ദുബായ്: ലോകശ്രദ്ധ ആകര്‍ഷിച്ച ദുബായ് എയര്‍ ഷോയുടെ സമാപനത്തോടനുബന്ധിച്ച് വ്യോമാഭ്യാസം നടത്തുന്നതിനിടെ ഇന്ത്യയുടെ തദ്ദേശീയ യുദ്ധവിമാനമായ തേജസ് തകര്‍ന്നു വീണു. വെള്ളിയാഴ്ച പ്രാദേശിക സമയം ഉച്ചയ്ക്ക് 2.10 ഓടെ ദുബായ് വേള്‍ഡ് സെന്‍ട്രല്‍ വിമാനത്താവളത്തിലാണ് അപകടം നടന്നത്.

ആദ്യ റൗണ്ട് അഭ്യാസ പ്രകടനം വിജയകരമായി പൂര്‍ത്തിയാക്കിയ തേജസ്, ഒറ്റയ്ക്കുള്ള രണ്ടാം റൗണ്ട് പ്രകടനം നടത്തുന്നതിനിടെയാണ് അപകടത്തില്‍പ്പെട്ടത്. മുകളിലേക്ക് കുതിച്ചുയര്‍ന്ന് കരണംമറിഞ്ഞ വിമാനം, നിയന്ത്രണം നഷ്ടപ്പെട്ട് നിമിഷനേരം കൊണ്ട് താഴേക്ക് കൂപ്പുകുത്തുകയായിരുന്നു. തകര്‍ന്നുവീണ ഉടന്‍ വിമാനത്തില്‍ നിന്ന് വലിയ അഗ്‌നിഗോളവും കറുത്ത പുകയും ഉയര്‍ന്നു. വലിയ ജനക്കൂട്ടത്തിന് മുന്നില്‍ വെച്ചാണ് അപകടം നടന്നത്.

അപകടത്തെ തുടര്‍ന്ന് എയര്‍ ഷോ താല്‍ക്കാലികമായി നിര്‍ത്തിവെച്ചു. ഹിന്ദുസ്ഥാന്‍ എയ്‌റോനോട്ടിക്‌സ് ലിമിറ്റഡ് നിര്‍മ്മിക്കുന്ന തേജസ് യുദ്ധവിമാനത്തില്‍ സാധാരണയായി ഒരു പൈലറ്റ് മാത്രമാണുണ്ടാവുക. എന്നാല്‍, അപകടസമയത്ത് പൈലറ്റ് പാരച്യൂട്ട് വഴി രക്ഷപ്പെട്ടോ എന്ന കാര്യത്തില്‍ ഇതുവരെ ഔദ്യോഗികമായി വ്യക്തത ലഭിച്ചിട്ടില്ല. അപകടത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്്.

രണ്ടുവര്‍ഷത്തിലൊരിക്കല്‍ സംഘടിപ്പിക്കുന്നതും നവംബര്‍ 17-ന് ആരംഭിച്ചതുമായ ദുബായ് എയര്‍ ഷോ ഇന്ന് സമാപിക്കാനിരിക്കെയാണ് തേജസ് വിമാനാപകടം. 1500-ലേറെ പ്രമുഖ കമ്പനികളും 1.48 ലക്ഷം പ്രൊഫഷണലുകളും പങ്കെടുത്ത ആഗോള വ്യോമയാന മേഖലയിലെ പ്രധാന വേദിയായിരുന്നു ദുബായ് എയര്‍ ഷോ.