റിയാദ്- ആഗോളതലത്തില് അത്യാധുനിക സാങ്കേതികവിദ്യകളുടെ വികാസവും നയരൂപീകരണവും വിലയിരുത്തുന്ന ഓക്സ്ഫോര്ഡ് ഇന്സൈറ്റ്സിന്റെ 2025-ലെ ഗവണ്മെന്റ് എഐ റെഡിനസ് ഇന്ഡക്സില് സൗദി അറേബ്യ ഉജ്ജ്വല നേട്ടം കൈവരിച്ചു. മിഡില് ഈസ്റ്റ്, നോര്ത്ത് ആഫ്രിക്ക മേഖലയില് ഒന്നാം സ്ഥാനത്തെത്തിയ സൗദിയുടെ ഈ മുന്നേറ്റം നിര്മിത ബുദ്ധി സാങ്കേതികവിദ്യകള് സര്ക്കാര് തലത്തില് പ്രായോഗികമാക്കുന്നതിലെ മികവിനുള്ള അംഗീകാരമാണ്. സുസ്ഥിരമായ രീതിയില് ആര്ട്ടിഫിഷ്യല് ഇന്റലിജന്സ് വികസിപ്പിക്കുന്നതിലൂടെ ആഗോളതലത്തില് തന്നെ ഈ മേഖലയിലെ കരുത്തരായി രാജ്യം മാറിയിരിക്കുകയാണ്.
ഗവണ്മെന്റ് സേവനങ്ങളിലും പൊതുനയങ്ങളിലും നിര്മിത ബുദ്ധി എത്രത്തോളം ഫലപ്രദമായി ഉപയോഗിക്കുന്നു എന്നതിനെ അടിസ്ഥാനമാക്കി ലോകമെമ്പാടുമുള്ള 195 രാജ്യങ്ങളെയാണ് ഈ പഠനത്തില് ഉള്പ്പെടുത്തിയിരിക്കുന്നത്. അടിസ്ഥാന സൗകര്യങ്ങള്, ഗവേണന്സ്, സ്ഥാപനങ്ങളുടെ സന്നദ്ധത തുടങ്ങിയ വിവിധ മാനദണ്ഡങ്ങള് പരിശോധിച്ചാണ് റാങ്കിങ് നിശ്ചയിക്കുന്നത്. ഈ റിപ്പോര്ട്ട് പ്രകാരം ഭരണനിര്വഹണ മികവില് ആഗോളതലത്തില് ഏഴാം സ്ഥാനവും, പൊതുമേഖലയിലെ എഐ ഉപയോഗത്തില് ഒന്പതാം സ്ഥാനവും സൗദി അറേബ്യ കരസ്ഥമാക്കി. നിയമാവലികള് രൂപീകരിക്കുന്നതിലും അവ പ്രാവര്ത്തികമാക്കുന്നതിലും രാജ്യം പുലര്ത്തുന്ന തുല്യമായ ശ്രദ്ധയാണ് ഈ നേട്ടത്തിന് പിന്നില്.
സൗദി ഡാറ്റ ആന്ഡ് ആര്ട്ടിഫിഷ്യല് ഇന്റലിജന്സ് അതോറിറ്റിക്ക് ഭരണനേതൃത്വത്തില് നിന്ന് ലഭിക്കുന്ന വലിയ പിന്തുണയാണ് ഈ വിജയത്തിന്റെ അടിസ്ഥാനം. രാജ്യത്തെ ഡാറ്റയിലും നിര്മിത ബുദ്ധിയിലും അധിഷ്ഠിതമായ ഒരു സാമ്പത്തിക വ്യവസ്ഥയിലേക്ക് മാറ്റാന് കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് അല് സൗദ് നല്കുന്ന പ്രോത്സാഹനം നിര്ണ്ണായകമാണ്. സൗദിയുടെ ഈ മുന്നേറ്റത്തെ ആഗോള റിപ്പോര്ട്ട് പ്രത്യേകം അഭിനന്ദിച്ചു. വികസിത അടിസ്ഥാന സൗകര്യങ്ങള്, ഹ്യൂമൈന് പോലുള്ള ദേശീയ പ്ലാറ്റ്ഫോമുകള്, ക്രിയാത്മകമായ ഭരണരീതികള് എന്നിവ സൗദിയുടെ കരുത്തായി റിപ്പോര്ട്ടില് ചൂണ്ടിക്കാട്ടുന്നു.
സൗദി വിഷന് 2030-ന്റെ ലക്ഷ്യങ്ങളിലേക്ക് രാജ്യം വേഗത്തില് അടുക്കുന്നതിന്റെ തെളിവുകൂടിയാണ് ഈ റാങ്കിങ്. സര്ക്കാര് സേവനങ്ങളുടെ കാര്യക്ഷമത വര്ധിപ്പിക്കാനും ജനങ്ങളുടെ ജീവിതനിലവാരം ഉയര്ത്താനും ഇതിലൂടെ സാധിക്കുന്നു. നിര്മിത ബുദ്ധി രംഗത്തെ ലോകത്തിലെ മുന്നിര രാജ്യങ്ങളുടെ പട്ടികയിലേക്ക് സൗദി അറേബ്യയെ ഉയര്ത്തുക എന്ന ലക്ഷ്യത്തിലേക്കുള്ള പ്രധാന ചുവടുവെപ്പായി ഈ നേട്ടം വിലയിരുത്തപ്പെടുന്നു.
Related News
