ജിദ്ദ - പ്രവാസലോകത്തെ പ്രമുഖ വാര്‍ഷിക സാഹിത്യമേളയായ 'പ്രവാസി സാഹിത്യോത്സവി'ന്റെ പതിനഞ്ചാം പതിപ്പ് ജിദ്ദയില്‍ അരങ്ങേറുന്നു. പതിവില്‍നിന്ന് വ്യത്യസ്തമായി രണ്ടു സോണുകളായാണ് ഇത്തവണ മേള നടക്കുന്നതെന്ന് കലാലയം സാംസ്‌കാരിക വേദി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ജിദ്ദ സിറ്റി സോണ്‍ സാഹിത്യോത്സവ് ഡിസംബര്‍ 26-നും ജിദ്ദ നോര്‍ത്ത് സോണ്‍ സാഹിത്യോത്സവ് 2026 ജനുവരി രണ്ടിനുമാണ് നടക്കുക.

ജിദ്ദയിലെ സഫ, ബവാദി, അനക്കിഷ്, ഹിറ, മഹ്ജര്‍, ഷറഫിയ, ബലദ്, ബഹ്‌റ, സുലൈമാനിയ, ഖുമ്ര തുടങ്ങി 12 സെക്ടറുകളില്‍ നിന്നായി പ്രൈമറി, ജൂനിയര്‍, സെക്കന്ററി, സീനിയര്‍ വിഭാഗങ്ങളിലായി 600 പ്രതിഭകളുടെ മത്സരവും ജിദ്ദയിലെ പ്രമുഖ കാമ്പസുകളെ പ്രതിനിധീകരിച്ചു കാമ്പസ് മത്സരവും നടക്കും. മാപ്പിളപ്പാട്ട്, ദഫ്മുട്ട്, ഇംഗ്ലീഷ്, മലയാളം പ്രസംഗങ്ങള്‍, കവിതാ പാരായണം തുടങ്ങിയ ജനപ്രിയ ഇനങ്ങള്‍ക്കൊപ്പം, വൈജ്ഞാനിക പ്രാധാന്യമുള്ള രിസാല റിവ്യൂ, ലെറ്റര്‍ ടു ദി എഡിറ്റര്‍, പ്രബന്ധ രചന എന്നിവയും മത്സര ഇനങ്ങളാണ്. സോഷ്യല്‍ ട്വീറ്റ്, അറബിക് കാലിഗ്രാഫി, കൊളാഷ്, സ്‌പോട്ട് മാഗസിന്‍, കവിതാ രചന, കഥാ രചന, ഹൈക്കു തുടങ്ങിയ 94 ഇനങ്ങളും മത്സരങ്ങളുടെ മാറ്റുകൂട്ടും.

പതിനഞ്ചാം എഡിഷന്റെ ഭാഗമായി ഭിന്നശേഷിക്കാരായ കഴിവുകളെ പ്രോത്സാഹിപ്പിക്കുന്ന 'സ്‌നേഹോത്സവം', പ്രവാസ തിരക്കുകള്‍ക്കിടയില്‍ കലയെ സ്‌നേഹിക്കുന്നവര്‍ക്കായി 'കലോത്സാഹം', സ്ത്രീകള്‍ക്കായി 'ഒരിടത്ത്' എന്നീ പ്രത്യേക സെഷനുകളും ഇത്തവണത്തെ സവിശേഷതയാണ്. ലേബര്‍ ക്യാമ്പുകളിലും ബൂഫിയ, ബഖാല തുടങ്ങിയ മേഖലകളിലും പ്രവര്‍ത്തിക്കുന്ന കലാകാരന്മാരായ പ്രവാസികളുടെ സര്‍ഗാത്മകത പങ്കുവെക്കുകയാണ് കലോത്സാഹത്തിലൂടെ ലക്ഷ്യമിടുന്നത്. സോണ്‍ മത്സരങ്ങളില്‍ വിജയിക്കുന്നവര്‍ മക്കയില്‍ നടക്കുന്ന സൗദി വെസ്റ്റ് നാഷനല്‍ സാഹിത്യോത്സവത്തില്‍ പങ്കെടുക്കും.

യൂറോപ്പ്, ആഫ്രിക്ക, അമേരിക്ക തുടങ്ങി 24-ഓളം രാഷ്ട്രങ്ങളില്‍ പ്രവാസി സാഹിത്യോത്സവുകള്‍ നടക്കുന്നതായി ഭാരവാഹികള്‍ പറഞ്ഞു. വിവിധ രാജ്യങ്ങളിലേക്ക് കുടിയേറിയ മലയാളിക്കൊപ്പം അവരുടെ സര്‍ഗാത്മകതയേയും ലോകത്തെ പരിചയപ്പെടുത്തുകയാണ് സാഹിത്യോത്സവം ലക്ഷ്യം വെക്കുന്നതെന്നും അവര്‍ പറഞ്ഞു.

മുഹ്‌സിന്‍ സഖാഫി അഞ്ചച്ചവടി, യാസര്‍ അറഫാത്ത് എ.ആര്‍ നഗര്‍, റഫീഖ് കൂട്ടായി, മുഹമ്മദ് ശംസാദ് അങ്ങാടിപ്പുറം അബൂബക്കര്‍ സിദ്ധീഖ് വലിയപറമ്പ് എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.