റിയാദ് - ഇന്ത്യയും സൗദി അറേബ്യയും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിന്റെ ഭാഗമായി, റിയാദില് സുപ്രധാന സാംസ്കാരിക സഹകരണ ധാരണാപത്രത്തില് ഒപ്പുവെച്ചു. ഇരു രാജ്യങ്ങളും തമ്മിലുള്ള നൂറ്റാണ്ടുകള് പഴക്കമുള്ള ചരിത്രപരവും നാഗരികപരവുമായ ബന്ധം ഊട്ടിയുറപ്പിച്ച് വൈവിധ്യമാര്ന്ന സാംസ്കാരിക മേഖലകളില് സഹകരണം വര്ധിപ്പിക്കാനാണ് കരാര് ലക്ഷ്യമിടുന്നത്.
കേന്ദ്ര സാംസ്കാരിക, ടൂറിസം മന്ത്രിയായ ഗജേന്ദ്ര സിംഗ് ഷെഖാവത്തും സൗദി അറേബ്യയുടെ സാംസ്കാരിക മന്ത്രിയായ ബദര് ബിന് അബ്ദുള്ള ബിന് ഫര്ഹാന് അല് സൗദ് രാജകുമാരനുമാണ് ഉഭയകക്ഷി ധാരണാപത്രത്തില് ഒപ്പുവെച്ചത്.
ജനങ്ങളുമായുള്ള ബന്ധം വര്ദ്ധിപ്പിക്കാനും സ്ഥാപനപരമായ പങ്കാളിത്തം വളര്ത്താനും രൂപകല്പ്പന ചെയ്തിട്ടുള്ള ഈ സുപ്രധാന കരാര് വിവിധ മേഖലകളില് ശ്രദ്ധ കേന്ദ്രീകരിക്കുന്നതാണ്. കല, പൈതൃകം, സംഗീതം, സാഹിത്യം, സാംസ്കാരിക പൈതൃക സംരക്ഷണം എന്നിവയുള്പ്പെടെയുള്ള വിവിധ സാംസ്കാരിക മേഖലകളിലെ സഹകരണം കൂടുതല് ആഴത്തിലാക്കും. സാംസ്കാരിക വിനിമയം പ്രോത്സാഹിപ്പിക്കുക, നയപരവും ഭരണപരവുമായ അനുഭവങ്ങള് പങ്കുവെക്കുക, ഇരു രാജ്യങ്ങളിലെയും സാംസ്കാരിക മേളകളിലും പരിപാടികളിലുമുള്ള പങ്കാളിത്തം സുഗമമാക്കുക. സാംസ്കാരിക സ്ഥാപനങ്ങള് തമ്മിലുള്ള ആശയവിനിമയം പ്രോത്സാഹിപ്പിക്കുകയും സാംസ്കാരിക പൈതൃക സംരക്ഷണവുമായി ബന്ധപ്പെട്ട അറിവുകളും സമ്പ്രദായങ്ങളും കൈമാറുകയും ചെയ്യുക തുടങ്ങിയവും കരാറിന്റെ ലക്ഷ്യങ്ങളാണ്.
