ജിദ്ദ- സൗദി അറേബ്യയുടെ വിവിധ ഭാഗങ്ങളില്‍ വന്‍തോതിലുള്ള മഞ്ഞുവീഴ്ച റിപ്പോര്‍ട്ട് ചെയ്തു. വടക്കന്‍ പ്രവിശ്യയായ തബൂക്ക്, ഹായില്‍ എന്നിവിടങ്ങളില്‍ മലനിരകള്‍ മഞ്ഞുപുതച്ച നിലയിലാണ്. റിയാദിലും അല്‍ഖസീമിലും വരും ദിവസങ്ങളില്‍ മഞ്ഞുവീഴ്ചക്ക് സാധ്യതയുള്ളതിനാല്‍ ദേശീയ കാലാവസ്ഥാ നിരീക്ഷണ കേന്ദ്രം ജാഗ്രതാനിര്‍ദ്ദേശം നല്‍കിയിട്ടുണ്ട്.

റിയാദ്, കിഴക്കന്‍ പ്രവിശ്യ, വടക്കന്‍ അതിര്‍ത്തി മേഖലകള്‍ എന്നിവിടങ്ങളിലാണ് പ്രധാനമായും മൂടല്‍മഞ്ഞ് അനുഭവപ്പെടുക. കൂടാതെ, രാജ്യത്തിന്റെ തെക്കുപടിഞ്ഞാറന്‍ മലനിരകളില്‍ ആകാശം ഭാഗികമായി മേഘാവൃതമായിരിക്കുമെന്നും നേരിയ മഴയ്ക്ക് സാധ്യതയുണ്ടെന്നും റിപ്പോര്‍ട്ടില്‍ പറയുന്നു.

വടക്കന്‍, മധ്യ ഭാഗങ്ങളില്‍ കാറ്റിന്റെ വേഗം മണിക്കൂറില്‍ 10-28 കിലോമീറ്റര്‍ ആയിരിക്കും. എന്നാല്‍ തെക്കന്‍ ഭാഗത്ത് കാറ്റിന്റെ വേഗം 20-40 കിലോമീറ്റര്‍ വരെയും, ബാബ് അല്‍-മന്ദബ് കടലിടുക്ക് ഭാഗത്ത് 50 കിലോമീറ്റര്‍ വരെയും ഉയരാന്‍ സാധ്യതയുണ്ട്. തിരമാലകള്‍ തെക്കന്‍ ഭാഗങ്ങളില്‍ രണ്ട് മീറ്ററിലധികം ഉയര്‍ന്നേക്കാം.

വടക്കുകിഴക്ക് ദിശയില്‍ നിന്ന് മണിക്കൂറില്‍ 16-36 കിലോമീറ്റര്‍ വേഗത്തില്‍ കാറ്റ് വീശാന്‍ സാധ്യതയുണ്ട്. തിരമാലകള്‍ ഒന്നര മീറ്റര്‍ വരെ ഉയര്‍ന്നേക്കാം. കടല്‍ പൊതുവെ ശാന്തമോ മിതമായ രീതിയിലോ ആയിരിക്കും.