മക്ക: അത്യാധുനിക മെഡിക്കല് സാങ്കേതികവിദ്യയുടെ സഹായത്തോടെ സങ്കീര്ണ്ണമായ ശസ്ത്രക്രിയ വിജയകരമായി പൂര്ത്തിയാക്കി മക്കയിലെ കിംഗ് അബ്ദുള്ള മെഡിക്കല് സിറ്റി. വന്കുടലില് ട്യൂമര് കണ്ടെത്തിയ രണ്ട് രോഗികളിലാണ് റോബോട്ടിക് സര്ജറി നടത്തിയത്. ശസ്ത്രക്രിയക്ക് ശേഷം പൂര്ണ്ണ ആരോഗ്യവാന്മാരായ രോഗികളെ ആശുപത്രിയില് നിന്നും ഡിസ്ചാര്ജ് ചെയ്തു.
വന്കുടലിന്റെ താഴ്ഭാഗത്ത് മുഴ കണ്ടെത്തിയ 57 വയസ്സുള്ള സ്വദേശി വനിതയും വന്കുടലിന്റെ വലതുഭാഗത്ത് ട്യൂമര് സ്ഥിരീകരിച്ച 61 വയസ്സുകാരനുമാണ് ചികിത്സക്ക് വിധേയരായത്. കൊളോറെക്റ്റല് ഓങ്കോളജി ക്ലിനിക്കില് നടത്തിയ വിശദമായ പരിശോധനകള്ക്കും ഇമേജിംഗ് ടെസ്റ്റുകള്ക്കും ശേഷമാണ് ഇരുവരെയും റോബോട്ടിക് സര്ജറിക്ക് വിധേയരാക്കാന് തീരുമാനിച്ചത്. ലോകത്തിലെ തന്നെ ഏറ്റവും ആധുനികമായ റോബോട്ടിക് സര്ജിക്കല് സിസ്റ്റമാണ് ഇതിനായി ഉപയോഗിച്ചത്.
ശരീരത്തിലെ അതീവ സൂക്ഷ്മമായ ഭാഗങ്ങളില് പോലും ചുറ്റുമുള്ള കോശങ്ങള്ക്ക് കേടുപാടുകള് സംഭവിക്കാതെ ശസ്ത്രക്രിയ നടത്താന് സാധിക്കുന്നതാണ് റോബോട്ടിക് സര്ജറിയുടെ ഗുണം. സാധാരണ ശസ്ത്രക്രിയകളെ അപേക്ഷിച്ച് രക്തനഷ്ടം ഗണ്യമായി കുറക്കാന് ഈ സാങ്കേതികവിദ്യ സഹായിക്കുന്നു. ശസ്ത്രക്രിയക്ക് ശേഷം രോഗികള്ക്ക് വളരെ വേഗത്തില് സാധാരണ ജീവിതത്തിലേക്ക് മടങ്ങാന് സാധിക്കും. പുരുഷ രോഗിയെ ശസ്ത്രക്രിയക്ക് തൊട്ടുപിന്നാലെയും, വനിതയെ രണ്ട് ദിവസത്തിന് ശേഷവും ഡിസ്ചാര്ജ് ചെയ്തു.
സങ്കീര്ണ്ണമായ കേസുകളില് റോബോട്ടിക് ശസ്ത്രക്രിയ ഫലപ്രദമായ പരിഹാരമാണെന്നും ആരോഗ്യമേഖലയിലെ ഈ മുന്നേറ്റം രോഗികള്ക്ക് മികച്ച ചികിത്സാ അനുഭവം ഉറപ്പാക്കുന്നുവെന്നും മെഡിക്കല് സിറ്റി അധികൃതര് വ്യക്തമാക്കി.
Related News
