റിയാദ്: സൗദി അറേബ്യയില് സര്ക്കാര് ജീവനക്കാര്ക്ക് പിന്നാലെ സ്വകാര്യ മേഖലാ ജീവനക്കാര്ക്കും വസ്ത്രധാരണ ചട്ടം (Dress Code) ഏര്പ്പെടുത്താനൊരുങ്ങി മാനവവിഭവ ശേഷി മന്ത്രാലയം. ഇതിനായുള്ള കരട് ചട്ടങ്ങള് മന്ത്രാലയം പുറത്തിറക്കി. തൊഴിലിടങ്ങളില് പാലിക്കേണ്ട വസ്ത്രധാരണ രീതികളെക്കുറിച്ചും പെരുമാറ്റച്ചട്ടങ്ങളെക്കുറിച്ചുമുള്ള നിര്ദ്ദേശങ്ങളാണ് ഇതിലുള്ളത്.
പൊതുജനങ്ങളുടെ അഭിപ്രായം കൂടി പരിഗണിച്ച ശേഷമായിരിക്കും നിയമം പ്രാബല്യത്തില് വരിക. നിലവില് പൊതുജനാഭിപ്രായം തേടുന്നതിനായി മന്ത്രാലയത്തിന്റെ പോര്ട്ടലില് നിര്ദ്ദേശങ്ങള് പ്രസിദ്ധീകരിച്ചിട്ടുണ്ട്.
പ്രധാന നിര്ദ്ദേശങ്ങള് ഇവയാണ്: പുരുഷ ജീവനക്കാര് ജോലി സമയത്തും ഔദ്യോഗിക പരിപാടികളിലും മാധ്യമങ്ങളില് പ്രത്യക്ഷപ്പെടുമ്പോഴും സൗദി ദേശീയ വസ്ത്രം ധരിക്കല് നിര്ബന്ധമാക്കും. വിദേശികളായ ജീവനക്കാര് നിര്ബന്ധമായും ഫോര്മലായ വസ്ത്രങ്ങള് ധരിച്ചിരിക്കണം. വീടുകളില് ഉപയോഗിക്കുന്ന തരത്തിലുള്ള കാഷ്വല് വസ്ത്രങ്ങള് ജോലിസ്ഥലത്ത് അനുവദിക്കില്ല.
സ്ത്രീകള് ശരീരം മറയ്ക്കുന്ന മാന്യമായ വസ്ത്രങ്ങള് ധരിക്കണം. സുതാര്യമായതോ , അമിതമായി ഇറുകിയതോ ആയ വസ്ത്രങ്ങള് ധരിക്കാന് പാടില്ല. സ്ഥാപനങ്ങളില് ഔദ്യോഗിക യൂണിഫോം നിലവിലുണ്ടെങ്കില്, അത് പുതിയ ചട്ടങ്ങള് പാലിച്ചുകൊണ്ടുള്ളതായിരിക്കണം.
വസ്ത്രധാരണത്തിന് പുറമെ ജീവനക്കാരുടെ പെരുമാറ്റത്തിലും ശുചിത്വത്തിലും പാലിക്കേണ്ട കാര്യങ്ങളും മന്ത്രാലയം വ്യക്തമാക്കിയിട്ടുണ്ട്. വസ്ത്രവും ശരീരവും എപ്പോഴും വൃത്തിയായി സൂക്ഷിക്കണം. രാഷ്ട്രീയമോ, ആശയപരമോ ആയ സന്ദേശങ്ങളുള്ള വസ്ത്രങ്ങള് ധരിക്കാന് പാടില്ല. സൗദി അറേബ്യയുടെ മൂല്യങ്ങള്, പാരമ്പര്യം, സംസ്കാരം എന്നിവയ്ക്ക് നിരക്കാത്ത പെരുമാറ്റം തൊഴിലിടങ്ങളില് അനുവദിക്കില്ല. രാജ്യത്തിന്റെ പ്രതിച്ഛായയെ ബാധിക്കുന്ന പ്രവൃത്തികള് ജീവനക്കാരുടെ ഭാഗത്തുനിന്നും ഉണ്ടാകാന് പാടില്ല.
സ്വകാര്യ സ്ഥാപനങ്ങളിലെ ജീവനക്കാര് ഡ്രസ് കോഡ് ലംഘിച്ചാല് തൊഴില് നിയമപ്രകാരം സ്ഥാപനത്തിനായിരിക്കും മന്ത്രാലയം പിഴ ചുമത്തുക. പൊതുമേഖലാ സ്ഥാപനങ്ങളിലെ ജീവനക്കാര്ക്കെതിരെ നിയമാനുസൃതമായ അച്ചടക്ക നടപടികളും സ്വീകരിക്കും.
Related News
