കൊച്ചി: ഐടി കമ്പനി തുടങ്ങാനുള്ള ചര്‍ച്ചകള്‍ക്കായി കൊച്ചിയിലെത്തിയ യുഎസ് പൗരനെ ഹോട്ടല്‍ മുറിയില്‍ ബന്ദിയാക്കി ക്രൂരമായി മര്‍ദിക്കുകയും 3.10 ലക്ഷം രൂപയുടെ മുതലുകള്‍ കവരുകയും ചെയ്ത കേസില്‍ രണ്ട് പ്രതികള്‍ പിടിയിലായി. നിരവധി ക്രിമിനല്‍ കേസുകളില്‍ പ്രതികളായ മുളന്തുരുത്തി സ്വദേശി ആദര്‍ശ്, പള്ളുരുത്തി സ്വദേശി ആകാശ് എന്നിവരെയാണ് എറണാകുളം സെന്‍ട്രല്‍ പോലീസ് സാഹസികമായി അറസ്റ്റ് ചെയ്തത്.

യുഎസ് പൗരനും ന്യൂയോര്‍ക്കില്‍ ഐടി പ്രൊഫഷണലുമായ ഒഡീഷ സ്വദേശിയാണ് ആക്രമണത്തിന് ഇരയായത്. ഇന്‍ഫോപാര്‍ക്കില്‍ പുതിയ ഐടി കമ്പനി ആരംഭിക്കുന്നതുമായി ബന്ധപ്പെട്ട ചര്‍ച്ചകള്‍ക്കായാണ് വെള്ളിയാഴ്ച ഇദ്ദേഹം മറൈന്‍ ഡ്രൈവിലെ ഷണ്‍മുഖം റോഡിലുള്ള ഹോട്ടലില്‍ മുറിയെടുത്തത്. ശനിയാഴ്ച മദ്യം വാങ്ങാന്‍ പുറത്തിറങ്ങിയെങ്കിലും തദ്ദേശ തിരഞ്ഞെടുപ്പിനോടനുബന്ധിച്ച് ഡ്രൈ ഡേ ആയതിനാല്‍ ലഭിച്ചില്ല. ഈ സമയം മറൈന്‍ ഡ്രൈവ് പരിസരത്ത് കറങ്ങി നടക്കുകയായിരുന്ന ഗുണ്ടാ ലിസ്റ്റില്‍പ്പെട്ട ആദര്‍ശ് സഹായം വാഗ്ദാനം ചെയ്തു. അനധികൃതമായി മദ്യം വാങ്ങി നല്‍കിയ ശേഷം ആദര്‍ശ് മദ്യപിക്കാനായി യുഎസ് പൗരനൊപ്പം ഹോട്ടല്‍ മുറിയിലേക്ക് പോയി. രാത്രി ഇരുവരും ഒരേ മുറിയില്‍ മദ്യപിച്ച് ഉറങ്ങുകയായിരുന്നു.

ഞായറാഴ്ച രാവിലെ യാത്ര പോകാനായി യുഎസ് പൗരന്‍ ഉണര്‍ന്ന ശേഷം ആദര്‍ശിനെയും വിളിച്ചുണര്‍ത്തി. എന്നാല്‍ ഇതിനിടയില്‍ ആദര്‍ശ് സുഹൃത്തായ ആകാശിനെ ഹോട്ടലിലേക്ക് വിളിച്ചുവരുത്തിയിരുന്നു എന്നാണ് സൂചന. വാതിലില്‍ മുട്ടുന്നത് കേട്ട് യുഎസ് പൗരന്‍ വാതില്‍ തുറന്ന ഉടന്‍ പുറത്തുണ്ടായിരുന്ന ആകാശ് ഇദ്ദേഹത്തെ കയറിപ്പിടിക്കുകയും ആദര്‍ശ് പിന്നില്‍ നിന്ന് പിടികൂടുകയും ചെയ്തു. തുടര്‍ന്ന് ഇരുവരും ചേര്‍ന്ന് ശുചിമുറിയിലേക്ക് വലിച്ചിഴച്ച് കൊണ്ടുപോയി ക്രൂരമായി മര്‍ദിച്ചു. തങ്ങള്‍ പറയുന്നതനുസരിച്ചില്ലെങ്കില്‍ ജീവനെടുക്കുമെന്നും ഇവര്‍ ഭീഷണിപ്പെടുത്തി.

തുടര്‍ന്ന് യുഎസ് പൗരന്റെ അക്കൗണ്ടിലുണ്ടായിരുന്ന 75,000 രൂപ മൂന്ന് അക്കൗണ്ടുകളിലേക്ക് ഓണ്‍ലൈനായി അയപ്പിച്ചു. മുറി പുറത്തുനിന്ന് പൂട്ടി പുറത്തുപോയ ശേഷം എടിഎം കാര്‍ഡ് ഉപയോഗിച്ച് നാല് തവണകളായി 40,000 രൂപ പിന്‍വലിച്ചു. 500 യുഎസ് ഡോളറും സ്വര്‍ണമോതിരവും ഉള്‍പ്പടെ ആകെ 3,10,290 രൂപയുടെ മുതലുകളാണ് പ്രതികള്‍ കവര്‍ച്ച ചെയ്തതെന്ന് എഫ്.ഐ.ആറില്‍ പറയുന്നു.

സംഭവം ശ്രദ്ധയില്‍പ്പെട്ട ഹോട്ടല്‍ ജീവനക്കാരാണ് വിവരം പോലീസിനെ അറിയിച്ചത്. സെന്‍ട്രല്‍ പോലീസ് നടത്തിയ പരിശോധനയില്‍ പ്രതികളെ തിരിച്ചറിഞ്ഞു. ആദര്‍ശ് മരടിലുള്ള ഒരു ലോഡ്ജിലുണ്ടെന്ന വിവരത്തിന്റെ അടിസ്ഥാനത്തില്‍ പോലീസ് അവിടെയെത്തിയെങ്കിലും ഇയാള്‍ കെട്ടിടത്തിന്റെ മുകളില്‍ നിന്ന് ചാടി രക്ഷപ്പെടാന്‍ ശ്രമിച്ചു. തുടര്‍ന്ന് ഒരു കിലോമീറ്ററോളം നടത്തിയ സാഹസികമായ പിന്തുടരലിനൊടുവില്‍ പോലീസിന് ആദര്‍ശിനെ കീഴടക്കാനായി. ഇയാളില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ ആകാശിനെ കുമ്പളങ്ങിയില്‍ നിന്നും പിടികൂടി.

പിടിയിലായ പ്രതികള്‍ക്കെതിരെ ഗുരുതരമായ നിരവധി കേസുകള്‍ നിലവിലുണ്ട്. പള്ളുരുത്തിയില്‍ പോലീസ് ജീപ്പ് ആക്രമിച്ചതടക്കം നിരവധി കേസുകളില്‍ പ്രതിയാണ് ആദര്‍ശ്. ആകാശിനെതിരെ അടിപിടി, പിടിച്ചുപറി ഉള്‍പ്പെടെ പന്ത്രണ്ടോളം കേസുകളുണ്ട്. കവര്‍ച്ച ചെയ്ത പണവും സ്വര്‍ണമോതിരവും പ്രതികളില്‍ നിന്ന് പോലീസ് കണ്ടെടുത്തു.