മലപ്പുറം: മുസ്ലിം സ്ത്രീകളുടെ പള്ളി പ്രവേശനവുമായി ബന്ധപ്പെട്ട് മകള് ഫാത്തിമ നര്ഗീസ് നല്കിയ പ്രതികരണത്തില് വിശദീകരണവുമായി മുസ്ലിം ലീഗ് അഖിലേന്ത്യ സെക്രട്ടറി മുനവ്വറലി ശിഹാബ് തങ്ങള്. സ്ത്രീകള് പള്ളികളില് പ്രവേശിക്കരുതെന്ന് ചിലയാളുകള് ഉണ്ടാക്കിയെടുത്തതാണെന്നായിരുന്നു ഫാത്തിമയുടെ പ്രതികരണം.
എന്നാല് അപ്രതീക്ഷിതമായി ഒരു ചോദ്യം നേരിടേണ്ടി വന്ന സാഹചര്യത്തില് മകള് നല്കിയ പ്രതികരണം കേരളത്തിലെ മുഖ്യധാര മുസ്ലിം വിശ്വാസരീതികളുമായോ പണ്ഡിത സമൂഹത്തിന്റെ തീര്പ്പുകളുമായോ യോജിക്കുന്നതല്ലെന്നും ആ വിഷയത്തില് ആവശ്യമായ മതബോധമോ പഠനത്തിന്റെ പര്യാപ്തതയോ ഇതുവരെ കൈവരിക്കാത്ത ഒരു കുട്ടിയുടെ, ആലോചനാപരമല്ലാത്ത പെട്ടെന്നുള്ള അഭിപ്രായപ്രകടനമായി മാത്രം കാണണമെന്നുമാണ് മുനവ്വറലി തങ്ങള് ഫേസ്ബുക്ക് പോസ്റ്റിലൂടെ വിശദീകരിച്ചത്.
മനോരമയുടെ ഹോര്ത്തൂസ് വേദിയില് നടന്ന സംവാദത്തിലായിരുന്നു ഫാത്തിമയുടെ അഭിപ്രായ പ്രകടനം. 'സ്ത്രീകള്ക്ക് പള്ളിയില് കയറാന് പാടില്ലെന്ന് ഒരിക്കലും പറഞ്ഞിട്ടില്ല. ചിലയാളുകള് ഉണ്ടാക്കിയെടുത്തതാണ് ഇതെല്ലാം. അത് മാറേണ്ടിയിരിക്കുന്നു. അതും സ്ത്രീ വിപ്ലവത്തിന്റെ ഭാഗമാണ്. ഉടനെ ഇതെല്ലാം മാറുമെന്നാണ് ഞാന് കരുതുന്നത്'- ഇങ്ങനെയായിരുന്നു പള്ളികളിലെ സ്ത്രീ പ്രവേശനവുമായി ബന്ധപ്പെട്ട ചോദ്യത്തോടുള്ള നര്ഗീസിന്റെ പ്രതികരണം.
മുനവ്വറലി തങ്ങളുടെ ഫേസ്ബുക്ക് പോസ്റ്റിന്റെ പൂര്ണരൂപം:
ഒരു പരിപാടിക്കിടെ ഒരു ചോദ്യത്തിന് 16 വയസ്സുള്ള വിദ്യാര്ത്ഥിനിയായ എന്റെ മകള് ഫാത്തിമ നര്ഗീസ് നല്കിയ മറുപടിയെപ്പറ്റി ആവശ്യമായ വ്യക്തത വരുത്തുന്നതിനായാണ് ഈ കുറിപ്പ് എഴുതുന്നത്.
കര്മ്മശാസ്ത്രവുമായി ബന്ധപ്പെട്ട, പണ്ഡിതോചിതമായ ആഴത്തിലുള്ള അറിവ് ആവശ്യമായ ഒരു വിഷയത്തെക്കുറിച്ചുള്ള ചോദ്യത്തിന്, അപ്രതീക്ഷിതമായി ഒരു ചോദ്യം നേരിടേണ്ടി വന്ന സാഹചര്യത്തില് മകള് നല്കിയ പ്രതികരണം കേരളത്തിലെ മുഖ്യധാര മുസ്ലിം വിശ്വാസരീതികളുമായോ പണ്ഡിത സമൂഹത്തിന്റെ തീര്പ്പുകളുമായോ യോജിക്കുന്നതല്ലെന്ന കാര്യം ഉത്തമ ബോധ്യമുണ്ട്.
ആ മറുപടി, ആ വിഷയത്തില് ആവശ്യമായ മതബോധമോ പഠനത്തിന്റെ പര്യാപ്തതയോ ഇതുവരെ കൈവരിക്കാത്ത ഒരു കുട്ടിയുടെ, ആലോചനാപരമല്ലാത്ത പെട്ടെന്നുള്ള അഭിപ്രായപ്രകടനമായി മാത്രം കാണണമെന്നതാണ് അഭ്യര്ത്ഥന.
കേരളത്തിലെ പരമ്പരാഗത മുസ്ലിം പണ്ഡിത സമൂഹം അവരുടെ ആഴത്തിലുള്ള ജ്ഞാനത്തെ ആധാരമാക്കി വ്യക്തമായി നിര്വചിച്ചിട്ടുള്ള ഒരു വിഷയത്തില്, ഒരു പിതാവെന്ന നിലയില് മുഴുവന് ഉത്തരവാദിത്വബോധത്തോടെയും മകളുടെ ആ മറുപടി ഞാന് ഇവിടെ തിരുത്തി വ്യക്തമാക്കുന്നു.
Related News
