കോഴിക്കോട്: നഗരത്തിന്റെ ഹൃദയഭാഗത്തുള്ള ബേബി മെമ്മോറിയല് ആശുപത്രിയില് ഇന്ന് രാവിലെ 9.30-ഓടെ വന് തീപിടിത്തമുണ്ടായി. ആശുപത്രിയുടെ സി ബ്ലോക്കിലെ ഒമ്പതാം നിലയിലാണ് തീ പടര്ന്നുപിടിച്ചത്. സന്തോഷകരമായ വാര്ത്ത, സംഭവത്തില് ആളപായമൊന്നും റിപ്പോര്ട്ട് ചെയ്തിട്ടില്ല. തീ പടര്ന്നത് രോഗികള് ഇല്ലാത്ത ഭാഗത്തായതിനാല് വന് ദുരന്തം ഒഴിവായി. കെട്ടിടത്തിന്റെ മുകള് നിലയില്നിന്ന് കനത്ത പുക ഉയര്ന്നിരുന്നത് പ്രദേശത്ത് പരിഭ്രാന്തി പരത്തി.
വിവരം ലഭിച്ച ഉടന്തന്നെ അഗ്നിശമന സേനയുടെ അഞ്ച് യൂണിറ്റുകള് സ്ഥലത്തെത്തി രക്ഷാപ്രവര്ത്തനം ആരംഭിച്ചു. എ.സി പ്ലാന്റിന്റെ നിര്മ്മാണ പ്രവര്ത്തനങ്ങള് നടക്കുന്ന ഭാഗത്താണ് തീ പടര്ന്നതെന്നാണ് പ്രാഥമിക വിവരം. താഴത്തെ നിലകളിലെ രോഗികളെ ഉടന്തന്നെ സുരക്ഷിത സ്ഥാനങ്ങളിലേക്ക് മാറ്റി.
ആശുപത്രി അധികൃതരുടെയും, അഗ്നിശമന സേനയുടെയും, പോലീസിന്റെയും കൃത്യമായ ഇടപെടല് മൂലം തീ അതിവേഗം നിയന്ത്രണവിധേയമാക്കാന് സാധിച്ചു. എല്ലാവരും സുരക്ഷിതരാണെന്ന് ആശുപത്രി അധികൃതര് അറിയിച്ചു. നൂറുകണക്കിന് രോഗികള് ദിവസവും എത്തിച്ചേരുന്ന നഗരത്തിലെ ഒരു പ്രധാന ആശുപത്രിയിലാണ് ഈ തീപിടിത്തം ഉണ്ടായത്. തീപിടിത്തത്തിന്റെ കാരണം സംബന്ധിച്ച് കൂടുതല് അന്വേഷണം നടക്കുകയാണ്.
Related News
