റിയാദ്: സാര്‍വത്രിക ആരോഗ്യ പരിരക്ഷാ സൂചികയില്‍ സൗദി അറേബ്യ വമ്പിച്ച പുരോഗതി കൈവരിച്ചതായി പുതിയ റിപ്പോര്‍ട്ട്. ആരോഗ്യരംഗത്തെ വിപ്ലവകരമായ മാറ്റങ്ങളിലൂടെ, ജി20 രാജ്യങ്ങളില്‍ രാജ്യം ഇപ്പോള്‍ പത്താം സ്ഥാനത്താണ് എത്തിയിരിക്കുന്നത്. ലോകാരോഗ്യ സംഘടനയും ലോകബാങ്കും സംയുക്തമായി പുറത്തിറക്കിയ 'ട്രാക്കിംഗ് യൂണിവേഴ്‌സല്‍ ഹെല്‍ത്ത് കവറേജ്: ഗ്ലോബല്‍ മോണിറ്ററിംഗ് റിപ്പോര്‍ട്ട് 2025'ലാണ് സൗദിയുടെ ശ്രദ്ധേയമായ മുന്നേറ്റം രേഖപ്പെടുത്തിയിട്ടുള്ളത്.

ഏറ്റവും പുതിയ അപ്ഡേറ്റില്‍ സൗദിയുടെ സ്‌കോര്‍ 83 പോയിന്റിലെത്തിയിരിക്കുകയാണ്. രണ്ട് വര്‍ഷത്തിനുള്ളില്‍ ഒമ്പത് പോയിന്റ് വര്‍ധനവാണ് രേഖപ്പെടുത്തിയത്. ഉയര്‍ന്ന ആരോഗ്യ പരിരക്ഷയുള്ള രാജ്യങ്ങളുടെ കൂട്ടത്തിലാണ് സൗദിയെ ഉള്‍പ്പെടുത്തിയിരിക്കുന്നത്.

2016-ല്‍ ഏകദേശം 74 വര്‍ഷമായിരുന്നു സൗദിയിലെ ശരാശരി ആയുര്‍ദൈര്‍ഘ്യം. എന്നാല്‍ 2025-ല്‍ ഏകദേശം 79.7 വര്‍ഷമായി വര്‍ധിച്ചു. 2030-ഓടെ 80 വര്‍ഷമെന്ന ലക്ഷ്യത്തിലേക്ക് അടുക്കുകയാണ്. അസുഖങ്ങള്‍ നേരത്തെ കണ്ടെത്തി പ്രതിരോധിക്കാന്‍ ഒരുക്കിയ ആരോഗ്യ സംവിധാനങ്ങളുടെ വികസനമാണ് കുതിപ്പിന് കാരണം. സിഹ്ഹത്തീ, സിഹ്ഹ വെര്‍ച്വല്‍ ഹോസ്പിറ്റല്‍ തുടങ്ങിയ പ്ലാറ്റ്ഫോമുകളിലൂടെ ആരോഗ്യ സംരക്ഷണ സേവനങ്ങള്‍ നല്‍കിയതും വളര്‍ച്ചയുടെ കാരണമായി. വിഷന്‍ 2030-ന്റെ ഭാഗമായി ആരോഗ്യമേഖലയില്‍ നടപ്പാക്കുന്ന പരിഷ്‌കാരങ്ങള്‍ രാജ്യത്തെ ആഗോളതലത്തില്‍ മുന്‍നിരയിലെത്തിക്കാന്‍ സഹായിക്കുമെന്നാണ് വിലയിരുത്തല്‍.