ദുബായ്: യുഎഇയുടെ ദേശീയ റെയില്‍വേ പദ്ധതിയായ ഇത്തിഹാദ് റെയിലിന് ദുബായ് വേള്‍ഡ് സെന്‍ട്രലിലെ പുതിയ അല്‍ മക്തൂം അന്താരാഷ്ട്ര വിമാനത്താവളത്തില്‍ സ്റ്റോപ്പ് അനുവദിച്ചേക്കുമെന്ന് സൂചന. ഇതുമായി ബന്ധപ്പെട്ട്, യാത്രക്കാര്‍ക്ക് ട്രെയിന്‍ സ്റ്റേഷനുകളില്‍ നിന്ന് തന്നെ ചെക്ക് ഇന്‍ ചെയ്യാനുള്ള സൗകര്യം ഒരുക്കാനും സാധ്യതയുണ്ടെന്ന് ദുബായ് എയര്‍പോര്‍ട്ട്സ് സിഇഒ പോള്‍ ഗ്രിഫിത്ത്സ് വ്യക്തമാക്കി.

ഇത്തിഹാദ് റെയിലില്‍ അടുത്ത വര്‍ഷത്തോടെയാണ് പാസഞ്ചര്‍ സര്‍വീസ് ആരംഭിക്കുക. 2030 ഓടെ പ്രതിവര്‍ഷം ഏകദേശം 3.65 കോടി യാത്രക്കാരെയാണ് ലക്ഷ്യമിടുന്നത്. മണിക്കൂറില്‍ 350 കിലോമീറ്റര്‍ വേഗതയിലായിരിക്കും അതിവേഗ ട്രെയിനുകളുടെ സഞ്ചാരം. അബുദാബിക്കും ദുബായ്ക്കും ഇടയില്‍ വെറും 30 മിനിറ്റിനുള്ളില്‍ യാത്ര ചെയ്യാം. യുഎഇയിലെ ഏഴ് എമിറേറ്റുകളെയും അയല്‍ രാജ്യങ്ങളിലെ പ്രധാന നഗരങ്ങളായ സൗദി അതിര്‍ത്തിയിലെ ഗുവൈഫത്ത് ഒമാനിലെ സോഹാര്‍ നഗരങ്ങളെയും ബന്ധിപ്പിച്ചായിരിക്കും സര്‍വീസ്. യുഎഇയിലെ അബുദാബി, ദുബായ്, ഷാര്‍ജ, റാസല്‍ ഖൈമ, ഫുജൈറ, അല്‍ ഐന്‍, റുവൈസ്, അല്‍ മിര്‍ഫ, അല്‍ ദൈദ് എന്നീ പ്രധാന നഗരങ്ങളെ ബന്ധിപ്പിച്ചായിരിക്കും സര്‍വീസ്.

യുഎഇയുടെ ഗതാഗത ശൃംഖലയെ ശക്തിപ്പെടുത്തുന്നതിന്റെ ഭാഗമായി ദുബായ് ഭരണകൂടം 2024 ഏപ്രിലില്‍ പ്രഖ്യാപിച്ച ദുബായ് അന്താരാഷ്ട്ര വിമാനത്താവളത്തിന്റെ എല്ലാ പ്രവര്‍ത്തനങ്ങളും അല്‍ മക്തൂം അന്താരാഷ്ട്ര വിമാനത്താവളത്തിലേക്ക് മാറ്റും. 10 വര്‍ഷത്തിനുള്ളിലായായിരിക്കും മാറ്റം. 128 ബില്യണ്‍ ദിര്‍ഹം ചെലവഴിച്ചാണ് പുതിയ വിമാനത്താവളം നിര്‍മിക്കുന്നത്. പ്രതിവര്‍ഷം 26 കോടി യാത്രക്കാരെ ഉള്‍ക്കൊള്ളാനുള്ള ശേഷി വിമാനത്താവളത്തിനുണ്ടാകും.