അല് ഐന്- സ്കൂള് വിദ്യാര്ഥികള് ഗുണ്ടായിസവും അതിക്രമവും കാട്ടി കുഴപ്പമുണ്ടാക്കിയാല് രക്ഷിതാക്കള് ഉത്തവാദികളാവുമെന്ന് അല് ഐന് കോടതി. സ്കൂളില് നടന്ന രണ്ട് അനിഷ്ട സംഭവങ്ങളില് മാതാപിതാക്കള്ക്ക് പിഴ വിധിച്ചാണ് അല് ഐന് കോടതിയുടെ താക്കീത്. രണ്ട് കേസുകളിലുമായി ആകെ 65,000 ദിര്ഹം നഷ്ടപരിഹാരം നല്കാനാണ് കുട്ടികളുടെ രക്ഷിതാക്കളോട് കോടതി ഉത്തരവിട്ടിട്ടുള്ളത്.
ആദ്യ കേസില്, രണ്ട് കുട്ടികള് സഹപാഠിയെ സ്കൂളില് വെച്ച് നിരന്തരം ഭീഷണിപ്പെടുത്തുകയും ആക്രമിക്കുകയും ഇതിന്റെ ദൃശ്യങ്ങള് ചിത്രീകരിക്കുകയും ചെയ്തിരുന്നു. ഈ നിരന്തരമായ ഗുണ്ടായിസം ഇരയായ വിദ്യാര്ത്ഥിയില് ഭയം ജനിപ്പിക്കുകയും മാനസികാവസ്ഥ തകരാറിലാക്കുകയും ചെയ്തു. 30000 ദിര്ഹം നഷ്ടപരിഹാരം നല്കാനാണ് കുട്ടികളുടെ രക്ഷിതാക്കളോട് കോടതി ആവശ്യപ്പെട്ടിരിക്കുന്നത്.
രണ്ടാമത്തെ കേസില്, കുട്ടികള് മൂര്ച്ചയുള്ള ഉപകരണങ്ങള് ഉപയോഗിച്ച് മറ്റൊരു വിദ്യാര്ഥിയെ ആക്രമിക്കുകയും ഗുരുതരമായ പരിക്കുകള് വരുത്തുകയും ചെയ്തിരുന്നു. ഈ കേസില് 35000 ദിര്ഹം നഷ്ടപരിഹാരം നല്കണം. ഈ കേസിലെ കുട്ടികളുടെ ക്രിമിനല് ശിക്ഷ അപ്പീലിലും ശരിവച്ചു.
കുട്ടികളെ നിരീക്ഷിക്കുന്നതില് രക്ഷിതാക്കള്ക്ക് വീഴ്ച സംഭവിച്ചു എന്നാണ് കോടതിയുടെ കണ്ടെത്തല്. ആക്രമണത്തെത്തുടര്ന്ന് ദിവസങ്ങളോളം ദൈനംദിന കാര്യങ്ങള് ചെയ്യാന് കഴിയാതിരുന്ന ഇരയുടെ ശാരീരിക പരിക്കുകള്ക്കും വൈകാരിക ആഘാതത്തിനും വേണ്ടിയാണ് ഈ നഷ്ടപരിഹാരം.
Related News
