മദീന: മസ്ജിദുന്നബവിയുടെ മിനാരങ്ങളില് നിന്ന് പതിറ്റാണ്ടുകളോളം വിശ്വാസികളെ പ്രാര്ത്ഥനയിലേക്ക് ആനയിച്ച സുന്ദരശബ്ദം നിലച്ചു. മസ്ജിദുന്നബവിയിലെ പ്രമുഖ മുഅദ്ദിന് ശൈഖ് ഫൈസല് അല്നുഅ്മാന് അന്തരിച്ചു. കുറച്ചുകാലമായി രോഗബാധിതനായി ചികിത്സയിലായിരുന്നു അദ്ദേഹം. മദീനയുടെ മണ്ണില് ജനിച്ചുവളര്ന്ന അദ്ദേഹത്തിന്റെ വിയോഗം ഇസ്ലാമിക ലോകത്തിന് വലിയൊരു നഷ്ടമാണ്. മയ്യിത്ത് മദീനയില് ഖബറടക്കി.
പിതൃതുല്യമായ പൈതൃകം, 14-ാം വയസ്സില് തുടങ്ങിയ ദൗത്യം തന്റെ പിതാവ് ശൈഖ് അബ്ദുല് മാലിക് അല്നുഅ്മാന്റെ പാത പിന്തുടര്ന്ന് ബാങ്ക് വിളിയുടെ ലോകത്തേക്ക് കടന്നുവന്ന വ്യക്തിയായിരുന്നു ഫൈസല് അല്നുഅ്മാന്. പതിനാല് വയസ്സുള്ളപ്പോഴാണ് അദ്ദേഹം മസ്ജിദുന്നബവിയില് ആദ്യമായി ബാങ്ക് വിളിക്കുന്നത്. പിന്നീട് മരണം വരെ ആ മഹത്തായ ദൗത്യം അദ്ദേഹം ഹൃദയത്തോട് ചേര്ത്തുപിടിച്ചു. തൈബ സര്വകലാശാലയില് നിന്ന് ബിരുദം നേടിയ അദ്ദേഹം, ഔദ്യോഗിക ജീവിതത്തോടൊപ്പം തന്നെ പ്രവാചക നഗരിയുടെ ആത്മീയ സേവനത്തിലും സജീവമായിരുന്നു.
ഹൃദയത്തില് തൊടുന്ന സുസ്വര രാഗം ഭക്തിനിര്ഭരമായ ഖുര്ആന് പാരായണവും ശ്രുതിമധുരമായ ബാങ്ക് വിളിയുമായിരുന്നു അദ്ദേഹത്തെ ലോകപ്രശസ്തനാക്കിയത്. ഹറമിലെത്തുന്ന ദശലക്ഷക്കണക്കിന് വിശ്വാസികളുടെ കാതുകളില് അനുരണനമായി മാറിയ ആ ശബ്ദം ഇനി ഓര്മ്മകളില് മാത്രം. ഭക്തിയും ആത്മീയതയും ഇഴചേര്ന്ന അദ്ദേഹത്തിന്റെ ഓരോ പാരായണവും വിശ്വാസികളെ ഏറെ സ്വാധീനിച്ചിരുന്നു.
മദീനയിലെ വിദ്യാഭ്യാസ കാലഘട്ടം മുതല് മസ്ജിദുന്നബവിയിലെ മുഅദ്ദിന് പദവി വരെ നീളുന്ന അദ്ദേഹത്തിന്റെ ജീവിതം സേവനസന്നദ്ധതയുടെയും സമര്പ്പണത്തിന്റെയും ഉത്തമ ഉദാഹരണമാണ്. പണ്ഡിതരും പ്രമുഖരും ഉള്പ്പെടെ വലിയൊരു വിഭാഗം അദ്ദേഹത്തിന് അനുശോചനം രേഖപ്പെടുത്തി.
Related News
