റിയാദ്: സൗദി തലസ്ഥാനമായ റിയാദിലെ മൊത്തവ്യാപാര പഴം-പച്ചക്കറി വിപണി വികസിപ്പിക്കുന്നതിനായി സൗദി മള്‍ട്ടി ബിസിനസ് ഗ്രൂപ്പ് കരാര്‍ ഒപ്പുവെച്ചു. സൗദിയിലെ പാരലല്‍ മാര്‍ക്കറ്റായ 'നമു'വില്‍ ലിസ്റ്റ് ചെയ്തിട്ടുള്ള കമ്പനിയാണിത്. റിയാദ് ഡെവലപ്മെന്റ് കമ്പനിയുമായി സഹകരിച്ചാണ് ഈ പദ്ധതി നടപ്പിലാക്കുന്നത്. സൗദി ഓഹരി വിപണിയായ 'തദാവുല്‍' വഴി പുറത്തുവിട്ട രേഖയിലാണ് കമ്പനി ഇക്കാര്യം അറിയിച്ചത്. റിയാദിലെ നോര്‍ത്ത് സെന്‍ട്രല്‍ വെജിറ്റബിള്‍ ആന്‍ഡ് ഫ്രൂട്ട് മാര്‍ക്കറ്റ് ഒക്ടോബര്‍ 30-ന് അടച്ചുപൂട്ടിയിരുന്നു.

ഈ പദ്ധതിയുമായി ബന്ധപ്പെട്ട ഔദ്യോഗിക നടപടിക്രമങ്ങളും ഒപ്പുവെക്കലുകളും ചൊവ്വാഴ്ച പൂര്‍ത്തിയായതായി കമ്പനി സ്ഥിരീകരിച്ചു.

2024-ലെ കമ്പനിയുടെ മൊത്തം വരുമാനത്തിന്റെ 85 ശതമാനത്തിലധികം വരും ഈ ഒറ്റക്കരാറിന്റെ മൂല്യം. 18 മാസമാണ് പദ്ധതിയുടെ നിര്‍മ്മാണ കാലാവധി. റിയാദ് മൊത്തവ്യാപാര വിപണിയുടെ രൂപകല്‍പ്പനയും നിര്‍മ്മാണവുമാണ് പ്രധാന ചുമതല. ഇതില്‍ കണ്‍സ്ട്രക്ഷന്‍, ആര്‍ക്കിടെക്ചറല്‍ ഫിനിഷിംഗ്, ഇലക്ട്രിക്കല്‍, മെക്കാനിക്കല്‍ എഞ്ചിനീയറിംഗ് ജോലികള്‍ ഉള്‍പ്പെടുന്നു.

ഈ കരാര്‍ കമ്പനിയുടെ സാമ്പത്തിക നിലയില്‍ വലിയ മാറ്റങ്ങള്‍ ഉണ്ടാക്കുമെന്നാണ് പ്രതീക്ഷിക്കുന്നത്. 2025-ന്റെ രണ്ടാം പകുതി, 2026-ലെ മുഴുവന്‍ വര്‍ഷം, 2027-ന്റെ ആദ്യ പകുതി എന്നീ കാലയളവുകളില്‍ കമ്പനിയുടെ സാമ്പത്തിക ഫലങ്ങളില്‍ ഈ കരാര്‍ ഗുണകരമായ സ്വാധീനം ചെലുത്തും. ഈ കരാറില്‍ അനുബന്ധ കക്ഷികളാരും ഉള്‍പ്പെട്ടിട്ടില്ലെന്നും കമ്പനി വ്യക്തമാക്കി.

2024-ല്‍ സൗദി അറേബ്യ ഏകദേശം 4.3 ദശലക്ഷം ടണ്‍ പച്ചക്കറികളും പഴങ്ങളുമാണ് ഇറക്കുമതി ചെയ്തത്.