ജിദ്ദ: സൗദിയില് തണുപ്പുകാലത്തിനു മുന്നോടിയായി വിവിധ ഭാഗങ്ങളില് മഴ പെയ്തു. ജിദ്ദ, മക്ക, മദീന മേഖലയിലാണ് മഴ ലഭിച്ചത്. ത്വാഇഫിലും അസീര്, അല്ബാഹ മേഖലയിലും മഴ മുന്നറിയിപ്പ് തുടരുകയാണ്. രാജ്യത്തിന്റെ വിവിധ ഭാഗങ്ങളില് തിങ്കളാഴ്ച വരെ മഴ തുടരുമെന്ന് കാലാവസ്ഥാ കേന്ദ്രം മുന്നറിയിപ്പ് നല്കി. മക്ക മേഖലയില് കനത്ത മഴയാണ് ലഭിച്ചത്. വെള്ളക്കെട്ട് രൂപപ്പെടുകയും കുത്തിയൊഴുക്കുണ്ടാവുകയും ചെയ്തതിനെത്തുടര്ന്ന് നിരവധി വാഹനങ്ങള് ഒലിച്ചു പോയി. ഒട്ടുമിക്ക റോഡുകളിലും വെള്ളക്കെട്ട് രൂപപ്പെട്ടു. തായിഫിലും നല്ല മഴയുണ്ടായിരുന്നു.
സൗദിയിലെ പടിഞ്ഞാറന് മേഖലയിലെ വിവിധ പ്രദേശങ്ങളിലാണ് ഇന്ന് റെഡ് അലര്ട്ട് പ്രഖ്യാപിച്ചിരുന്നത്. മദീന, യാമ്പു, ബദര് തുടങ്ങിയ പ്രദേശങ്ങളിലും മഴ ലഭിച്ചു. മക്കയിലെ വിവിധ പ്രദേശങ്ങളായ അല്കാമില്, മദ്റക്, ജമൂം, മൈസാന് പോലുള്ള സ്ഥലങ്ങളിലും ഇന്ന് റെഡ് അലര്ട്ട് പ്രഖ്യാപിച്ചിരുന്നു. ദമാം, ഖോബാര് ഉള്പ്പെടെയുള്ള കിഴക്കന് പ്രവിശ്യകളിലും നേരിയ തോതില് മഴയുണ്ടായി. അല്ബാഹ, അല്ജൗഫ് എന്നിവിടങ്ങളിലും മഴ മുന്നറിയിപ്പുണ്ട്. കഴിഞ്ഞ ദിവസം മഴക്കു വേണ്ടിയുള്ള പ്രത്യേക പ്രാര്ത്ഥനകള് സൗദിയിലുനീളം നടന്നിരുന്നു.
ഔദ്യോഗിക അറിയിപ്പുകള് ശ്രദ്ധിക്കാനും വെള്ളപ്പൊക്ക സാധ്യതയുള്ള താഴ് വരകളിലൂടെയുള്ള യാത്രകള് ഒഴിവാക്കാനും കാലാവസ്ഥാ നിരീക്ഷണ അതോറിറ്റി പൊതുജനങ്ങള്ക്ക് നിര്ദ്ദേശം നല്കി. കനത്ത മഴയുള്ളപ്പോഴും കാഴ്ചാ പരിധി കുറയുമ്പോഴും വാഹനം ഓടിക്കുമ്പോള് അതീവ ജാഗ്രത പാലിക്കണം.
Related News
