മനാമ: 74,885 ദിനാറിന്റെ നികുതി തട്ടിപ്പ് നടത്തിയ കേസില്‍ കുറ്റക്കാരനെന്ന് കണ്ടെത്തിയ ഏഷ്യന്‍ വംശജന് ബഹ്‌റൈന്‍ കോടതി അഞ്ച് വര്‍ഷം തടവും 3,000 ദിനാര്‍ പിഴയും ശിക്ഷ വിധിച്ചു. 27 ബാങ്ക് കാര്‍ഡുകള്‍ ഉപയോഗിച്ചാണ് ആസൂത്രിതമായി പ്രതി ഇത്രയും വലിയ തട്ടിപ്പ് നടത്തിയത്. സ്ഥിരീകരിച്ച 32 ഇടപാടുകളും സ്ഥിരീകരിക്കാത്ത 12 ഇടപാടുകളും പ്രതി നികുതി തട്ടിപ്പിനായി നടത്തിയെന്ന് കോടതി കണ്ടെത്തി. കമ്പനികളുടെ നികുതികളും സര്‍ക്കാര്‍ ബില്ലുകളും അടക്കുന്നതിനായി മോഷ്ടിച്ചതോ അനധികൃതമായതോ ആയ ബാങ്ക് കാര്‍ഡുകള്‍ ഉപയോഗിച്ചാണ് ഇയാള്‍ തട്ടിപ്പ് നടത്തിയത്. അഞ്ച് വര്‍ഷത്തെ ശിക്ഷാ കാലാവധി പൂര്‍ത്തിയാക്കിയ ശേഷം പ്രതിയെ രാജ്യത്ത് നിന്ന് നാടുകടത്താനും കോടതി ഉത്തരവുണ്ട്.

അതേസമയം, തട്ടിപ്പില്‍ പങ്കാളിയാണെന്ന് ആരോപിച്ച് കേസില്‍ പ്രതിചേര്‍ക്കപ്പെട്ട മറ്റൊരു ഉദ്യോഗസ്ഥനെ കോടതി വെറുതേവിട്ടു. കുറ്റകൃത്യത്തില്‍ ഇയാള്‍ ഉള്‍പ്പെട്ടതിന് മതിയായ തെളിവുകളില്ലെന്ന് ചൂണ്ടിക്കാട്ടിയായിരുന്നു കോടതി വിധി. കാനഡ, യുഎസ്, ജപ്പാന്‍ എന്നിവിടങ്ങളില്‍ നിന്നുള്ള ബാങ്ക് കാര്‍ഡുകള്‍ ഉപയോഗിച്ചായിരുന്നു തട്ടിപ്പ്. നാഷണല്‍ റെവന്യൂ അതോറിറ്റിയുടെ ഇലക്ട്രോണിക് പ്ലാറ്റ്ഫോം വഴിയും ബാങ്കിങ് കമ്പനിയുടെ ഗേറ്റ്വേ വഴിയും പണമടച്ചതിന് പിന്നില്‍ ഏഷ്യന്‍ പൗരന്റെ പങ്ക് തെളിയിക്കാന്‍ സാധിച്ചു.