ദുബായ്: ലോകശ്രദ്ധ ആകര്ഷിച്ച ദുബായ് എയര് ഷോയില് ഇന്ത്യയുടെ അഭിമാനമായ തേജസ് യുദ്ധവിമാനം തകര്ന്നുവീണ് മരിച്ചത് ഇന്ത്യന് വ്യോമസേന വിങ് കമാന്ഡര് നമാന്ഷ് സ്യാല് (37) ആണെന്ന് ഔദ്യോഗിക കേന്ദ്രങ്ങള് വെളിപ്പെടുത്തി. എയര് ഷോയില് അഭ്യാസപ്രകടനത്തിനിടെയാണ് വിമാനം നിയന്ത്രണം വിട്ട് നിലംപതിച്ചത്.
ഹിമാചല് പ്രദേശ് കാംഗ്ര ജില്ലയിലെ പട്യാല്കാഡ് സ്വദേശിയാണ് വിങ് കമാന്ഡര് നമാന്ഷ് സ്യാല്. രാജ്യത്തിനായി ജീവന് സമര്പ്പിച്ച ധീരനായ പൈലറ്റിന്റെ വിയോഗത്തില് ഹിമാചല് പ്രദേശ് മുഖ്യമന്ത്രി സുഖ്വീന്ദര് സിങ് സുഖു അഗാധമായ അനുശോചനം രേഖപ്പെടുത്തി.
പ്രാദേശിക സമയം ഉച്ചയ്ക്ക് 2.10-നായിരുന്നു ദുരന്തം. ഇന്ത്യന് വ്യോമസേനയുടെ സൂര്യകിരണ് വിമാനങ്ങളുടെ പ്രകടനത്തിനു ശേഷം, തേജസ് വിമാനത്തിന്റെ എട്ട് മിനിറ്റ് നീണ്ടുനില്ക്കുന്ന അഭ്യാസപ്രകടനമാണ് നിശ്ചയിച്ചിരുന്നത്. പ്രകടനത്തിനായി ഉയര്ന്നുപൊങ്ങി ആകാശത്ത് വട്ടമിട്ട വിമാനം പെട്ടെന്ന് നിയന്ത്രണം വിട്ട് താഴേക്ക് പതിക്കുകയും തീഗോളമായി മാറുകയും ചെയ്തു. പ്രകടനം ആസ്വദിക്കാന് തടിച്ചുകൂടിയ കാണികളെ നടുക്കി സംഭവത്തെത്തുടര്ന്ന് എയര് ഷോയുടെ അവസാന ദിവസത്തെ മറ്റ് പരിപാടികള് റദ്ദാക്കി. കാണികളെ സുരക്ഷിത സ്ഥാനങ്ങളിലേക്ക് മാറ്റി. അപകട കാരണം സംബന്ധിച്ച് വിശദമായ അന്വേഷണം പുരോഗമിക്കുകയാണ്.
ദുബായ് എയര് ഷോ ആരംഭിച്ചതിന് തൊട്ടുപിന്നാലെ തേജസ് വിമാനത്തിന്റെ സുരക്ഷ സംബന്ധിച്ച് സോഷ്യല് മീഡിയയില് വിവാദങ്ങള് ഉടലെടുത്തിരുന്നു. വിമാനത്തിന് എണ്ണച്ചോര്ച്ചയുണ്ട് എന്നതായിരുന്നു പ്രധാന പ്രചാരണം. എന്നാല്, കേന്ദ്രസര്ക്കാര് ഈ ആരോപണം നിഷേധിക്കുകയും വിമാനത്തില് കട്ടിപിടിച്ചുനില്ക്കുന്ന വെള്ളം ചോര്ത്തിക്കളയുന്ന സാധാരണ നടപടി തെറ്റായി വ്യാഖ്യാനിക്കപ്പെട്ടു എന്ന് വിശദീകരിക്കുകയും ചെയ്തിരുന്നു. ഈ വിവാദം നിലനില്ക്കെയാണ് തേജസ് വിമാനം തകര്ന്നുവീണ ദുരന്തമുണ്ടായത്.
വിങ് കമാന്ഡര് നമാന്ഷ് സ്യാല് സൈനിക പാരമ്പര്യമുള്ള കുടുംബത്തില് നിന്നാണ് വരുന്നത്. അദ്ദേഹത്തിന്റെ പിതാവ് ജഗന്നാഥ് സ്യാല് ഇന്ത്യന് ആര്മിയുടെ മെഡിക്കല് കോര്പ്സില് സേവനമനുഷ്ഠിച്ച ശേഷം വിരമിച്ചയാളാണ്. സ്യാലിന്റെ ഭാര്യ അഫ്ഷാനും ഇന്ത്യന് വ്യോമസേനയിലെ ഉദ്യോഗസ്ഥയാണ്. ഈ ദമ്പതികള്ക്ക് ആറ് വയസ്സുള്ള ഒരു മകളുണ്ട്.
അപകടം സംഭവിക്കുമ്പോള് തമിഴ്നാട്ടിലെ സുലൂര് എയര് ഫോഴ്സ് സ്റ്റേഷനിലാണ് വിങ് കമാന്ഡര് സ്യാല് പ്രധാനമായും സേവനമനുഷ്ഠിച്ചിരുന്നത്. വിങ് കമാന്ഡര് സ്യാല് വ്യോമസേനയിലെ ഏറ്റവും പ്രഗത്ഭരായ പൈലറ്റുമാരില് ഒരാളായിരുന്നു. അടുത്തിടെ സേനയില് നിന്ന് പിന്വലിച്ച മിഗ്-21 യുദ്ധവിമാനം പറത്തിയതിലും പിന്നീട് സുഖോയ് Su-30 MKI പോലുള്ള അത്യാധുനിക വിമാനങ്ങള് പറത്തിയതിലും അദ്ദേഹത്തിന് മികച്ച പരിശീലനവും അനുഭവസമ്പത്തുമുണ്ടായിരുന്നു.
അവസാന നിമിഷം: വിമാനം തകരുന്ന അവസാന നിമിഷം ജനവാസ മേഖലയില് നിന്ന് അകറ്റി വിടാന് അദ്ദേഹം പരമാവധി ശ്രമിച്ചു എന്നും അദ്ദേഹത്തിന് ഇജക്ട് ചെയ്യാന് സാധിച്ചില്ല എന്നും റിപ്പോര്ട്ടുകള് സൂചിപ്പിക്കുന്നു. വിങ് കമാന്ഡര് സ്യാലിന്റെ ഭൗതികശരീരം ഉടന് തന്നെ ജന്മദേശമായ ഹിമാചല് പ്രദേശിലെ കാന്ഗ്രയിലെത്തിച്ച് പൂര്ണ സൈനിക ബഹുമതികളോടെ സംസ്കരിക്കും.
Related News
