മദീന: സൗദി അറേബ്യയില്‍ ഇന്ത്യന്‍ ഉംറ തീര്‍ഥാടകര്‍ സഞ്ചരിച്ച ബസ് അപകടത്തിപെട്ട് മരണമടഞ്ഞവരുടെ മൃതദേഹങ്ങള്‍ മദീനയില്‍ ഇന്നു സംസ്‌കരിക്കും. ഇന്ത്യന്‍ ഉംറ തീര്‍ഥാടകര്‍ സഞ്ചരിച്ച ബസും ട്രക്കും കൂട്ടിയിടിച്ച് തീ പിടിച്ച്് 45 തീര്‍ഥാടകരാണ് മരിച്ചത്. എല്ലാവരും ഹൈദരാബാദില്‍നിന്നുള്ള തീര്‍ഥാടകരായിരുന്നു.

ഞായറാഴ്ച സൗദി സമയം രാത്രി 11 ഓടെയാണ് ഇന്ത്യന്‍ ഉംറ തീര്‍ഥാടകര്‍ സഞ്ചരിച്ച ബസ് എണ്ണ ടാങ്കറുമായി കൂട്ടിയിടിച്ച് അപകടമുണ്ടായത്. 46 ഇന്ത്യക്കാരാണ് ബസ്സിലുണ്ടായിരുന്നത്. ഇവരില്‍ ഒരാളൊഴികെ ബാക്കി 45 പേരും മരിച്ചു. മരിച്ചവരില്‍ അധികവും തെലങ്കാനയില്‍ നിന്നുള്ളവരാണ്. തുടര്‍നടപടികള്‍ പൂര്‍ത്തിയാക്കുന്നതിനായി തെലങ്കാന ന്യൂനപക്ഷ ക്ഷേമ വകുപ്പ് മന്ത്രി മുഹമ്മദ് അസ്ഹറുദ്ദീനും സംഘവും ചൊവ്വാഴ്ച മദീനയിലെത്തിയിരുന്നു. മാജിദ് ഹുസൈന്‍ എം.എല്‍.എ, ന്യൂനപക്ഷ ക്ഷേമ വകുപ്പ് സെക്രട്ടറി ബി. ഷഫിഉള്ള എന്നിവരാണ് സംഘത്തിലുള്ളത്. സ്ഥിതിഗതികളെക്കുറിച്ചും തുടര്‍ നടപടികളെക്കുറിച്ചും അംബാസഡര്‍ സുഹൈല്‍ അജാസ് ഖാനുമായും ജിദ്ദ ഇന്ത്യന്‍ കോണ്‍സല്‍ ജനറല്‍ ഫഹദ് അഹമ്മദ് ഖാന്‍ സൂരിയുമായും സംഘം ചര്‍ച്ച നടത്തി. അപകടത്തില്‍ മരിച്ചവരുടെ അടുത്ത ബന്ധുക്കളും സൗദിയിലെത്തിയിട്ടുണ്ട്. ആകെ 32 പേരാണ് സൗദിയിലെത്തിയത്. ഇതില്‍ 26 പേര്‍ മരിച്ചവരുടെ അടുത്ത കുടുംബാംഗങ്ങളാണ്. ഇവരുടെ രക്തം ശേഖരിച്ച് ഡിഎന്‍എ പരിശോധന നടത്തി മൃതദേഹങ്ങള്‍ തിരിച്ചറിഞ്ഞ ശേഷമായിരിക്കും ഖബറടക്കം.