ജിസാന്‍- മയക്കുമരുന്ന് കടത്തുമായി ബന്ധപ്പെട്ട് ഒരു സൗദി പൗരന്‍ ഉള്‍പ്പെടെ 15 പേരെ അതിര്‍ത്തി രക്ഷാസേനയുടെ ലാന്‍ഡ് പട്രോളിംഗ് സംഘം പിടികൂടി. എത്യോപ്യന്‍, യെമന്‍ പൗരന്മാരായ 14 പേരും ഒരു സൗദി പൗരനുമാണ് അതിര്‍ത്തി സുരക്ഷാ നിയമം ലംഘിച്ചതിന് അറസ്റ്റിലായത്. ഇവരില്‍ നിന്ന് ആകെ 47 കിലോഗ്രാം ഹാഷിഷും 240 കിലോഗ്രാം ഖാത്ത് എന്ന നിരോധിത സസ്യവും പിടിച്ചെടുത്തു.

ജിസാന്‍ മേഖലയിലെ അല്‍-ദായര്‍ സെക്ടറിലെ അതിര്‍ത്തി രക്ഷാസേനയുടെ ലാന്‍ഡ് പട്രോളിംഗ് സംഘമാണ് എത്യോപ്യന്‍, യെമന്‍ പൗരന്മാരായ 11 അതിര്‍ത്തി ലംഘകരെ പിടികൂടിയത്. ഇവര്‍ 180 കിലോഗ്രാം അളവില്‍ ഖാത്ത് എന്ന ലഹരി സസ്യം കടത്താന്‍ ശ്രമിക്കുന്നതിനിടെയാണ് പിടിയിലായത്. അതേസമയം, അസീര്‍ മേഖലയിലെ റബുവ സെക്ടറില്‍ നടത്തിയ പരിശോധനയില്‍ അതിര്‍ത്തി സുരക്ഷാ നിയമം ലംഘിച്ച മൂന്ന് യെമന്‍ പൗരന്മാരെ അറസ്റ്റ് ചെയ്തു. ഇവരില്‍ നിന്ന് 60 കിലോഗ്രാം ഖാത്ത് പിടിച്ചെടുത്തു. കൂടാതെ, ഇതേ മേഖലയിലെ ധഹ്റാന്‍ അല്‍ ജനൂബ് സെക്ടറില്‍ നിന്ന് 47 കിലോഗ്രാം ഹാഷിഷ് കടത്താന്‍ ശ്രമിച്ച ഒരു സൗദി പൗരനെയും സേന പിടികൂടി.

അറസ്റ്റിലായവര്‍ക്കെതിരെ പ്രാഥമിക നിയമനടപടികള്‍ പൂര്‍ത്തിയാക്കിയതായി അതിര്‍ത്തി രക്ഷാസേന അറിയിച്ചു. ഇവരെയും പിടിച്ചെടുത്ത ലഹരിവസ്തുക്കളും തുടര്‍നടപടികള്‍ക്കായി ബന്ധപ്പെട്ട അതോറിറ്റിക്ക് കൈമാറി. മയക്കുമരുന്ന് കടത്ത്, വിതരണം എന്നിവയുമായി ബന്ധപ്പെട്ട് പൗരന്മാര്‍ക്കും താമസക്കാര്‍ക്കും ലഭിക്കുന്ന ഏതൊരു വിവരവും സുരക്ഷാ അധികാരികളെ അറിയിക്കണമെന്ന് സേന അഭ്യര്‍ത്ഥിച്ചു.