ജിദ്ദ: വിഖ്യാതമായ കിംഗ് അബ്ദുല്ല യൂണിവേഴ്സിറ്റി ഓഫ് സയന്സ് ആന്ഡ് ടെക്നോളജി (കൗസ്റ്റ്) സര്വകലാശാലയുടെ ചരിത്രത്തിലെ ഏറ്റവും വലിയ ബിരുദദാന ചടങ്ങ് ആഘോഷിച്ചു. 45-ല് അധികം രാജ്യങ്ങളില് നിന്നുള്ള 593 വിദ്യാര്ത്ഥികളാണ് ഇത്തവണ ബിരുദം നേടിയത്. ഇതില്, ആഭ്യന്തര മന്ത്രാലയത്തിലെ 66 ഉദ്യോഗസ്ഥര്ക്ക് ആര്ട്ടിഫിഷ്യല് ഇന്റലിജന്സ് (എഐ) പ്രോഗ്രാമിലെ മാസ്റ്റര് ബിരുദം ലഭിച്ചു.
ഊര്ജ മന്ത്രിയും കൗസ്റ്റ് ബോര്ഡ് ഓഫ് ട്രസ്റ്റീസ് ചെയര്മാനുമായ അബ്ദുല് അസീസ് ബിന് സല്മാന് രാജകുമാരന്, മക്ക മേഖല ഡെപ്യൂട്ടി ഗവര്ണര് പ്രിന്സ് സൗദ് ബിന് മിഷാല് എന്നിവരുടെ രക്ഷാകര്തൃത്വത്തിലും സാന്നിധ്യത്തിലുമായിരുന്നു ചടങ്ങ്.
ആര്ട്ടിഫിഷ്യല് ഇന്റലിജന്സ് സാങ്കേതികവിദ്യയുടെ ഉപയോഗത്തിലൂടെ കുറ്റകൃത്യങ്ങള് കുറയ്ക്കാന് കഴിഞ്ഞതായി ആഭ്യന്തര മന്ത്രാലയം അറിയിച്ചു. മികച്ച സേവനങ്ങള് സൃഷ്ടിക്കുന്നതിനും സുരക്ഷയും പാരിസ്ഥിതിക സുസ്ഥിരതയും കൈവരിക്കുന്നതിനും എഐ സാങ്കേതികവിദ്യകള്ക്കും ബിഗ് ഡാറ്റാ വിശകലനത്തിനും മന്ത്രാലയം പ്രത്യേക ശ്രദ്ധ നല്കുന്നുണ്ട്.
ആള്ക്കൂട്ട മാനേജ്മെന്റ്, സുരക്ഷ, തീര്ഥാടകര്ക്കുള്ള സേവനങ്ങള് എന്നിവയുമായി ബന്ധപ്പെട്ട ഏത് സംഭവവികാസങ്ങളോടും വേഗത്തിലും കൃത്യതയിലും പ്രതികരിക്കുന്നതിന് തത്സമയ ഡാറ്റാ വിശകലനത്തിനായി വികസിത സാങ്കേതികവിദ്യകളുള്ള ഒരു കമാന്ഡ് ആന്ഡ് കണ്ട്രോള് സെന്റര് ആഭ്യന്തര മന്ത്രാലയത്തിനുണ്ട്.
ഹജ്ജ്, ഉംറ തീര്ത്ഥാടകരുടെ രാജ്യത്തേക്കുള്ള പ്രവേശനം ലളിതമാക്കുന്ന 'സ്മാര്ട്ട് ട്രാക്ക്' വഴിയുള്ള മന്ത്രാലയത്തിന്റെ സംരംഭങ്ങള് വലിയ ജനക്കൂട്ടത്തെ കൈകാര്യം ചെയ്യുന്നതില് ലോകശ്രദ്ധ നേടി. ജനറല് ഡയറക്ടറേറ്റ് ഓഫ് പാസ്പോര്ട്ട്സിന്റെ കീഴിലുള്ള ഈ സംവിധാനം വഴി, തീര്ഥാടകര്ക്ക് കാത്തിരിപ്പ് സമയം കുറച്ച്, വേഗത്തിലും കൃത്യതയിലും രാജ്യത്തേക്ക് പ്രവേശിക്കാന് സാധിക്കുന്നു.
Related News
