മസ്‌കറ്റ്- 2025 മുതല്‍ ദേശീയ ദിനത്തിന് രണ്ട് ദിവസത്തെ ഔദ്യോഗിക അവധി പ്രഖ്യാപിച്ച് ഒമാന്‍. രാജ്യത്തിന്റെ പരമാധികാരം പുനഃസ്ഥാപിച്ച് പോര്‍ച്ചുഗീസ് സൈന്യത്തെ പുറത്താക്കിയതിന്റെ 1650-ലെ ചരിത്രപരമായ വിജയം അനുസ്മരിക്കുന്നതിന്റെ ഭാഗമായി നവംബര്‍ 20, 21 തീയതികളിലായിരിക്കും ഇനി മുതല്‍ ദേശീയ ദിനം ആഘോഷിക്കുക.

ഈ പുതിയ അവധി ദിനങ്ങള്‍ ഒമാന്റെ ദേശീയ സ്വത്വം, സംസ്‌കാരം, ഐക്യം എന്നിവയുടെ ആഘോഷമായി മാറും.
ഇമാം സുല്‍ത്താന്‍ ബിന്‍ സെയ്ഫിന്റെ നേതൃത്വത്തിലുള്ള ഒമാനി സേന 1650 നവംബര്‍ 18-ന് മസ്‌കറ്റില്‍ നിന്നും മറ്റ് തുറമുഖങ്ങളില്‍ നിന്നും പോര്‍ച്ചുഗീസുകാരെ വിജയകരമായി പുറത്താക്കിയതിന്റെ ചരിത്രപരമായ ഓര്‍മ്മപ്പെടുത്തലാണ് ദേശീയ ദിനം.

1507-ല്‍ ഒമാനിലെത്തിയ പോര്‍ച്ചുഗീസുകാര്‍ വാണിജ്യപാതകളില്‍ നിയന്ത്രണം സ്ഥാപിക്കുകയും മസ്‌കറ്റിനെ പ്രധാന നാവികത്താവളമാക്കി മാറ്റുകയും ചെയ്തിരുന്നു. ദശാബ്ദങ്ങള്‍ നീണ്ട ചൂഷണങ്ങള്‍ക്കെതിരെ അല്‍-യാരിബി ഗോത്രത്തിന്റെ നേതൃത്വത്തില്‍ ബ്രിട്ടീഷ് ഈസ്റ്റ് ഇന്ത്യാ കമ്പനിയുടെ തന്ത്രപരമായ സഹായത്തോടെ നടത്തിയ ചെറുത്തുനില്‍പ്പാണ് ഒമാനെ പോര്‍ച്ചുഗീസ് ആധിപത്യത്തില്‍ നിന്ന് മോചിപ്പിച്ചത്.

ആഘോഷം കൂടുതല്‍ വിപുലീകരിക്കുന്നതിന്റെ ഭാഗമായി, സുല്‍ത്താന്‍ ഹൈതം ബിന്‍ താരിക് 2025 ജനുവരി 21-ന് റോയല്‍ ഡിക്രി നമ്പര്‍ 15/2025 പുറപ്പെടുവിച്ചു. പുതിയ നിയമപ്രകാരം നവംബര്‍ 20, 21 തീയതികള്‍ ഒമാന്‍ സുല്‍ത്താനേറ്റിന്റെ ഔദ്യോഗിക ദേശീയ ദിന അവധിയായി പ്രഖ്യാപിച്ചു.