ഇസ്ലാമാബാദ്: പാകിസ്ഥാന് മുന് പ്രധാനമന്ത്രി ഇമ്രാന് ഖാന് കസ്റ്റഡിയില് കൊല്ലപ്പെട്ടു എന്ന തരത്തില് സാമൂഹിക മാധ്യമങ്ങളിലും മറ്റും വ്യാപകമായി പ്രചരിക്കുന്ന അഭ്യൂഹം തള്ളി അദിയാല ജയില് അധികൃതര്. ഇമ്രാന് ഖാന് സുഖമായും ആരോഗ്യത്തോടെയും ഇരിക്കുന്നു എന്ന് ജയില് അധികൃതര് അവകാശപ്പെട്ടു. അദ്ദേഹത്തിന്റെ സുരക്ഷക്ക് ഭീഷണിയാകുന്ന യാതൊരു സംഭവവും ഉണ്ടായിട്ടില്ലെന്നും, കൃത്യമായ പരിചരണത്തിലാണ് അദ്ദേഹം കഴിയുന്നതെന്നും ജയില് ഉദ്യോഗസ്ഥരെ ഉദ്ധരിച്ച് സിഎന്എന്-ന്യൂസ്18 റിപ്പോര്ട്ട് ചെയ്യുന്നു.
14 വര്ഷം തടവ് ശിക്ഷ ലഭിച്ച് ജയിലില് കഴിയുന്ന ഇമ്രാന് ഖാനെ സന്ദര്ശിക്കുന്നതിന് സഹോദരിമാര്ക്ക് അനുമതി നിഷേധിച്ചു എന്ന ആരോപണത്തിന് ശേഷമാണ് അദ്ദേഹത്തിന്റെ മരണത്തെക്കുറിച്ചുള്ള സ്ഥിരീകരിക്കാത്ത അഭ്യൂഹങ്ങള് പ്രചരിക്കാന് തുടങ്ങിയത്. ഇമ്രാന് ഖാന് ദുരൂഹമായി കൊല്ലപ്പെട്ടു എന്നും അദ്ദേഹത്തിന്റെ മൃതദേഹം ജയിലില് നിന്ന് മാറ്റിയെന്നും അഫ്ഗാനിസ്ഥാന് ടൈംസ് റിപ്പോര്ട്ട് ചെയ്തതോടെ അഭ്യൂഹങ്ങള് ശക്തമായി. മെയിലും ഇത്തരം പ്രചാരണങ്ങളുണ്ടായിരുന്നു. ഇമ്രാന് ഖാന് ജുഡീഷ്യല് കസ്റ്റഡിയില് മരിച്ചുവെന്ന് അവകാശപ്പെടുന്ന പാക് സര്ക്കാരിന്റെ രേഖയാണ് പുറത്തുവന്നത്. ഈ രേഖ വ്യാജമാണെന്ന് പാക് അധികൃതര് വ്യക്തമാക്കി.
അഭ്യൂഹങ്ങള് ശക്തമായതോടെ പാകിസ്ഥാന് തെഹ്രീകെ ഇന്സാഫ് പാര്ട്ടി, നേതാക്കള്ക്കും കുടുംബാംഗങ്ങള്ക്കും ഇമ്രാന് ഖാനെ ഉടന് സന്ദര്ശിക്കാന് അവസരം നല്കണമെന്ന് ആവശ്യപ്പെട്ടു. പ്രതിനിധികളുടെ ഔദ്യോഗിക പട്ടിക പാര്ട്ടി ജയില് സൂപ്രണ്ടിന് സമര്പ്പിക്കുകയും കൂടിക്കാഴ്ചകള് വേഗത്തില് ക്രമീകരിക്കാന് സര്ക്കാരിനോട് ആവശ്യപ്പെടുകയും ചെയ്തു.
ഈ കുഴപ്പങ്ങള്ക്ക് പിന്നില് ഫീല്ഡ് മാര്ഷല് അസിം മുനീറാണെന്ന് ഖാന്റെ അടുത്ത അനുയായിയായ ഡോ. സല്മാന് അഹമ്മദ് സിഎന്എന്-ന്യൂസ്18 നോട് പറഞ്ഞു. ഒരു മാസമായി ഇമ്രാന് ഖാനെ കാണാന് അനുമതി നിഷേധിച്ചതിനെ തുടര്ന്ന്, കഴിഞ്ഞയാഴ്ച സഹോദരിമാര് പാര്ട്ടി പ്രവര്ത്തകര്ക്കൊപ്പം അദ്ദേഹം തടവില് കഴിയുന്ന അദിയാല ജയിലിന് പുറത്ത് തമ്പടിച്ചിരുന്നു. കൂടിക്കാഴ്ച എത്രയും വേഗം ക്രമീകരിക്കാമെന്ന് പോലീസ് വ്യക്തമാക്കിയതിനെ തുടര്ന്നാണ് പ്രതിഷേധം പിന്വലിച്ചത്.
Related News
