ദുബായ്: യു എ ഇയില്‍ നിന്ന് ഇന്ത്യയിലേക്കുള്ള വിമാന നിരക്കില്‍ 25 ശതമാനം വരെ വര്‍ധന. ശരാശരി 700 ദിര്‍ഹത്തിന് മേലെയാണ് ടിക്കറ്റ് നിരക്കില്‍ കൂടിയത്. ഇന്‍ഡിഗോ വിമാനങ്ങള്‍ റദ്ദാക്കിയതും സര്‍വീസുകള്‍ തടസ്സപ്പെട്ടതും യു എ ഇയില്‍ തിരക്കേറിയ യാത്രാ സീസണ്‍ ആരംഭിച്ചതുമാണ് നിരക്ക് വര്‍ധനവിന് കാരണം. ഇത് പ്രവാസികളുടെ ബജറ്റിനെ താളംതെറ്റിച്ചിരിക്കുകയാണ്.

യു എ ഇയില്‍ നിന്ന് കേരളത്തിലേക്കും ഡല്‍ഹി അടക്കമുള്ള മേഖലയിലേക്കുള്ള സര്‍വീസുകളിലാണ് ഏറ്റവും കൂടുതല്‍ നിരക്ക് വര്‍ധന രേഖപ്പെടുത്തിയത്. അടുത്ത വാരാന്ത്യത്തില്‍ ദുബായില്‍ നിന്ന് ഡല്‍ഹിയിലേക്കുള്ള നിരക്ക് 2,880 ദിര്‍ഹം വരെ എത്തിയിട്ടുണ്ട്. ബെംഗളൂരു, ഹൈദരാബാദ്, മുംബൈ സര്‍വീസുകളിലും 30 ശതമാനത്തിലധികം വര്‍ധനവുണ്ട്. കൊച്ചി, തിരുവനന്തപുരം തുടങ്ങിയ രണ്ടാം നിര നഗരങ്ങളിലേക്കുള്ള യാത്രക്കാരെയാണ് പ്രതിസന്ധി രൂക്ഷമായി ബാധിച്ചിട്ടുണ്ട്. വാരാന്ത്യങ്ങളില്‍ ഇവിടങ്ങളിലേക്ക് 30 ശതമാനത്തിലധികം വര്‍ധനവുണ്ട്.

ഇന്‍ഡിഗോ വിമാനങ്ങളുടെ അനിശ്ചിതത്വം കാരണം മറ്റ് വിമാനക്കമ്പനികളിലും തിരക്ക് വര്‍ധിച്ചു. കൃത്യസമയത്ത് എത്താന്‍ കൂടുതല്‍ പണം നല്‍കാന്‍ യാത്രക്കാര്‍ തയ്യാറാകുന്നതും സ്‌കൂള്‍ അവധി തുടങ്ങിയതും നിരക്ക് കൂടാന്‍ കാരണമായി. ആഭ്യന്തര വിമാനങ്ങള്‍ റദ്ദാക്കിയതും യാത്രക്കാരെ വലക്കുന്നു. വിമാന സര്‍വീസുകള്‍ പുനരാരംഭിച്ചു തുടങ്ങിയെങ്കിലും സാധാരണ നിലയിലാകാന്‍ ഒരാഴ്ച മുതല്‍ പത്ത് ദിവസം വരെ സമയമെടുത്തേക്കാം. ജനുവരി അവസാനത്തോടെയാണ് നിരക്കുകള്‍ കുറയുന്ന പ്രവണത കാണിക്കുന്നത്.