ജിദ്ദ: 2026 വര്‍ഷത്തെ ഹജ്ജ് തീര്‍ഥാടകര്‍ക്ക് സുരക്ഷാ കവചമൊരുക്കി കേന്ദ്ര ഹജ്ജ് കമ്മിറ്റി. തീര്‍ഥാടകരെ കാണാതാവുന്നത് ഫലപ്രദമായി തടയുന്നതിനായി, കമ്മിറ്റിക്ക് കീഴിലെത്തുന്ന എല്ലാ ഹാജിമാര്‍ക്കും ഇനി സ്മാര്‍ട്ട് വാച്ചുകള്‍ നല്‍കും. 'ഹജ്ജ് സുവിധ' ആപ്പുമായി ബന്ധിപ്പിച്ച് പ്രവര്‍ത്തിക്കുന്ന ഈ വാച്ചുകള്‍ വഴി, തീര്‍ഥാടകരെക്കുറിച്ച് സമഗ്ര വിവരങ്ങള്‍ ലഭിക്കും.

ആരെങ്കിലും കൂട്ടം തെറ്റുകയോ കാണാതാവുകയോ ചെയ്താല്‍, അവര്‍ നിലവില്‍ എത്തിച്ചേര്‍ന്ന സ്ഥലത്തിന്റെ കൃത്യമായ വിവരങ്ങള്‍ ഉള്‍പ്പെടെയുള്ള എല്ലാ ഡാറ്റയും കമ്മിറ്റിയുടെ വെബ്‌സൈറ്റില്‍ തത്സമയം ലഭ്യമാകും. ഓരോ വാച്ചിനും അന്താരാഷ്ട്ര റോമിംഗ് സംവിധാനവും ഒരു ജിബി ഡാറ്റയോടെ 60 ദിവസത്തെ വാലിഡിറ്റിയുമുണ്ടാകും.

1,22,518 എണ്ണം വാച്ചുകളാണ് ആകെ വേണ്ടത്. ഒരു വാച്ചിന് ഏകദേശ ചെലവ് 7,050 രൂപയാണ്. മൊത്തം കരാര്‍ തുക 86 കോടിയിലധികം വരും. ഈ ബൃഹത്തായ പദ്ധതിക്ക് വേണ്ടി 86 കോടി രൂപയുടെ കരാറിനായി കമ്പനികളില്‍ നിന്ന് അപേക്ഷ ക്ഷണിച്ചു. താല്‍പ്പര്യമുള്ള കമ്പനികള്‍ ഡിസംബര്‍ 22-നകം അപേക്ഷ സമര്‍പ്പിക്കണം. തീര്‍ഥാടകരുടെ സുരക്ഷ ഉറപ്പാക്കുന്നതില്‍ ഇത് ഒരു സുപ്രധാന ചുവടുവെപ്പാണ്.