വാഷിംഗ്ടണ്- സൗദി അറേബ്യ ആധുനിക കാലത്തെ ഒരു അത്ഭുതമായി മാറിയെന്നും, കിരീടാവകാശി മുഹമ്മദ് ബിന് സല്മാന്റെ നേതൃത്വത്തില് രാജ്യം വലിയ വികസനത്തിനും അഭിവൃദ്ധിക്കുമാണ് സാക്ഷ്യം വഹിക്കുന്നതെന്നും അമേരിക്കന് പ്രസിഡന്റ് ഡൊണാള്ഡ് ട്രംപ്. വൈറ്റ് ഹൗസില് സൗദി കിരീടാവകാശിക്ക് നല്കിയ ഔദ്യോഗിക സ്വീകരണത്തിനിടെ സംസാരിക്കുകയായിരുന്നു അദ്ദേഹം.
സന്ദര്ശനത്തിന്റെ ഭാഗമായി അമേരിക്കയും സൗദി അറേബ്യയും തമ്മില് വമ്പന് പ്രതിരോധ കരാറിലും, ആണവോര്ജ്ജം, നിര്മിത ബുദ്ധി തുടങ്ങിയ മേഖലകളിലെ സുപ്രധാന കരാറുകളിലും ഒപ്പുവെച്ചു.
'മികച്ച ദര്ശനമുള്ള ഒരു സുഹൃത്തിനെ സ്വാഗതം ചെയ്യുന്നതില് ഞങ്ങള്ക്ക് അതിയായ സന്തോഷമുണ്ട്. അമേരിക്കയെയും സൗദിയെയും സംബന്ധിച്ചിടത്തോളം ഇത് ചരിത്രപ്രധാനമായ ദിവസമാണ്,' ട്രംപ് പറഞ്ഞു. സൗദി അറേബ്യ തങ്ങളുടെ 'നാറ്റോ ഇതര പ്രധാന സഖ്യകക്ഷി' ആണെന്ന് ആവര്ത്തിച്ച ട്രംപ്, ഇരുരാജ്യങ്ങളും തമ്മിലുള്ള സൈനിക ഏകോപനം വര്ദ്ധിപ്പിക്കുമെന്ന് ഉറപ്പ് നല്കി.
ഗാസ സമാധാന കരാറില് സൗദി അറേബ്യ നിര്ണ്ണായക പങ്കാണ് വഹിച്ചത്. യുദ്ധം അവസാനിപ്പിക്കുന്നതില് സൗദി കിരീടാവകാശി നടത്തിയ ഇടപെടലുകളെ ട്രംപ് പ്രശംസിച്ചു. ഗാസ പീസ് കൗണ്സിലില് പല ലോകരാജ്യങ്ങളുടെയും തലവന്മാര് ഉള്പ്പെടുമെന്നും അദ്ദേഹം കൂട്ടിച്ചേര്ത്തു. ലോഹവ്യവസായം, നിര്മിത ബുദ്ധി തുടങ്ങിയ മേഖലകളില് മികച്ച ചര്ച്ചകളാണ് നടന്നതെന്ന് ട്രംപ് അറിയിച്ചു.
ട്രംപിന്റെ വാക്കുകള്ക്ക് മറുപടിയായി, സൗദി അറേബ്യ കഴിഞ്ഞ ഒമ്പത് പതിറ്റാണ്ടുകളായി അമേരിക്കയുമായി ചേര്ന്ന് പ്രവര്ത്തിക്കുന്നുണ്ടെന്ന് മുഹമ്മദ് ബിന് സല്മാന് രാജകുമാരന് പറഞ്ഞു. അമേരിക്കയുമായുള്ള സാമ്പത്തിക സഹകരണത്തിനുള്ള സാധ്യതകള് വളരെ വലുതാണെന്നും സംയുക്തമായ പല അവസരങ്ങളും മുന്നിലുണ്ടെന്നും അദ്ദേഹം വ്യക്തമാക്കി.
Related News
