റിയാദ്: താമസ, തൊഴില്‍, അതിര്‍ത്തി സുരക്ഷാ നിയമങ്ങള്‍ ലംഘിച്ചതിന് ഒരാഴ്ചയ്ക്കിടെ 19,576 പേരെ സൗദി അധികൃതര്‍ അറസ്റ്റ് ചെയ്തു. താമസ നിയമ ലംഘനത്തിന് 12,506 പേര്‍ പിടിയിലായി. അനധികൃത അതിര്‍ത്തി കടക്കല്‍ ശ്രമത്തിനിടെ 4,154 പേരും തൊഴില്‍ നിയമലംഘനത്തില്‍ 2,916 പേരും പിടിയിലായി.

രാജ്യത്തേക്ക് അനധികൃതമായി പ്രവേശിക്കാന്‍ ശ്രമിച്ചതിന് 1,418 പേര്‍ അറസ്റ്റിലായതായും റിപ്പോര്‍ട്ടില്‍ പറയുന്നു. ഇവരില്‍ 57 ശതമാനം എത്യോപ്യക്കാരും, 41 ശതമാനം യെമനികളും, 2 ശതമാനം മറ്റ് രാജ്യക്കാരുമാണ്. കൂടാതെ, അയല്‍രാജ്യങ്ങളിലേക്ക് കടക്കാന്‍ ശ്രമിച്ച 24 പേരെയും, നിയമലംഘകരെ കടത്താനും താമസിപ്പിക്കാനും സഹായിച്ച 16 പേരെയും അധികൃതര്‍ പിടികൂടി.

അനധികൃതമായി രാജ്യത്തേക്ക് പ്രവേശിക്കാന്‍ സൗകര്യമൊരുക്കുന്നവര്‍ക്കും അവരെ സഹായിക്കുന്നവര്‍ക്കും 15 വര്‍ഷം വരെ തടവും 10 ലക്ഷം സൗദി റിയാല്‍ വരെ പിഴയും ശിക്ഷ ലഭിക്കും. വാഹനങ്ങളും സ്വത്തുക്കളും കണ്ടുകെട്ടുമെന്നും ആഭ്യന്തര മന്ത്രാലയം അറിയിച്ചു.