റിയാദ്: തിരുഗേഹങ്ങളുടെ സേവകന്‍ സല്‍മാന്‍ ബിന്‍ അബ്ദുല്‍ അസീസ് രാജാവിന്റെ രക്ഷാകര്‍തൃത്വത്തില്‍ ആറാമത് ഇസ്ലാമിക് സോളിഡാരിറ്റി ഗെയിംസിന് റിയാദ് നാളെ (നവംബര്‍ 7, വെള്ളിയാഴ്ച) ആതിഥേയത്വം വഹിക്കും. 2025 നവംബര്‍ 21 വരെ നീണ്ടുനില്‍ക്കുന്ന ഈ മത്സരങ്ങളില്‍ 57 ഇസ്ലാമിക രാജ്യങ്ങളില്‍ നിന്നുള്ള കായികതാരങ്ങള്‍ പങ്കെടുക്കും.

ഈ ടൂര്‍ണമെന്റിന്റെ ആശയം രൂപം കൊണ്ടതും ഔദ്യോഗികമായി ആരംഭിച്ചതും സൗദി മണ്ണില്‍ നിന്നാണ്. ഇരുപത് വര്‍ഷങ്ങള്‍ക്കിപ്പുറം, അതായത് മക്കയില്‍ നടന്ന ടൂര്‍ണമെന്റിന്റെ പ്രഥമ പതിപ്പിന് ശേഷം, ഇസ്ലാമിക ലോകത്തെ വിവിധ രാജ്യങ്ങളില്‍ നിന്നുള്ള കായികതാരങ്ങള്‍ അണിനിരക്കുന്ന ഈ മേള സൗദിയിലേക്ക് തിരിച്ചെത്തുകയാണ്.
'57 ഇസ്ലാമിക രാജ്യങ്ങളില്‍ നിന്നുള്ള 3,000-ത്തിലധികം കായികതാരങ്ങള്‍ 22-ല്‍ അധികം കായിക ഇനങ്ങളില്‍ പങ്കെടുക്കുന്നതില്‍ സന്തോഷമുണ്ടെന്ന് കായിക മന്ത്രിയും സൗദി ഒളിമ്പിക്, പാരാലിമ്പിക് കമ്മിറ്റി പ്രസിഡന്റും ഇസ്ലാമിക് സോളിഡാരിറ്റി സ്പോര്‍ട്സ് ഫെഡറേഷന്‍ പ്രസിഡന്റുമായ അബ്ദുല്‍ അസീസ് ബിന്‍ തുര്‍ക്കി ബിന്‍ ഫൈസല്‍ രാജകുമാരന്‍ പറഞ്ഞു.
ഇസ്ലാമിക ലോകത്തെ ഏറ്റവും ശ്രദ്ധേയമായ കായികമേളകളിലൊന്നാണ് ഇസ്ലാമിക് സോളിഡാരിറ്റി ഗെയിംസ്.