റിയാദ്: സൗദി അറേബ്യയുടെ ജീവകാരുണ്യപ്രവര്ത്തന മേഖലയില് പുതിയൊരു മാതൃകയായി, കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരന്റെ ഭാര്യയായ സാറ ബിന്ത് മഷൂര് ബിന് അബ്ദുല് അസീസ് രാജകുമാരി ടൈപ്പ്-1 പ്രമേഹബാധിതരായ കുട്ടികളെ സഹായിക്കുന്നതിനുള്ള സംരംഭത്തിനായി ഒരു കോടി സൗദി റിയാല് സംഭാവന നല്കി.
സൗദി ആരോഗ്യ എന്ഡോവ്മെന്റ് ഫണ്ട് നടപ്പാക്കുന്ന പദ്ധതി, പ്രമേഹംമൂലം ബുദ്ധിമുട്ടുന്ന കുട്ടികള്ക്ക് അത്യാധുനിക ചികിത്സാ ഉപകരണങ്ങളും പിന്തുണയും ഉറപ്പാക്കുക എന്ന ലക്ഷ്യത്തോടെയാണ് പ്രവര്ത്തിക്കുന്നത്. സാറ രാജകുമാരിയുടെ ഈ ഉദാരമായ സംഭാവന, രാജ്യത്തെ രോഗികളായ കുട്ടികള്ക്ക് ആധുനിക ഇന്സുലിന് പമ്പുകള് പോലുള്ള ചികിത്സാ സൗകര്യങ്ങള് ലഭ്യമാക്കുന്നതില് നിര്ണായക പങ്ക് വഹിക്കും. ഈ ഉപകരണങ്ങള് കുട്ടികളുടെ ജീവിത നിലവാരം ഗണ്യമായി മെച്ചപ്പെടുത്താനും അവര്ക്ക് സാധാരണ ജീവിതം നയിക്കാന് ആത്മവിശ്വാസം നല്കാനും സഹായിക്കും.
കിരീടാവകാശിയുടെ ഭാര്യയുടെ ഈ നടപടിയെ ആരോഗ്യ മന്ത്രിയും ആരോഗ്യ എന്ഡോവ്മെന്റ് ഫണ്ടിന്റെ ബോര്ഡ് ചെയര്മാനുമായ ഫഹദ് ബിന് അബ്ദുറഹ്മാന് അല് ജലാജില് അഭിനന്ദിക്കുകയും, ഇത് കുട്ടികളുടെ ആരോഗ്യരംഗത്തെ വികസനത്തിന് വലിയ സ്വാധീനം ചെലുത്തുമെന്നു വ്യക്തമാക്കുകയും ചെയ്തു. പ്രമേഹബാധിതരായ കുട്ടികള്ക്കും അവരുടെ കുടുംബങ്ങള്ക്കും സാമ്പത്തികവും മാനസികവുമായ ആശ്വാസം നല്കാന് ഈ ഫണ്ട് ഉപകരിക്കും.
Related News
