ദമ്മാം: പ്രവാസത്തെ അടയാളപ്പെടുത്തുന്ന സാഹിത്യ കലാ പ്രവര്ത്തനങ്ങള്ക്കായ് സൗദി മലയാളി സമാജം ഏര്പ്പെടുത്തിയ അഞ്ചാമത് പ്രവാസമുദ്ര പുരസ്കാരം പ്രശസ്ത നോവലിസ്റ്റും, ചെറുകഥാ കൃത്തുമായ ഡോ: പോള് സക്കറിയക്ക് സമ്മനിച്ചു. സൗദിയില് ആദ്യമായി സംഘടിപ്പിക്കപ്പെട്ട സൗദി മലയാളി ലിറ്റററി ഫെസ്റ്റിന്റെ ഉദ്ഘാടന വേദിയില് പ്രശസ്ത സാഹിത്യകാരന് പെരുമാള് മുരുകനാണ് അവാര്ഡ് സമ്മാനിച്ചത്. 50000 രൂപയും, ഫലകവും അടങ്ങുന്നതാണ് പുരസ്കാരം, എഴുത്തുകാരായ ജമാല് കൊച്ചങ്ങാടി, സി.പി സെയ്തലവി, നദീം നൗഷാദ്, എന്നിവരടങ്ങുന്ന ജൂറിയാണ് പോള് സകറിയയെ അവാര്ഡിനായി തെരഞ്ഞെടുത്തത്. 18 വര്ഷം മുമ്പ് സൗദി സന്ദര്ശിച്ച് അദ്ദേഹമെഴുതിയ 'നബിയുടെ നാട്ടില്' എന്ന പുസ്തകത്തിന് പ്രത്യേകമായും,പ്രവാസ ജീവതങ്ങളുടെ നേര്ക്കാഴ്ചകള് പകര്ത്തിയ യാത്രാ വിവരണ ഗ്രന്ഥങ്ങള് പരിഗണിച്ചുമാണ് സക്കറിയക്ക് അവാര്ഡ് സമ്മാനിച്ചത്. രണ്ട് വര്ഷം കൂടുമ്പോള് സൗദി മലയാളി സമാജം സമ്മാനിക്കുന്ന പ്രവാസമുദ്ര പുരസ്കാരത്തിന് എഴുത്തുകാരന് പി.സുരേന്ദ്രന്, കെ.പി രാമനുണ്ണി, 'പത്തേമാരി'യുടെ സംവിധായകന് സലീം അഹമ്മദ്, എം. മുകുന്ദന് എന്നിവരാണ് നേരത്തെ അര്ഹരായിട്ടുള്ളത്.
ഏതാണ്ട് രണ്ട് പതിറ്റാണ്ടുകള്ക്ക് മുമ്പ് താന് കണ്ട സൗദിയെക്കുറിച്ച് വരച്ചിട്ട വാക്കുകള് സൗദിയില് പുലര്ന്ന യാഥാര്ത്ഥ്യം കണ്ട് താന് വിസ്മയിച്ചു നില്ക്കുകയാണെന്ന് അദ്ദേഹം പറഞ്ഞു. പുതിയ കാലത്തിന്റെ മാറ്റങ്ങള് കൃത്യമായി മനസ്സിലാക്കുകയും, അത് ഉപയോഗപ്പെടുത്തുകയും ചെയ്യാന് ഈ രാജ്യത്തിന് കഴിഞ്ഞിരിക്കുന്നു. സൗദിയുടെ ഉള്ളറകളിലുടെ താന് നടത്തിയ യാത്രയുടെ നിറവുകളാണ് നബിയുടെ നാട്ടില് എന്ന പുസ്തകം. അത് ഇതേ മണ്ണിലെ സാഹിത്യ കൂട്ടായ്മയിലുടെ പുരസ്കൃതമാകുന്ന സന്തോഷം ഏറെയുണ്ടെന്നും അവാര്ഡ് സ്വീകരിച്ചുകൊണ്ട് ഡോ: പോള് സക്കറിയ പറഞ്ഞു.
ചടങ്ങില് സൗദി മലയാളി സമാജം പ്രസിഡന്റ് സാജിദ് ആറാട്ടുപുഴ അദ്ധ്യക്ഷനായിരുന്നു. പെരുമാള് മുരുകന് ചടങ്ങ് ഉദ്ഘാടനം ചെയ്തു. മാലിക് മഖ്ബൂല് അവാര്ഡ് പരിചയപ്പെടുത്തി. എഴുത്തുകാരായ രാജശ്രീ, അഖില് പി ധര്മ്മജന്, റഹ്മാന് കിടങ്ങയം,ഷെമി, സജി മാര്ക്കോസ്, ജലീലിയോ, സിമി സീതി, ഫെബിന സമാന് എന്നിവര് ആശംസകള് നേര്ന്നു. ജനറല് സെക്രട്ടറി ഡോ: സിന്ധു ബിനു സ്വാഗതവും, ഓര്ഗനൈസിംഗ് സെക്രട്ടറി ഷനീബ് അബൂബക്കര് നന്ദിയും പറഞ്ഞു. കല്ല്യാണി ബിനു പ്രാര്ത്ഥനാ ഗാനം ആലപിച്ചു. ഡോ: അജി വര്ഗ്ഗീസ്, നവ്യ ടീച്ചര് എന്നിവര് അവതാരകരായിരുന്നു.
പടം: സൗദി മലയാളി സമാജം പ്രവാസമുദ്ര പുരസ്കാരം ഡോ: പോള് സക്കറിയ പെരുമാള് മുരുകനില് നിന്ന് ഏറ്റുവാങ്ങുന്നു.
Related News
