ജിദ്ദ: സൗദി അറേബ്യയില് ഇന്ത്യക്കാരനെ വെടിവെച്ച് കൊലപ്പെടുത്തിയ കേസില് രണ്ട് എത്യോപ്യന് പൗരന്മാരെ ജിദ്ദ പോലീസ് അറസ്റ്റ് ചെയ്തു. ജാര്ഖണ്ഡ് സ്വദേശിയായ വിജയകുമാര് മഹാതോയാണ് കൊല്ലപ്പെട്ടത്.
ലഹരി വസ്തുക്കള് വാങ്ങുന്നതുമായി ബന്ധപ്പെട്ട സാമ്പത്തിക തര്ക്കമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക റിപ്പോര്ട്ട്. സൗദിയില് നിയമവിരുദ്ധമായി താമസിച്ചിരുന്ന പ്രതികളെ അറസ്റ്റ് ചെയ്ത വിവരം സൗദി ആഭ്യന്തര മന്ത്രാലയമാണ് അറിയിച്ചത്. പ്രതികളെ തുടര് നടപടികള്ക്കായി പബ്ലിക് പ്രോസിക്യൂഷന് കൈമാറി.
ജാര്ഖണ്ഡിലെ ഗിരുദ്ധി ജില്ലയില് നിന്നുള്ള വിജയകുമാറിന് ഒക്ടോബര് 16-ന് ജിദ്ദയിലെ ഒറ്റപ്പെട്ട ഒരു പ്രദേശത്ത് വെച്ചാണ് വെടിയേറ്റത്. ടവര് ലൈന് ഫിറ്ററായി ജോലി ചെയ്തിരുന്ന 27 വയസ്സുകാരനായ ഇദ്ദേഹം ഒക്ടോബര് 24-ന് ചികിത്സയിലിരിക്കെ ആശുപത്രിയില് മരിച്ചു.
കൊലപാതകം, കള്ളക്കടത്ത്, മയക്കുമരുന്ന് വ്യാപാരം, അനധികൃതമായി സൗദിയില് താമസിക്കല് തുടങ്ങിയ കുറ്റങ്ങളാണ് പ്രതികള്ക്കെതിരെ ചുമത്തിയിട്ടുള്ളത് ജിദ്ദയിലെ ക്രിമിനല് കോടതിയാണ് കേസ് പരിഗണിക്കുന്നത്. വിജയകുമാറിന്റെ മൃതദേഹം നാട്ടില് എത്തിക്കാനുള്ള ശ്രമങ്ങള് പുരോഗമിക്കുകയാണ്.
ഫോട്ടോ: അറസ്റ്റിലായ പ്രതികളും കൊല്ലപ്പെട്ട വിജയകുമാര് മഹാതോയും.
