്ച ഡിജിറ്റല് അനുഭവം നല്കാനുള്ള സൗദിയയുടെ പ്രതിബദ്ധതയെയാണ് പ്രതിഫലിക്കുന്നതെന്നും അദ്ദേഹം സൂചിപ്പിച്ചു. ഏകദേശം 20 വിമാനങ്ങളില് പുതിയ സേവനം ഇതിനകം സ്ഥാപിച്ചു കഴിഞ്ഞെന്നും, നിലവിലുള്ള എല്ലാ സൗദിയ വിമാനങ്ങളിലേക്കും പുതുതായി സര്വീസിനൊപ്പം ചേരുന്ന വിമാനങ്ങളിലേക്കും ഈ പദ്ധതി വ്യാപിപ്പിക്കുമെന്നും അദ്ദേഹം കൂട്ടിച്ചേര്ത്തു. ആവശ്യമായ എല്ലാ നിയമപരമായ നടപടിക്രമങ്ങളും പൂര്ത്തിയാക്കിയാലുടന് പദ്ധതി പൂര്ണ്ണമായും നടപ്പിലാക്കുമെന്നും അദ്ദേഹം വ്യക്തമാക്കി.
Related News
